The Definitive Guide to Living in the Capital , Cairo , Egypt

مكتبة مكتوب – Maktoob Bookstore

مكتبة مكتوب: كنز الكتب المستعملة في أدغال الزمالك

  • 32 ب شارع يحيي إبراهيم
  • مكتبات
  • 01002574400
تم التقييم بواسطة
Dina Mokhtar
قيم
قيم الآن
مكتبة مكتوب: كنز الكتب المستعملة في أدغال الزمالك

بالرغم من أننا كنا متجهين لمكان ثاني علشان نكتب مقال نقدي، بالصدفة البحتة دخلنا شارع يحيي إبراهيم المتفرع من شارع السيد البكري اختصارًا للوقت والمجهود، ولحسن حظنا لمحنا علامة مكتوب عليها مكتبة مكتوب – Maktoob Bookstore؛ بدون تفكير دخلنا المكتبة الموجودة في الدور الأرضي للعمارة، واللي بقالها حوالي شهر بس فاتحة.

ديكورات المكتبة بسيطة جدًا وأحلى مافيها أنها بعيدة تمامًا عن جو المكتبات الثانية الكبيرة اللي بـ تحسسك أن فن الكتابة أصبح صناعة وهواية مصطنعة لناس كثير. الحوائط لونها لبني، وكم لوحات فنية كبيرة معلقة على الحوائط هي أول حاجتين لفتوا نظرنا. على يمين المدخل حائط إعلانات واستراحة، أما على الشمال مساحة لعرض الكتب العربية بأنواعها. أما في الطريق اللي بـ يوصلك لآخر حجرة في المكتبة -واللي فيها الكتب الإنجليزية- موجود مجموعة من كتب الأطفال والمراهقين.

مجموعة الكتب مش كبيرة في أي قسم من الأقسام، ولكن فكرة أن الكتب معظمها مستعمل يخلي الكتب أيًا كان عددها بالنسبة لهواة القراءة لها قيمة خاصة. مجموعة الكتب الإنجليزية غلب عليها الروايات، منها الكلاسيكي لكتاب مشاهير زي "إيرنست هيمنجواي" واللي عجبنا من مجموعته "العجوز والبحر" وسعرها كان (25 جنيه)، أما كتبه اللي طبعتها أجدد فأسعارها وصلت لـ (80 جنيه). من الكلاسيكيات لاقينا مجموعة كبيرة من كتب أجاثا كريستي وأسعارها بـ توصل لـ (30 جنيه). من روايات الكتاب المعاصرين، لاحظنا مجموعة كبيرة جدًا من أعمال الكاتبة "دانيال ستييل" ومعظم أسعار أعمالها (30 جنيه).  ده غير أن فيه كتب للتنمية الذاتية والتربية، وعدد معقول من كتب السير الذاتية منها My Life للرئيس الأمريكي الأسبق "بيل كلينتون" (119 جنيه).

الكتب العربية بـ تنقسم لنفس الأقسام؛ الأعمال الأدبية منوعة لعدد كبير من الكتاب الكلاسيكيين زي يوسف إدريس ويوسف السباعي والمعاصرين زي أحمد مراد ويوسف زيدان. من ضمن الروايات العربية "العمامة والقبعة" لصنع الله إبراهيم (19 جنيه)،  و"أولاد حارتنا" لنجيب محفوظ (45 جنيه). ده غير أن فيه مجموعة كبيرة من الروايات العالمية المترجمة، واللي عجبنا منهم "ثلاث أخوات" لأنطون تشيكوف، طبعتها قديمة جدًا ومترجمة في روسيا وبالتالي شكل الكتاب غير مألوف زي سعره بالضبط (2.5 جنيه).

وزي أي مكتبة عادية فيه مجموعة من الأجندات والمذكرات، ولكنها مجموعة قليلة جدًا مقارنة بالأماكن الثانية. الاختلاف الوحيد بين مكتوب وأي مكتبة ثانية أنك ممكن تستعير منها الكتب باشتراك شهري شخصي (180 جنيه) تستعير 10 كتب بواقع كتابين في المرة زائد قسيمة شراء قيمتها (30 جنيه)، أو اشتراك عائلي (350 جنيه) تستعير 20 كتاب (5 في المرة الواحدة)، وقسيمة شراء قيمتها (75 جنيه) من موقعهم على الإنترنت.

بالرغم من أن ناس كثير بـ تكره الكتب المستعملة لدواعى صحية، إلا أن اللي بـ يقدر قيمة الكتب فعلًا هـ يعتبر زيَنا أن مكتوب دي كنز ولاقيناه.

نصيحة 360

ممكن تستمتع بكوب قهوة وبسكويت (10 جنيه للواحدة) أثناء ممارسة هوايتك المفضلة.

أحسن حاجة

أسعار الكتب بـ تبدأ من 2.5 جنيه... يا بلاش!

أسوأ حاجة

بعض الكتب ممكن تكون صفحاتها ناقصة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح