The Definitive Guide to Living in the Capital , Cairo , Egypt

مظلوم هوم من الأماكن المشهورة جدًا بين أوساط مهندسي الديكور، وهو مشهور بمنتجاته المستوردة من إيطاليا، وأمريكا وهولندا، واللي كلها بـ تتميز بالفخامة والبساطة في الوقت نفسه. عادة فروعه مساحتها كبيرة وبـ تبقى مليئة بقطع الأثاث والإكسسوارات بكل أنواعها، فرع الزمالك يعتبر صغير نسبيًا ولكن مازال فيه مجموعة كافية من المعروضات.

أول شيء جذبنا كان كرسي مريح من الجلد الطبيعي، لونه بني وله مسند قدم منفصل (15,900 جنيه)، والكرسي ده كان من ضمن مجموعة منتجات مستوردة من شركة ALF الإيطالية وبـ تتميز بالبساطة لأن تفاصيلها تقريبًا معدومة ماعدا لون الجلد والخياطة، وده اللي أخذنا بالنا منه في كنبة 3 مقاعد من الجلد لونها سماوي والخياطة باللون الأبيض، سعرها (31,900 جنيه).

من القطع المبهرة أباجورات على شكل Desk Lamps مودرن؛ مجرد حجمها الضخم لافت للنظر، وموجود منها حجمين الكبير (3900 جنيه) والصغير (2950 جنيه). من ضمن الحاجات العملاقة اللي عجبتنا كان شمعدان معدنه فضي لامع (4250 جنيه) وارتفاعه حوالي 90 سم أو أكثر.

من نفس الماركة الإيطالية لاقينا سفرة مكونة من 8 كراسي، سطح الترابيزة لامع ولونه رمادي غامق، أما الكراسي فهي من القماش بدرجة رمادي أفتح، الترابيزة جزء منها قابل للطي لو هـ يستعملها 6 أفراد فقط (75,900 جنيه)، بنفس تفاصيل السفرة اللي فاتت واحدة ثانية ولكن لونها بني غامق، مع الفرق أن معاها بوفيه من نفس السطح اللامع للترابيزة (79,900 جنيه).

المحل عارض حجرة نوم واحدة للشركة الإيطالية لونها بني غامق ومكونة من سرير، 2 كومود، تسريحة ووحدة أدراج. من غير ما نسأل عن الدولاب، وضح لنا المسؤول عن البيع –واللي كان ظريف ومفيد جدًا- أن الشركة بـ تصنع الدولاب حسب الطلب، لأن بعد انتشار الـ Dressing Rooms (اللي هي غرفة مخصصة ملابس، عقبال عندكوا كده) ما حدش بقى يحتاج الدواليب. الغرفة سعرها (47,900 جنيه).

من المعروضات غرفة معيشة مكونة من كنبة 4 مقاعد وكرسي من القماش اللبني والمحلى بدبابيس معدنية باللون النحاسي الغامق. الغرفة مستوردة من أمريكا، وهي فعلًا طابعها أمريكي بشكلها المريح وبساطتها (38,000 جنيه).  الغريب أن كل المقاعد والكنب موضوع عليهم علامة ممنوع اللمس أو الجلوس. حتى لو المعروضات قيمة، أنا كمشترين هـ نعرف إزاي أن الكنبة مريحة أو أن قماشها مناسب لو مش مسموح لنا نلمسها! نفهم أن الكلام ده يتم تطبيقه لو إحنا في عمر أفندي والبيه بـ يريّح بس على الكرسي في قسم الأثاث عقبال ما المدام تخلّص لف في قسم الملابس الحريمي، إنما اللي هـ يدخل محل أثاث مخصوص هـ يكون مهتم فعلًا أنه يأخذ فكرة عن المعروضات.

 المهم، من المعروضات الموجودة بكثرة هي وحدات الإضاءة والأبليكات، ففيه مثلًا أبليك كلاسيكي نوعًا ما مزدوج من المعدن الفضي (1750 جنيه)، أما الفردي منه (990 جنيه)، ومن وحدات الإضاءة المودرن أبليك معدني قابل للطيَ لونه أسود (1950 جنيه).

المعروضات بلا شك مبهرة جدًا، ولكن محتاجة بيوت مساحتها كبيرة، لأن معظم القطع ضخمة… طبعًا ده غير أن الأسعار ضخمة هي كمان، ولكن المكان ممتع حتى لو لمجرد الفرجة فقط وفريق العمل بالمحل متواجد بالدرجة المطلوبة للإجابة عن أي استفسار.