The Definitive Guide to Living in the Capital , Cairo , Egypt

لو أنت من أهالي منطقة العجوزة وحافظ شوارعها الجانبية كويس، ممكن تكون مريت على محل مليكة هوم أكسسوريز –  Malika Home Accessories الموجود في شارع طنطا الهادئ؛ وبما أن الشارع مافيهوش محلات ثانية غير صيدلية، فالموضوع هـ يبقى سهل عليك لو أنت أول مرة تروح هناك.

محلات إكسسوارات المنزل عادة بـ تبقى مليئة بالتفاصيل والمعروضات مهما كانت مساحتها. وبالرغم من أن المحل مساحته متوسطة، إلا أنك لو بـ تتجول فيه هـ تلف مرة واثنين قبل ما تحدد إيه أكثر حاجة عجبتك. وعلى عكس محلات كثير زرناها، طريقة العرض في المحل مريحة بالرغم من كثرة وتنوع المعروضات، وخصوصًا أن فيه مساحة ممكن تمشي فيها من غير ما تحس أنك هـ توقع حاجة وتكسرها.

أول حاجة عجبتنا كانت مجموعة من المشغولات الزجاجية الملونة بألوان مودرن زي الفوشيا والموف، من ضمنهم مجموعة من كنكات القهوة (75 جنيه) ومعاها فناجيل بأطباقها سعر الواحد (50 جنيه)، ومجموعة من الأواني بألوان مختلفة زي الفوشيا، والوردي الفاتح والتركواز (45 جنيه).

المنتجات الخزفية موجود منها مجموعة كبيرة، عجبنا منها طبق زينة منقوش باللون الأصفر والأبيض (300 جنيه) ومجموعة من طفايات السجائر على شكل نصف أبريق (45 جنيه) واللي موجود منها ألوان قوية كثيرة زي الأحمر، الأصفر والأخضر الفاتح والأسود.

على صينية خشبية معروض مجموعة كبيرة من المجات اللي مطبوع عليها جمل زي My Daddy is a Superman (أبويا سوبرمان)، ورسومات الكوميكس. عجبنا منهم مج لبات مان كان شوفناه على صفحتهم على الفيسبوك ، لكن للأسف ما كانش متوفر في المحل، بس القائمة على البيع وضحت لنا أنه ممكن نطبع عندهم الصور اللي عاوزينها أو نعمل للمج اللي عجبنا أوردر، وفي خلال أسبوعين نستلمه. سعر المج الواحد (60 جنيه).

على حوائط المحل معروض مجموعة كبيرة من المرايا المستديرة اللي بـ تستخدم للزينة، واللي حسب الطلب ممكن تلون الإطار الخاص بهم؛ الأحجام بـ تختلف والأسعار بـ تتراوح من (800 : 500 جنيه). ده غير مجموعة من المرايات الكبيرة، واللي عجبنا منها  واحدة مستطيلة، إطارها ذهبي ستايلها نيو كلاسيك وسعرها 900 جنيه.

أحسن حاجة معروضة في المحل مجموعة الأبليكات ووحدات الإضاءة، بالرغم من أن عددهم مش كبير إلا أن فيه مجموعة من النجف المعروض واللي ستايله متنوع ما بين المودرن والـ Vintage أو العتيق. من الستايل الثاني عجبتنا واحدة من المعدن الأسود على هيئة دائرة ملفوف حولها مجموعة من الحبال (2000 جنيه). أما من الأبليكات، عجبتنا واحدة مكونة من لمضتين، معدنها شكله النهائي كأنه صدأ (800 جنيه أو 890 باللمض) عيبها الوحيد أن اللمض شكلها مميز، وبالتالي لو احترقوا صعب تلاقي زيهم ثاني.

للمحل فرع ثاني في شارع عمان في الدقي، وفيه كمية أكبر من قطع الأثاث، واللي ممكن ينفذوا لك أي قطعة تحبها سواء من صورة من عندك أو كتالوجاتهم، نعترف أننا مالناش في جو الديكور والإكسسوارات المنزلية، ولكن المحل ده مختلف عن المحلات الثانية وخصوصًا أن معروضاته ما شوفناهاش في مكان ثاني.