The Definitive Guide to Living in the Capital , Cairo , Egypt

تسوق
كريبتونايت – Kryptonite

كريبتونايت: جنة هواة الكوميكس والأبطال الخارقين في سيتي ستارز

  • الدور الرابع، المرحلة الثانية
  • ترفيه,مكتبات
تم التقييم بواسطة
Waleed Abuarab
قيم
قيم الآن
كريبتونايت: جنة هواة الكوميكس والأبطال الخارقين في سيتي ستارز

في الدور الرابع من المرحلة الثانية في سيتي ستارز فتح فرع جديد لمحلات «كريبتونايت – Kryptonite» اللي كان فتح في البداية في شارع السبكي في مصر الجديدة، وده الفرع الجديد للمحل الفريد من نوعه والمتخصص جدًا والمبهر لأقصى درجة. مش هـ نقدر نداري إعجابنا وانبهارنا بـ «كريبتونايت» طول ما إحنا بـ نكتب المقال ده، ولولا الأسعار المرعبة أحيانًا لبعض المعروضات كان هـ يأخذ الـ 5 نجوم بدون فصال. تعالوا نتكلم شوية عن التخصص غير المألوف للمحل، وبالتحديد غير المألوف في مصر.

كريبتونايت طبعًا هو العنصر المادي اللي بـ يطلع من كوكب كريبتون اللي جاء منه “سوبرمان” زي الحدوتة الخيالية ما بـ تقول. ولأن دي الحدوتة الأشهر في عالم الكوميكس Comics اختار المحل المتخصص في بيع القصص المصورة وتماثيل الأبطال الخارقين وشخصيات أفلام الأكشن العالمية اختار لنفسه الاسم ده. هنا هـ تلاقي كل كتب ومجلدات الـ Marvel وهي الشركة اللي ابتكرت كل الـ Super Heroes المشهورين زي سبايدر مان وكابتن أميركا وإكس مِن وآيرون مان وثور وغيرهم، وفيه كوميكس شركة DC Comics الشهيرة زي باتمان وسوبرمان وجرين لانتيرن وذا فلاش. طبعًا الأسعار مدونة على كل الكتيبات بالدولار، وكلها بـ تتراوح بين 15 لـ 20 دولار، حولها للجنيه المصري بقى وأنت تعرف أن أي كتاب من دول مش هـ يبقى سعره قليل. لكن المهم أنها أصلية ونادر أنك تلاقيها في أي مكان ثاني، والإصدارات حديثة وبـ تيجي أول بأول وده المهم.

الجانب الثاني الأكثر إبهارًا في المحل هو التماثيل أو الـ Figures المعروضة للبيع! مصنوعة من خامات مختلفة، جبس وفيها حلي من المعدن والفايبر، بأحجام توصل لـ 60 سم طول وبتصميمات غاية في الدقة، تقريبًا مافيش غلطة، لما تشوف تمثال شخصية الجوكر شرير كوميكس باتمان أو تمثال الرجل الأخضر Hulk أو جرين لانتيرن أو الرجل الحديدي Ironman أو Seth من مجموعة حرب الكواكب بأسعار من 1000 لحد 3000 جنيه ما تستغربش وما تستكترش الرقم! التصميمات خيالية وهـ تحس أنك فجأة تحولت لمدمن تماثيل أكشن وعاوز تقتني كل حاجة بـ تشوفها هنا، تمثال شخصية Terminator لأرنولد شوارزنيجر كان تحفة فنية، وكذلك روبن وهو على موتوسيكل باتمان الشهير (3200 جنيه) وغيرها من التماثيل ولعب الأطفال أو الشخصيات الأصغر حجمًا (20 لـ 30 سم) لكل الأبطال الخارقين وG.I Joe والمتحولون Transformers  وشخصيات من ديزني وهوليوود بأسعار من 200 لحد 600 جنيه.

شكل المحل مغري أنك تقضي فيه وقت طويل علشان تتفرج على كل حاجة بتمعن، والقائمين على المكان متخصصين ومحترفين جدًا وبـ يحبوا عالمهم الخاص جدًا في «كريبتونايت» وعندهم إجابة لكل سؤال. حبينا المحل جدًا وحتى لو مش هـ نقدر نشتري بالأسعار دي ممكن نروح كل يوم علشان نتفرج.

نصيحة 360

تابع صفحتهم على الفيسبوك علشان تعرف المعروضات الجديدة ولو فيه تخفيضات قريبة.

أحسن حاجة

أنه فتح في سيتي ستارز، المحل المناسب في المكان المناسب.

أسوأ حاجة

مع ارتفاع سعر الدولار، أنت في مشكلة حقيقية مع الأسعار!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح