The Definitive Guide to Living in the Capital , Cairo , Egypt

لامي شيروكي – L’ ami Cherokee

لامي شيروكي: الدكترة بشياكة في داندي مول

  • داخل داندي مول
  • 01119964114
تم التقييم بواسطة
Dina Mokhtar
قيم
قيم الآن
لامي شيروكي: الدكترة بشياكة في داندي مول

نسبة طلبة المدارس اللي حلمهم أنهم يدخلوا كلية الطب علشان شافوا قد إيه الدكاترة بـ يبقى شكلهم “Cute” في أطقم الجراحة الملونة في مسلسلات مشهورة زي “ER” أو “Grey’s Anatomy” أكبر من نسبة الطلبة اللي حلمهم أنهم يبقوا دكاترة علشان يكونوا سبب في شفاء الكثير من المرضى المساكين… دي حقيقة واقعة. بس طبعًا من واقع معرفتنا لعدد كبير من الأطباء عرفنا أن فيه فجوة عميقة بين اللي بـ نشوفه في الحلقات، واللي موجود فعلًا في المستشفيات.

فيه أماكن كثيرة –الأطباء طبعًا عارفينها أكثر مننا- متخصصة في بيع المستلزمات الطبية زي السماعات، وأجهزة قياس الضغط والبالطوهات وما شابه. عادة المحلات دي بـ تبقى منتشرة في محيط كلية طب في المنيل، وكذلك عند مستشفى القصر العيني الفرنساوي. بس أغلب المحلات دي بـ تبيع المستلزمات في صورتها التقليدية، بعكس لامي شيروكي – L’ami Cherokee في داندي مول، واللي بـ يقدم كل ما هو مميز في عالم المستلزمات الطبية.

اللي جذبنا أننا ندخل نعمل مقال نقدي عن محل أطقم جراحة، هو أننا لاقيناها ملونة و”Cute” زي اللي بـ نشوفها على جورج كلوني -بغض النظر أن جورج كلوني أي حاجة عليه هـ تبقى “Cute” بس ده مش موضوعنا دلوقت- “لامي شيروكي – L’ ami Cherokee” ماركة أمريكية معروفة، فاتحة فروع كثيرة في الوطن العربي، وأخيرًا وصلت مصر في داندي مول، أول حاجة جذبتنا هي العدد المهول من ألوان أطقم الجراحة المبتكرة –غير اللون الأزرق والأخضر اللي بـ نشوفهم في المسلسلات العربي- زي الوردي، الفوشيا والزيتي. الجميل كمان أن الأطقم منها قصات مختلفة وموديلات متعددة، وفيه منها بكم كمان. ده إحنا لسه بـ نتكلم عن السادة منها، اللي أبهرتنا كانت المنقوشة: منها عليه زهور، أو أشكال هندسية مجردة، وواحدة عليه كلاب مناسبة لجراح بيطري فاتح عيادة في الزمالك. الأسعار بـ تتراوح ما بين 550 و650 جنيه للطقم الواحد. أما لو هـ تشتري كل قطعة لوحدها، فالبنطلون (321 جنيه) والتوب (300 جنيه). من نفس الألوان دي أغطية الرأس: السادة منها (140 جنيه) أما المنقوش (150 جنيه).

لحسن الحظ كان معانا أثناء الجولة خبير طبي –دكتور يعني- واللي نبهنا أن الأسعار غير عملية لأن الطبيب محتاج عدد كبير من أطقم الجراحة علشان يبدل فيهم. ده غير أن الخامة اللي مصنوع منها الأطقم غير عملية لجو مصر، نظرًا لأنها ثقيلة نوعًا ما.

من القطع المهمة، واللي اشتهر بها الأطباء هي السابوهات الضخمة البيضاء، واللي بمرور الزمن أصبحت “الكروكس” البلاستيك واللي ممكن تجيبها بـ 25 جنيه من أي محل مستلزمات طبية في المنيل أو القصر العيني… “لامي شيروكي” بـ يقدمهم بميزة مهمة تختلف عن الأنواع الرخيصة، وهي أنها مقفولة من الأمام بحيث أنها تمنع تسريب أي سوائل غير مرغوب فيها، وسعرهم (500 جنيه)، وده كان كل ما يتعلق بأطقم الجراحة… الـ “Cute”.

أما بالنسبة للبالطوهات، فبالطو دكتور الأسنان القصير بـ (300 جنيه)، أما البالطو الطويل العادي بـ (438 جنيه)، أقمشتهم ثقيلة نوعًا ما ولكن مميزين بجيوبهم الواسعة.

موضوع الألوان ما توقفش عند أطقم الجراحة بس، ده امتد للسماعات الطبية، ده غير سلاسل اللي بـ تحمل الهوية، واللي منها واحد أسود مرصع بقطع الكريستال الصغيرة.

لفت نظرنا مجموعة من الساعات اللي بـ يتم تعليقها في الجيب (160 جنيه) والبلاستيكية العادية (320 جنيه)، والأولى بـ يستخدمها الجراحين لأن طبقًا لمعايير التعقيم مش المفروض أنهم يلبسوا ساعات معصم.

حقيقي ممكن ما تكونش الأسعار مناسبة لطبيب مقيم في قسم استقبال الطوارئ، بس ده ما يمنعش أن الواحد ممكن يدلع نفسه بطقم شيك يتلبس يوم مدير المستشفى هـ يمر فيه على القسم اللي أنت فيه. وبما أنك هـ تدفع فيها 500 جنيه، فاحميها بحياتك.   

نصيحة 360

لامي شيروكي بـ يقدم مجموعة من منتجات العناية بالبشرة، زي صابون بروائح مختلفة مستخلص من معادن البحر الميت.

أحسن حاجة

أطقم الجراحة الـ "Cute".

أسوأ حاجة

الأسعار غير مناسبة لحالة الأطباء المادية في مصر.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح