The Definitive Guide to Living in the Capital , Cairo , Egypt

هاوس أوف فابريكس

هاوس أوف فابريكس: تشكيلة أقمشة متنوعة فى الزمالك

تم التقييم بواسطة
Jessica Noble
قيم
قيم الآن
هاوس أوف فابريكس: تشكيلة أقمشة متنوعة فى الزمالك
فى رحلة بحثنا عن أقمشة أنيقة، قررنا نروح على هاوس أوف فابريكس فى الزمالك. شباك العرض العتيق، واللوحات الكلاسيكية والإضاءة المعتمة الغريبة بـ يعكسوا ذوق كلاسيكى. نزلنا السلالم وبعدين دخلنا لمملكة من الأقمشة الجميلة.

بـ يستغلوا كل شبر من المحل –من الأرض للسقف- علشان يعرضوا منتجاتهم، وبـ يعرضوا عينات من الأقمشة باستخدام رولات ثقيلة، وشماعات وكتالوجات. وعلشان عندهم أقمشة كثير، وغالبًا بـ يتشابكوا مع بعض ومافيش لهم طريقة عرض واضحة، المحل ده كانت كمية المعروضات فيه كثيرة قوي وكمان حسينا أنه خانق لحدٍ ما.

فهمنا على طول أن القماش بـ يُباع بالمتر، ماعدا  ترابيزة عليها بواقى قماش مطوي عليها تخفيض، فى وقت زيارتنا كان عندهم 4.5 متر من قماش الجينز بـ 100 جنيه بس.
هاوس أوف فابريكس كمان بـ يعيد تنجيد العفش وبـ يقيس مقاسات الشبابيك علشان تركيب الستائر القماش أو الخشب بتكلفة إضافية.
أول حائط عليه أقمشة شد انتباهنا كان مكون من رولات ملفوف عليها جلد أسبانى طبيعي وغامق، أما الجلد الصناعي فكان لونه بنى غامق بنقشة جلد التمساح أو جلد الثعبان، سعر المتر منهم كان 250 جنيه. مجموعة كبيرة من الأقمشة الغنية بألوان مشتقة من الأصفر والأحمر؛ قماش فخم قطيفة لونه أحمر داكن هـ يكلفك 290 جنيه للمتر، فى حين أن شكل ثانى بتصميم جامد فيه ورود باللون الأحمر والأسود سعر المتر منه 430 جنيه.
بـ يوفروا كمان طلبات الناس اللى بـ تفضل الألوان الهادئة بعدد كبير من الأقمشة بألوان فاتحة زى اللون العاجى، والبيج، والكريمى والذهبى. قماش سميك لونه كريمى مزين بورد أبيض كبير سعره 290 جنيه للمتر وكمان خامة معتمة لونها أبيض سادة سعر المتر منها 100 جنيه.

شوفنا كمان ستائر قماش جميلة، فيها تقليمة خفيفة معلقة على الشباك (180 جنيه للمتر). الخامة دى كانت معروضة فى واحد من كتالوجاتهم المتعددة ولازم تعمل لها طلب مخصوص. الموظفة رغم كده فهمتنا أن علشان التصميم ده بـ يُصنع محليًا من بريستيج ديزاينز بـ يحتاج ثلاثة أيام بس علشان يوصل، بعض الأقمشة ممكن تُطلب من الخارج وبـ تحتاج حوالى ثلاثة أسابيع علشان توصل.

تشكيلة ثانية كبيرة من المنسوجات، وأقمشة الساتان، وحرير وخامات شفافة بألوان كثير. لسوء الحظ هاوس أوف فابريكس ما عندوش ألوان زاهية أو غريبة، وما شوفناش أقمشة مطبوع عليها ستايل الألوان النيون أو رسوم حيوانات. أحبطنا كمان لما عرفنا أن مافيش مستلزمات الترتر، والخرز أو أربطة زى الأزرار والسوست. على الرغم من كده بـ يبيعوا بلتكانات لتعليق ستائر مزخرفة وعادية، شوية منهم ماشيين مع الموضة وشوية كلاسيكيين.

هاوس أوف فابريكس مكان كويس تبدأ به لو كنت بـ تدور على مجموعة من الأقمشة عالية الجودة، سواء كانت مطرقعة أو عادية، طبعًا ده لو ما عندكش مانع تدور وسط جبال من الخامات علشان تلاقى طلبك.

نصيحة 360

اختيار الأقمشة بنفسك للستائر أو الملابس معناه أنك تضمن تخلق حاجة فريدة، وكمان عادة معناه تكلفة أقل من شراء الجاهز.

أحسن حاجة

مجموعة الخامات المتنوعة، سواء اللى موجودة عندهم فعلاً أو اللى تقدر تطلبها.

أسوأ حاجة

المحل محتاج أقمشة موضتها حديثة، إلا لو كانت موجودة فعلاً بس مستخبية تحت باقى الأقمشة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح