The Definitive Guide to Living in the Capital , Cairo , Egypt

هدية – Hedeya

هدية: مستلزماتك أنت وطفلك من أول يوم أمومة في الدقي

تم التقييم بواسطة
Angie El Batrawy
قيم
قيم الآن
هدية: مستلزماتك أنت وطفلك من أول يوم أمومة في الدقي

يوم ما أي بنت تعرف أنها حامل أكيد مش هـ يُنسى طول
حياتها، وأكيد كمان يوم الولادة نفسه بـ يكون تاريخي لأنها لحظة جميلة بـ تتوج
فترة تعب وانتظار كبيرة، وإحنا متأكدين أن أي أم عمرها ما هـ تنسى محل «هدية – Hedeya» لما تكون
محتاجة تجيب كل احتياجاتها أو احتياجات طفلها من أول يوم أمومة.

بلونه البمبي وإضاءته الجامدة في شارع نادي
الصيد هـ تلاقي محل “هدية” المكون من دورين ملحوظ
قوي وأنت ماشى، هـ تركن بسهولة أمامه وتدخل هـ تلاقي ديكور مبتكر جدًا، أعمدة المحل
عبارة عن قطع ميكانو كبيرة، كل عمود له لون مختلف، وكمان فيه طريق جنب مطلع السلم
على شكل شارع مخطط ومرصوف، وفيه شاشات تليفزيون في أماكن كثيرة خاصة أول ما تدخل
على الشمال فيها إعلانات للألعاب الموجودة وطريقة استخدامها، وعامة ألوان الحوائط
في المحل هـ تحسسك كأنك دخلت لعبة بلاستيك كبيرة.

المحل بدايته كانت في مستشفى الندى للولادة في المنيل،
ولكن صاحبة المحل “نانسي علي” قررت أنها تكبره علشان يستفيد منه أكبر
قدر من الأمهات والأطفال، عمر المحل لسه شهر والافتتاح الرسمي هـ يكون قريب، الدور
اللي تحت للأطفال أكبر من 3 سنوات فيه عجل وسكوترات وبيوت كبيرة وألواح تزحلق وفيه
قسم بلاي ستيشن للأطفال على شكل شخصيات من ديزني إلى جانب استاند فيه بلاي ستيشن وWii للكبار قريب من الكاشير،
أما الدور العلوي فمن سن شهور لحد 3 سنوات فيه سراير وعربيات وكراسي أكل الأطفال
والحمالة اللي بـ تشيله ومشاية وكاريكوت والبيبرونات والعضاضات البلاستيك
والشخليلة، وألعاب بمزيكا وأنوار وألعاب ذكاء حاطين فيها بطاريات وشغالة علشان
تجربها بنفسك.  

المنتجات هناك متنوعة وكثيرة جدًا من أكثر من أربعين ماركة
عالمية زي:
Chicco, Gracco, Littletikes, Bebe confort, Quinny, Evenflo, K’s Kids, Winfun
وغيرها، مستلزمات الأم كميتها أقل بكثير من الطفل زي
حاجات مخصوص تساعدها في الرضاعة زي شفاطة الحليب والكريمات وحزام البطن لبعد
الولادة وغيرها، وكمان الجزء المخصص لملابس الأطفال صغير، فريق العمل هناك في
المحل متعاونين جدًا وذوق في التعامل وبـ يجاوبوا على كل التساؤلات وبـ يلبوا
احتياجاتك، الأسعار هناك متفاوتة، فيه حاجات أسعارها معقولة، وفيه غالية جدًا، لكن
يمكن علشان فيه منها ماركات عالمية، لكن عامة نوع المنتجات مختلف وله أكثر من
استخدام، وهـ تلاقي مستلزمات وألعاب عمرك ما شفتها في محل أطفال قبل كده.

أحلى حاجة هناك أنهم بـ يعملوا Shower
list لأصحاب وقرايب الأم والأب اللي عايزين يهادوا المولود الجديد، بـ
يروح الأم والأب للمحل وبـ يحددوا الحاجات اللي محتاجينها كهدايا لطفلهم وبـ
يكتبها المحل في قائمة، وبعدها يبلغوا أصحابهم وقرايبهم أنهم عاملين List في “هدية”، وكل لما حد
بـ يختار حاجة يشتريها (على حسب ميزانيته) بـ يحطوا ستيكرز ملون مدور باسم الأم أو
الطفل أو الأب على حسب الاسم المحجوز به تبين أنها مباعة علشان ما حدش يجيب هدية
مكررة، والأجمل أنك كأم بـ تحصلي على هدايا مجانية من المحل بقيمة 5% من إجمالي
الهدايا المشتراة.

“هدية” عندهم خدمة توصيل للمنازل بشرط أن الطلب
ما يقلش عن 150 جنيه وبـ تدفعي لما ييجي لك البيت، وتكلفة التوصيل تبدأ من 10 جنيه
بناءً على عنوان المكان لأنهم بـ يوصلوا داخل القاهرة وجميع المحافظات، رقم
التوصيل مكتوب على الكتالوج اللي لازم لما تروحي هناك تأخذيه، دليل شامل ضخم جدًا
(قطع صغير) مش بس فيه المنتجات اللي بـ يقدموها وأسعارها ده فيه كمان موضوعات تفيد
الأم في بداية حملها وولادتها، صدر منه خمسة أعداد لحد دلوقت ومقسم لأربعة أقسام: أول
واحد للمولود الجديد لحد سن 12 شهر (وده أكبر قسم) فيه نصائح وموضوعات عن الرضاعة
الطبيعية ومواعيد التطعيم المفروض تعطيها لطفلك وإزاي تهتمي بصحته، والثاني من سن
1: 3 سنين، الثالث ما قبل مرحلة المدرسة من 3: 5 سنوات، وقسم رابع فيه نماذج
لألعاب الذكاء اللي بـ تبني شخصية الطفل (5 سنوات فيما فوق).

كمان المحل بـ يقدم خدمة التقسيط لمدة تتراوح من خمسة إلى
عشرة شهور وبحد أقصى للمشتروات 10000 جنيه، وخدمة تنظيم أعياد الميلاد والسبوع
بالكامل إلى جانب تزيين الغرف بالمستشفيات أثناء أو بعد الولادة.

نصيحة 360

عندهم عرض حاليًا لما تشتري من منتجات Chicco بقيمة 1000 جنيه هـ تحصلي على هدايا قيمة.

أحسن حاجة

المكان شامل لمعظم مستلزمات الطفل.  

أسوأ حاجة

الأسعار الغالية جدًا لبعض المنتجات.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح