The Definitive Guide to Living in the Capital , Cairo , Egypt

أبلة فاهيتا.. Live من الدوبليكس

أبلة فاهيتا: Live من الدوبليكس على قناة cbc

  • تقديم: أبلة فاهيتا
  • كوميدي
  • من الآن
  • مريم أبو عوفمريم أبو عوف...
تم التقييم بواسطة
Rasha Zeidan
قيم
قيم الآن
أبلة فاهيتا: Live من الدوبليكس على قناة cbc

الإعلان:

"ماما توتو ما تكلميهاش دلوقت طقم سنانها اتجمد دلوقت ومش هـ تفهميها.. هاه لاقيتيها، طب فتشتى الطقم البيج.. عضعضتى ياقته.. كركورة بـ تدور على شريحة المرحوم مش لاقياها… وكلمت الشيخ الألوسى علشان يطلع لى فى المنام".

فاكرين إعلان المرحوم والجدل اللى طلع على أبلة فاهيتا والضحك اللى سمعناه من موضوع أن الإعلان ده شفرة وحاجات كده.. ده كان أول الغيث عند فاهيتا.

 

باسم:

مع باسم يوسف ظهرت أبلة فاهيتا فى مداخلات تليفونية أكثر من مرة وكانت بـ تجيب ضحك هستيرى من الجمهور وده خلى أبلة فاهيتا تنتشر أكثر.

 

ما يستاهلوشي:

بعد كده ظهرت فاهيتا مع النجم "عزيز الشافعى" فى أغنية مشتركة عملت مشاهدات خرافية على اليوتيوب وكانت بعنوان "ما يستاهلوشى".

 

دليل الاستعمال:

أول حاجة هـ تقابل حضرتك وأنت معانا فى برنامج "أبلة فاهيتا" هى المقدمة اللى كاتبينها أول ما تفتح الفيديو على اليوتيوب علشان تشوفه وفيه:

"دليل الاستعمال: هذا الدوبليكس صالح لاستخدام البالغين من الجنسين فقط، وغير مسؤول عن سوء التفسير أو الاقتباس، يشاهد بعيدًا عن متناول الأطفال".

اللى عاجبنا فى الموضوع أنهم صريحين يعنى عارفين أن البرنامج غير صالح للأطفال وقالوا كده من الأول.. والدوبليكس هو مكان من طابقين ومعناه المترجم من الإنجليزية قائم على فكرة "المزدوج"، وعمومًا صباح الازدواجية فى البرنامج لأنه قائم على عروسة بـ تشد الأطفال والكبار والبرنامج للكبار بس صراحة.

 

للكبار فقط:

الحلقة الأولى للبرنامج فيها خط سيره كله.. واتعمل له "شوو" كبير صراحة وإعلانات فى كل مكان وده طبعًا راجع لشهرة أبلة فاهيتا.. وكمان كان ضيف شرف الحلقة الأولى وحاضرين التصوير الفنان المعروف جورج كلونى.. والمخرجة الشابة مروة أبو عوف.. البرنامج قائم على فكرة الضحك والطريقة المميزة جدًا اللى بـ تتكلم بها أبلة فاهيتا واستخدامها لمصطلحات خاصة بها هى بس مش حد ثانى.. وده اللى خلاها اشتهرت بسرعة وخلى الناس تركز معاها.. لأن الناس بـ تدور على كل جديد.. لكن المشكلة أن البرنامج خرج من فكرة الإعلام وتوصيل وعى ومعرفة للناس أو حتى التفريج عنهم لفكرة ثانية خالص.. فكرة الخروج عن السياق العام وأعراف المجتمع.. يعنى مثلًا بـ تتكلم عادى عن دورات المياه واللى بـ يعمله الرجال فيها، بـ تقول:

"الرجالة لما تخش الحمام تشيل "القرصة" مش ناقصة طرطشة.. وراحت جايبة فيديو لرجل فى دورة المياة.. وبعدين قررت تتكلم عن خبر عجيب بـ يقول.. أن متابعة الأخبار السياسية بـ تضعف نسبة الخصوبة عند الرجال".. كل ده خلى الناس تنتقد البرنامج مع أنها بـ تحب الشخصية.. واللى زود الانتقاد كمان هو الإعلان اللى ظهرت فيه العروسة "أبلة فاهيتا" فى مشهد شبه إباحى وهى على السرير وفيه رجلين شبه عاريين.

فى حين أن أبلة فاهيتا عندها قدرة عالية على استخراج الضحك من قلب المشاهدين زى ما اتكلمت مثلًا عن فكرة الحسد وقالت "الستات مش عاوزة حسد.. الشيخ الألوسى عامل لى حجاب يفلقك نصين ويجيبك تحت المسرح".

المهم البرنامج إنتاجه ضخم وفكرته حلوة لكنه تعدى الحدود واتهاجم كثير خاصة مع أسئلة الضيوف الصريحة جدًا.. ونسيب لكم الحكم.

عجبك ؟ جرب

برنامج "ليلة سمر".

نصيحة 360

برنامج "أبلة فاهيتا.. Live من الدوبليكس" على قناة cbc ، يعرض الجمعة الساعة 9 مساءً، ومن إخراج مريم أبو عوف.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح