The Definitive Guide to Living in the Capital , Cairo , Egypt

كردان هوم – Kerdan Home

كردان هوم: معلقات مصرية جدًا تقدر تشتريها أونلاين

  • توصيل فقط
  • أثاث ومستلزمات منزل
  • 01274559626
تم التقييم بواسطة
Dina Mokhtar
قيم
قيم الآن
كردان هوم: معلقات مصرية جدًا تقدر تشتريها أونلاين

من فترة ناس كثير كانت بتتكلم على أن من إيجابيات العيشة في مصر هو أنك ممكن تجيب أي حاجة ديليفري؛ وقتها "أي حاجة" دي كان معناها الأكل، البقالة، الخضار والفاكهة وحتى الأدوية. إنما مع انتشار وسائل التواصل الاجتماعي وتنوعها، بقى فعلًا ممكن تجيب أي حاجة وأنت قاعد في البيت من أول المأكولات لحد الإلكترونيات، وحتى إكسسوارات البيت.

وإحنا بنقلب في الفيسبوك لاقينا بالصدفة صفحة بعنوان كردان هوم – Kerdan Home، وبما أننا بنحب إي حاجة لها علاقة بالتراث الشعبي المصري، قررنا أننا ندخل نشوف إيه اللي الصفحة بتقدمه. بجولة سريعة اكتشفنا أن القائمين على الصفحة بيعملوا مجموعة متنوعة من الكردانات الخشبية الملونة كقطع ديكور تضيف لمسة مصرية للبيت بس بشكل معاصر وجديد.

ولو أنت مش عارف إيه هو الكردان، الكردان ده قطعة حلي بتزين رقبة ستات مناطق كثيرة في مصر، وبالذات في الصعيد. وهو له مكانة كبيرة عند السيدات لدرجة أنه بيعتبر ثروة بتتوارث بين ستات العائلة الواحدة. وبتختلف خامته وحجمه على حسب الحالة المادية والمكانة الاجتماعية للي بتلبسه.

المهم أن الكردانات اللي كردان هوم بيعرضها مش للبس؛ هي عبارة عن كردانات مصنوعة من الخشب، والملونة بألوان مختلفة، واللي ممكن تختارها حسب الطلب. اللطيف في المجموعة أنهم معمولين بشكل حديث، فهتلاقي الخطوط والموتيفات العامة اللي ممكن تلاقيها عادة في أي كردان تقليدي –زي المثلثات والقطع المعدنية المربوطة بجسم الكردان بسلاسل والهلال- ولكن بشكل مبسط مريح للعين.

أول واحد لفت نظرنا كان شكله قريب جدًا من الكردان التقليدي، واخد شكل الهلال فيه صفين من المثلثات، الصف الأول المثلثات فيه مفرغة، أما في الصف الثاني فهي بارزة باللونين الأحمر والأزرق. ومن جسم الهلال نازل سلاسل فيها قطع معدنية. سعر القطعة دي 550 جنيه، وارتفاعها 50 سم.

من ضمن القطع البعيدة عن الشكل التقليدي بس من غير ما تفقد اللمسة المصرية كانت قطعة ارتفاعها 54 سم، جسمها الأساسي مكون من مثلثين قواعدهم متقابلة ومتصلة ببعض بمجموعة من السلاسل. وكل مثلث فيهم متقسم لأدوار كل دور فيه عليه مثلث أو اثنين ملونين. وفي آخر القطعة فيه مثلثين صغيرين نازل منهم سلاسل فيهم ثلاثة أصغر. سعر القطعة 250 جنيه.

بقية المنتجات تصميماتها مش بعيدة عن المثالين دول؛ لأن وحدات التصميم شبه واحدة. ولكن ده ما يمنعش أن فيه قطع ثانية مميزة عن الباقيين؛ زي كف في وسطه عين ونازل منه مجموعة من السلاسل اللي فيها كف أصغر في النصف وخرز أزرق (30 سم – سعره 150 جنيه)، وبرضه مجموعة القطع اللي جسمها الأساسي مستطيل الشكل، واللي عجبنا منهم أرخص قطعة (60 جنيه)، واللي ارتفاعها 30 سم ومفرغ فيها صفين من المثلثات في وسطهم خط Zig Zag.

وإحنا بنقلب في صور المنتجات على صفحتهم ، أول حاجة جت على بالنا كانت "يا ترى هل ممكن الفكرة دي تنجح نفس النجاح اللي حققته الـ Dream Catchers في مصر الفترة اللي فاتت؟ " . شخصيًا إحنا حاسين أن الفكرة جميلة والمنتجات شكلها لطيف ومتنوع بحيث أنها تناسب كل الأذواق، ولكن نتمنى أننا نشوف منتجات أكثر من مجرد معلقات على الحائط بالطابع ده.

 

نصيحة 360

كردان هوم  قريب جدًا هيعرضوا منتجاتهم في أماكن كثيرة.

أحسن حاجة

تنوع الأسعار والأشكال.

أسوأ حاجة

المنتجات محصورة في المعلقات بس.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح