The Definitive Guide to Living in the Capital , Cairo , Egypt

تسوق
ماذر كير – Mothercare

ماذر كير: كل وأي حاجة متعلقة بالأطفال والأمهات تحت سقف واحد فى المهندسين

تم التقييم بواسطة
Dina Mokhtar
قيم
قيم الآن
ماذر كير: كل وأي حاجة متعلقة بالأطفال والأمهات تحت سقف واحد فى المهندسين

من ضمن الماركات العالمية اللي وصلت لمصر خلال الكام سنة اللي فاتت هي الماركة الإنجليزية الأشهر في عالم الأمومة والطفولة "ماذر كير"، وبما أن آخر مرة ممكن نكون لبسنا فيها من ماذر كير مر عليها حوالي ربع قرن، كان غريب علينا أننا ندخل المحل لمجرد الفرجة، فقررنا أننا نكتب مقال عن فرع ماذر كير –   Mothercare في المهندسين وهو بالمرة نتفرج.

في وقت زيارتنا المحل كان عامل تخفيضات بـ توصل لـ 75%، توقعنا زحام شديد لأنها فرصة لأي أم أنها تجمع أكبر عدد من الملابس لأن الأطفال بـ يغيّروا لبسهم في الساعة الواحدة أكثر من أي فاشونيستا في جلسة تصوير، ولكن للغرابة الشديدة المحل كان مافيهوش غير حوالي 3 أشخاص -من ضمنهم إحنا، اللي مش داخلين نشتري أصلًا- وهـ تعرفوا ليه.

الدور الأول من المحل مخصص للملابس والأحذية، أول حاجة وقعت عيوننا عليها كانت مجموعة من الفساتين اللي ينفع يتراح بها مناسبة شيك، انسوا بقى الفساتين المنفوشة اللي كلنا متصورين بها في الثمانينات وأوائل التسعينيات، هنا الموضوع مختلف تمامًا؛ عجبنا فستان مكوّن من قطعتين عليه نقوش هندسية باللون الوردي، موجود منه كمان اللون الأصفر، سعر الفستان قبل الخصم 599 جنيه… أيوه، وبعد التخفيض بقى 295 جنيه، الفستان تصميمه رائع، ولكن خامته وبطانته ثقيلة نوعًا ما على جو الفترة دي.

من القطع الكاجوال Jumpsuit قصيرة باللونين الأبيض والبنفسجي الفاتح كانت بـ 289 جنيه وبقيت بـ 185 جنيه. لاحظنا أن مجموعة ملابس الأولاد مش بشياكة ملابس البنات، معظمها تقريبًا بلا أي تفاصيل تذكر لدرجة أنك ممكن تشتريها من مكان ثاني من غير ما يكون فيه فرق، زي بولو شيرت خضراء (185 جنيه) وبنطلون بيج (109 جنيه).

في آخر الدور الأول موجود مجموعة ملابس النوم والملابس الداخلية، البيجامات مكونة من قطعتين (تي شيرت وشورت) للأولاد عليها رسوم شخصيات كارتونية زي دافي دك (285 جنيه)، أما البنات فشخصية فيلم Frozen احتلت جزء كبير من المعروضات (219 جنيه).

الدور العلوي خاص بمنتجات حديثي الولادة، واللي اكتشفنا من خلاله أننا ما كناش أطفال في يوم من الأيام بكم المنتجات اللي كل واحدة منها لها وظيفة تسهل على الأم وتدلع الطفل، معظم المعروضات المتعلقة بالأكل زي العلب البلاستيك والزجاجات وخلافه كانت بالنسبة لنا مش جديدة لأنها من ماركة Avent المنتشرة في أي صيدلية في مصر، ولكن اللي أبهرنا كانت مجموعة الأثاث الخاص بغرف نوم حديثي الولادة، السراير سعرها بـ يتراوح بين (1600: 3000 جنيه) حسب الموديل والحجم، أكثر واحد عجبنا منهم كان عبارة عن سلة من الخشب المعقود، لها مسند خشبي، رغم أن حجمه صغير، إلا أن شكله كان مختلف عن بقية السراير المعروضة، ضمن مجموعة السراير فيه كمان سراير معمولة كمساحة لعب آمنة للطفل، مبطنة بأسفنج حتى الأعمدة، وأسعارها بـ تتراوح ما بين (800 – 1300 جنيه).

كنا مستغليين الأسعار جدًا لحد ما وصلنا لمجموعة عربيات الأطفال، في الأول لاحظنا أنها بـ تترواح ما بين (800: 6000 جنيه)، طبعًا فيه فرق شاسع ما بين موديل السعر الأول وإمكانيات موديل السعر الثاني. بالصدفة لاحظنا أن فيه عربية واقفة لوحدها، حجمها متوسط ومعها شنطتين من نفس اللون سعرها (10500 جنيه) –ثمن عدد 2 موتوسيكل صيني-  عرفنا وقتها أن الطفل اللي هـ يركبها محظوظ أكيد.

بغض النظر عن المنتجات اللي فعلًا ما ينفعش أي أم تستغنى عنها، إحنا شايفين أن الأسعار بشكل عام مبالغ فيها، وخصوصًا الملابس اللي تعتبر غالية حتى بعد الـ 75% تخفيض. الميزة الوحيدة أن نطاق الأسعار واسع في تقريبًا كل المنتجات فأكيد هـ تلاقي حاجة تناسب ميزانيتك.

نصيحة 360

ممكن تجيب الكتالوج الخاص بالمحل مقابل 25 جنيه من أي فرع.

أحسن حاجة

كل حاجة موجودة.

أسوأ حاجة

الأسعار.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح