The Definitive Guide to Living in the Capital , Cairo , Egypt

مول دمياط للأثاث

مول دمياط: ليه تسافر دمياط لما ممكن تيجي لك بنفسها في شارع فيصل

تم التقييم بواسطة
Cairo 360
قيم
قيم الآن
مول دمياط: ليه تسافر دمياط لما ممكن تيجي لك بنفسها في شارع فيصل

ناس كثير بعد اللف والتعب بـ يقرروا يروحوا دمياط يشتروا الأثاث اللي هم عاوزينه، الخشب هناك حقيقي، مش MDF  وكلام خايب من ده، لكن فرحة الناس بدمياط، ومحلاتها الكثير والاختيارات الكبيرة، خلاهم يغفلوا حاجات مهمة جدًا، منها أن أي مكان في الدنيا مهما كان رائع له مشاكل، وبالتالي لو حد اشترى عفش من دمياط وكان فيه لأي سبب مشاكل، إمكانية مراجعة المحل بـ تكون صعبة جدًا، نظرًا للمسافة، لذلك مع “مول دمياط” في المريوطية بشارع فيصل.. دمياط، ومشاكلها، وخشبها الكويس، وحسناتها وعيوبها جاءوا لحد عندك.

روحنا مول دمياط 2 اللي في المريوطية أول ما فتح، لكن ما اتبسطناش أوي بالحاجات المعروضة، أسعاره كانت غالية مقارنة بالذوق والشكل المعروض، غيبنا فترة وفضولنا خلانا ندخله مرة ثانية، والمرة دي تفاجئنا، المول حسن من نفسه كثير، وكمان الأسعار بقيت معقولة، قدرنا نقارنها مع أسعار نفس الحجرات في دمياط، لأننا من فترة قدرنا نسافر وتقريبًا عجبتنا غرف لها نفس الجو والسمات، لاقينا الأسعار مش بعيدة أوي، طبعًا أغلى حاجة بسيطة بسبب النقل، لكن المجمل معقول فعلاً.

المول كبير، دور تحت الأرض ودورين فوق، المحلات كثير، محتاج علشان تلف عليها كلها بال رايق وأكثر من زيارة، لأن كثرة الغرف اللي هـ تشوفوها هـ تخلي دماغكم تلف، لذلك الموضوع محتاج لفة أولى تختاروا فيها المحلات اللي مناسبة ذوقكم، ولفة ثانية على المحلات اللي اختارتوها علشان تفاضلوا بين الحاجات اللي عجبتكم، والناس اللي محسوكة هـ يحتاجوا زيارة ثالثة علشان يشوفوا الحاجة اللي اختاروها بهدوء بعيد عن الزن والدوشة والانبهار، وتقدروا تأخذوا قرار نهائي.

فايدة الزيارات المتكررة كمان أنكم هـ تقدروا تشوفوا غرف جديدة ما كانتش موجودة، معظم المعارض الموجودة في المول بـ تبيع أكثر من أوضة في اليوم لذلك حركة التجديد بـ تكون مستمرة وده حصل معانا بالفعل، لما زورناه مرتين وراء بعض، اكتشفنا غرف جديدة في المكان عجبتنا جدًا.

أسعار الأوض هناك مناسبة لكل الأذواق، واللي ذوقه عالي ومحتاج جو معين هـ يحتاج تركيز أكثر ولفة أطول حبتين، المهم نيجي بقى للأسعار، الأسعار بـ تبدأ من 7 آلاف جنيه لغرف الأطفال والشباب لحد أكثر من كده، أما غرف النوم الكبيرة فممكن تبدأ من 11 ألف جنيه، لحد 35 ألف جنيه فيما فوق، وممكن تفاصلوا، لو شاطرين هـ تأخذوا الغرف بسعر كويس، لكن خلينا نقول لكم أن عندهم حاجات ظريفة جدًا.

كان لنا تجربة شراء أثاث من عندهم، جزء منها كويس، وجزء مش تمام، لكن المجمل لا بأس به، اختارنا محلين علشان نشتري من عندهم، المحل الأول اسمه “محمود ضنينة”، والثاني اسمه “ماديرا”، المول كله ماشي بنظام أن النقل والتركيب والمُلل على المشتري، اختارنا أوضة نوم، وسفرة، التعامل كان جاد جدًا، والمواعيد في التسليم مضبوطة، لكن المشكلة بـ تبدأ مع خروج الأوض للبيت.

التغليف بـ يكون ورق ووسيلة الربط خيط، طبعًا لما الغرف بـ تطلع البيت بـ تتجرح وده علشان التغليف ضعيف، المشكلة الثانية فيالعمال اللي بـ يطلعوا يركبوها، أنتم وحظكم، يا طلعوا كويسين، يا طلعوا مش تمام، كمان بـ يبعتوا بعد كدهأستورجي على حساب المحل نفسه يصلح الخدوش لو حصلت.

عن تجربتنا هـ نقول لكم إيه اللي حصل، للأسف تركيب غرفة النوم ما كانش محترف جدًا، وبالتالي بعد ما مشيوا اكتشفنا أننا هـ نضطر نستعين بنجار ثاني ييجي يعدلها أكثر لأن التركيب ما كانش مضبوط 100%، أما الأستورجي فجاء لكن مش بمعدات كافية تعالج كل الخدوش اللي حصلت، وده خلانا نطلب حد ثاني ييجي، وبرضه للأسف غاب فترة.

التجربة الثانية مرهقة شوية، مع غرفة السفرة، بعض أجزاءها عليه رخام، شكينا في أنه يكون مشروخ أو مكسور لأن شكل الرخام مكنش مريح، صاحب المحل أكد لنا أنها سليمة وعلى هذا الأساس قررنا نشتري السفرة لأنها عجبتنا، لكن المفاجأة كانت لما متخصص في مجال الرخام أكدلنا أن الرخام متجمع مش قطعة واحدة لذلك يبدو كأنه مشروخ، لكن ده طبيعي في حالة القطع الضخمة.

 الصدمة الثانية كانت في قلة الخدمة، وعدم توفير المحل لعمال كافيين يطلعوا الغرفة حتى لو على حسابنا، فوجئنا أنهم باعتين معانا شخص واحد يطلعها، وطبعًا الشخص ده  شال كل الكراسي بطريقة غلط جدًا، وأدت لكسر وشرخ بعضهم، غير الزجاج اللي اتكسر، طبعًا حملنا المحل المسئولية، وطلبنا منهم تغيير الكراسي اللي كان واضح أنها ضعيفة جدًا، وممكن تتكسر من أقل حاجة، وكمان الزجاج، وبالفعل بعد زيارات كثير، المحل وفى بوعده وغير الزجاج مرتين، وغير الكراسي تمامًا، وتكلفوا بفلوس النقل والتركيب.

خلينا ما ننكرش أن الخشب كويس وأن السعر كويس، والمشاكل بتاعة المول في مجملها لها علاقة بالعمال، والتركيبات، لذلك لو عاوزين خشب كويس، وشكل كويس، ومنتجات جاية من دمياط رأسًا لكم توفر عليكم السفر، عليكم وعلى مول دمياط لكن قبل ما تشتروا فكروا كويس في مسألة التركيب والنقل والتطليع لأنها أهم حاجة وممكن تضيع فرحتكم بالحاجة اللي جبتوها.

نصيحة 360

خذوا معاكم نجار موثوق وحضروا عمال ثقة ينقلوا ووفروا على نفسكم وجع القلب.

أحسن حاجة

الخشب وبعض الأذواق والأسعار معقولة.

أسوأ حاجة

الخدمة والنقل والتفاصيل اللي لها علاقة بالتركيب والتطليع.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح