The Definitive Guide to Living in the Capital , Cairo , Egypt

آخر النهار

آخر النهار: مش كل طيب لازم يبقى شرس فى الليل وآخره

  • إخباري
  • من الآن
  • أحمد جمعة
تم التقييم بواسطة
Ahmed Abd El Gawad
قيم
قيم الآن
آخر النهار: مش كل طيب لازم يبقى شرس فى الليل وآخره

الليل وآخره:

مش عارفين ليه بـ يفكرنا البرنامج ده بمسلسل “الليل وآخره”، يا ترى فاكرينه؟.. مجموعة من الأخوة كل واحد فيهم له توجه وكل واحد فيهم له تخصص ساعات بـ يتخانقوا (وده مش موضوعنا) لكنهم فى الآخر بـ يحاولوا (وركزوا على بـ يحاولوا) يعملوا للصالح العام (صالح الأسرة فى حالة المسلسل) وصالح مصر فى حالة البرنامج.

 

البرنامج:

نقول لكم.. سيبكم من “الليل وآخره”.. خلينا فى آخر النهار، يعنى بالليل برضه (هى كل حاجة بـ تودينا لليل ولا إيه)، المهم البرنامج بـ يقدمه ثلاثة مذيعين خبرة وكل واحد فى مجاله والبرنامج بـ يستعرض الأحداث الجارية السياسية والاجتماعية كل يوم، وبـ يستضيف نخبة من أبرز  الشخصيات العامة فى كل المجالات، وللصراحة هو بـ يعمل تغطية شاملة للأحداث.. وبـ يتابعها لحظة بلحظة.. يعنى من الآخر بـ يهتم بكل ما يتعلق بالشارع المصرى والمواطن.. وبـ يحاول يتعامل مع الأخبار بطريقة موضوعية من غير مزايدات والبرنامج مالوش أى انتماءات، وهدفه زيادة الوعى عند الشارع المصرى.. هنا لازم نقف ونتعرف على مذيعى آخر النهار.

 

الطيب:

محمود سعد هو اللى واخد شخصية الطيب فى البرنامج وخبرته فى المقام الأول “تليفزيونية”، يعنى اشتغل فى التليفزيون المصرى وكان من أوائل الناس اللى عملت “توك شو” على التليفزيون المصرى الرسمى وكان الناس بـ ينتظروه، وده حقق له شهرة كبيرة فى حياته المهنية والانطباع الأول لازم يخليك تقول أنه طيب.. يعنى غضبته الكبيرة كانت على التليفزيون المصرى “وقت الثورة” ورفضه أنه يطلع يقول اللى السلطة عاوزاه ساعتها وده رفع أسهمه لدرجة كبيرة، حاجة كده زى “كلنا محمود سعد”.

 

الشرس:

وهو عادل حمودة شخصية كاتب عتيق بالفعل من أيام زمان، “حمودة” معروف ككاتب من أيام عبد الناصر ومعروف بقضاياه الشائكة وقدرته على الحوار وهجومه السريع وكان له سجالات مع عمنا “أحمد فؤاد نجم” رحمه الله لدرجة أنه كتب كتاب عن ذكرياته معاه (ابقوا اقرأوا الكتاب).

 

ما ينفعش نقول قبيح:

ولأننا واخدين “تيمة الفيلم” الطيب والشرس والقبيح فما ينفعش نقول على الثالث “قبيح” لأنه بالفعل مش كده هو واخد من الشخصيتين اللى فاتوا يعنى ساعات طيب وساعات شرس هو “خالد صلاح” رئيس تحرير اليوم السابع واللى خبرته الأساسية فى الصحافة.. ومنها انطلق لعالم الميديا علشان يطبق خبراته الصحفية فى “توك شو”.

 

الثلاثة:

ما بين الليل وآخره والطيب والشرس.. بـ يدور برنامج آخر النهار واللى بـ يكسب قوته من تعدد مقدميه وخبراتهم المختلفة وطريقتهم اللى بـ تعبر عن شخصية كل واحد فيهم ومرجعية كل واحد فيهم، وفى النهاية مش كل طيب لازم يبقى شرس فى الليل وآخره.

عجبك ؟ جرب

برنامج "صباح البلد" على قناة صدى البلد.

نصيحة 360

يعرض على قناة النهار، كل يوم 9 مساءً ويعاد كل يوم 9 صباحًا من تقديم محمود سعد، خالد صلاح، عادل حمودة، ومن إخراج أحمد جمعة.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح