The Definitive Guide to Living in the Capital , Cairo , Egypt

شارع مصدق مشهور بمحلات أدوات المطبخ وإكسسوارات المنزل الشهيرة زي “تيوليب – Tulipe”، وفي وسط المحلات دي يمكن ما يلفتش نظرك محل صغير زي “كيتشن ستورز – Kitchen Stores”، خاصة أن مدخله تحت مستوى الشارع ومحتاجة تنزلي كام سلمة علشان توصلي له.. لكن فعلاً المحل يستاهل الملاحظة والاستكشاف.

“كيتشن ستورز” زي ما بـ يوحي اسمه، متخصص في أدوات المطبخ بالذات، الحلل والصواني والطاسات وبرادات الشاي وغيرهم، الحاجات دي هـ تلاقي فيها تنوع كبير عندهم، بأشكال وألوان مميزة وغير تقليدية. لكن يمكن ما تلاقيش هناك تنوع كبير في أدوات تقديم الطعام زي الأطباق والكاسات.

برغم ضيق مساحة المحل وعدم الاهتمام بطريقة العرض سواء في الواجهة أو داخل المحل، فيه حاجتين بـ يميزوا “كيتشن ستورز” عن محلات الأدوات المنزلية الكبيرة والأكثر شهرة. أول حاجة هي كمية أدوات تحضير الطعام الحديثة والغريبة اللي مُعلقة على الحوائط في كل جوانب المحل. مافيش حاجة ممكن تتعمل في المطبخ إلا وهـ تلاقي أداة تساعدك فيها، ما بين السكاكين بأحجام وخامات مختلفة وأدوات التقطيع المعمولة مخصوص لكل نوع من أنواع الخضروات أو الأكلات زي الكيك والبيتزا، وبين أدوات عصر الليمون وفرم الثوم وتوزيع الشربات والكريمة وأطقم معالق الطبخ والمقاييس وحاجات ثانية كثيرة جدًا. لفت نظرنا فى وسط الأدوات دي طقم تقديم وتقطيع للبيتزا بمقابض على شكل قطع بيتزا كان سعره 35 جنيه، ومقشرة ليمون وبرتقال على شكل فص برتقال كانت بـ 14 جنيه، و كان فيه طقم ملاعق مقاييس ملونة شكلها لطيف جدًا وسعرها 19 جنيه.

الحاجة الثانية والمميزة أوي في “كيتشن ستورز” هي إكسسوارات المطبخ اللطيفة جدًا والصغيرة جدًا. أول ما قربنا من واجهة المحل لقيناهم عارضين أطقم شاي صغيرة قوي شبه اللي كنا بـ نلعب بها مع العرائس وإحنا صغيرين، ألوانهم ما بين الوردي والأبيض ومزينين بورود رقيقة جدًا، ودى سعرها 65 جنيه.

ولما دخلنا المحل لقينا رفوف علي الشمال عليها كمية كبيرة من إكسسوارات المطبخ اللي ممكن تُعلق على الحائط أو فيها مغناطيس علشان تُعلق على الثلاجة، زجاجات وكانز بيبسي وآيس كريم وعرائس وألعاب كلها بحجم ما يعديش عقل الأصابع ومع ذلك تفاصيلهم دقيقة بشكل يخلي الواحد يضحك ويحس أنه عاوز يلعب بهم كلهم.

 الأسعار في “كيتشن ستورز” عمومًا معقولة، مثلاً عجبنا هناك طقم حلل سيراميك تركي لونه وردي وشكله بناتي جدًا وسعر الحلة كان ما بين 285 و365 جنيه حسب حجمها. وكان فيه طاسات تيفلون إيطالي مخططة ومنقوشة بألوان مختلفة ومميزة كان سعر الصغيرة منها 85 جنيه والكبيرة 94 جنيه.

المعاملة في المحل لطيفة جدًا، بـ يسيبوكي تتفرجي زي ما أنت عاوزة لكن لو سألتي على حاجة بـ يجاوبوا بالتفصيل ويجيبوا لك كل البدائل والاختيارات.

“كيتشن ستورز” مكان هـ تلاقي فيه أدوات طبخ مختلفة ومميزة وهـ تلاقي فيه كمان فرصة أنك تشتري لعبة تفكرك بأيام زمان لما كنتي بـ تلعبي “مطبخ”.