The Definitive Guide to Living in the Capital , Cairo , Egypt

تليفزيون
أرض الصالحين

أرض الصالحين: وثائقي متميز على قناة اقرأ

  • عبد الغني المالكي
  • إنتاج مستقل
  • من الآن
  • هشام عيد
تم التقييم بواسطة
Rasha Zeidan
قيم
قيم الآن
أرض الصالحين: وثائقي متميز على قناة اقرأ

هي الأرض اللي اتولد فيها بعض أنبياء ورسل الله، موسى وهارون ويوشع بن نون عليهم السلام وغيرهم، أرض عاش عليها، أو مر على تربتها كتير منهم، زي إبراهيم الخليل وإسماعيل وإدريس ويعقوب ويوسف وعيسى عليهم السلام وغيرهم.

هي الأرض اللي ربنا ذكرها في القرآن الكريم تصريحًا وتلمحيًا في ٢٨ آية، وأوصى بيها النبي الكريم صلى الله عليه وسلم، وأوصى بأهلها خيرًا، أرض اتعرفت عاصمتها بأنها صاحبة الألف مادنة، هي مصر.

مصر مش مجرد بلد عادي، أو مكان صغير على الخريطة، مصر هي حصاد آلاف الأعوام من الحضارة، والعلم والعمارة، والمعرفة في كل مجالات الحياة، وعلشان كده قررت قناة اقرأ إنها تعمل برنامج وثائقي عن مساجدها والعمارة الإسلامية اللي فيها، وسمت البرنامج “أرض الصالحين”.

 

 

برنامج أرض الصالحين بيحكي عن كل مساجد مصر، وتاريخها وتاريخ صاحب المسجد، في تداخل بين التاريخ والعمارة الآثار، والبرنامج عبارة عن تلات خطوط رئيسية بيتداخلوا مع بعض، الخط الأول هو التعليق الصوتي،  وده نقدر نعتبره ميزان البرنامج وفيه بيتم سرد حكاية اللي بنى الجامع، وحكاية الجامع نفسه وتاريخه، وكمان الفترة التاريخية في الوقت ده كان شكلها إيه.

 أما الخط التاني فهو مقدم البرنامج، وهو المذيع عبد الغني المالكي، واللي بيقوم بعمل النقلات في البرنامج، ما بين الضيوف والتعليق الصوتي، أما الخط التالت فهو الضيوف، وهم مجموعة من خبراء الآثار والعمارة والتاريخ، بيتكلموا عن الجامع أو عن الشخصية اللي بنت الجامع، وأسرارها، وبيعرفوا الناس إزاي يتفرجوا على الأثر.

يمكن اللي شدنا في البرنامج ده، إنه مش برنامج وثائقي  ممل، يعني مش مجرد كلام جاي من كتب، وبيتقال وخلاص، لكنه مكتوب حلو، ولغته قوية، وفيه سيناريو معمول بشكل جيد، وفيه حالة من التوافق بين الخطوط التلاتة اللي في البرنامج.

تصوير البرنامج هايل، وواخد كادرات كتير لك أثر، ومن مناطق مختلفة، ومشاهد دايرة حوالين المكان، لكن لو دخل فيه بعض تأثيرات الجرافيك ورسومات ثلاثية الأبعاد لمراحل البناء، مثلًا كان هايبقى أحسن كتير.

 

 

المونتاج الخاص بالبرنامج هو البطل مع الإخراج، وتقريبًا كده الأتنين بيقعدوا مع بعض يعملوا المونتاج مع بعض، لإن اختيار الوقت اللي يقطع فيه على التعليق الصوتي، مع صورة عامة للجامع، ودخول ضيف من الضيوف، والقطع عليه في منطقة محددة، علشان يجي المذيع يكملها، وكل ده بصورة بتعبر عن اللي بيتقال، يبقى إحنا قدام موضوع معمول بشكل مهني.

ولإن الحلو مايكملش، فعندنا برضه ملاحظات على البرنامج، أهمها إن البرنامج ساعات بيتكلم عن عن جامع لكن تصوير الضيوف بيكون في جامع تاني، وإحنا فاهمين، إن ده علشان العين ماتحسش بملل، لكن بما إنك برنامج وثائقي، يبقى لازم تركز على المكان اللي بتتكلم عنه، وكمان فكرة الترتيب التاريخي، اللي مش موجود، يعني ممكن يبدأ بجامع في عصر متأخر، وبعدين يرجع لأول جامع اتبنى في مصر، وبعدين يجيب جامع في عصر وسط، لو كان فيه ترتيب تاريخي كان هيبقى البرنامج أقوى بكتير جدًا، عمومًا استمتعوا بوثائقي مختلف وقولولنا رأيكم.

عجبك ؟ جرب

محمد رسول الله على قناة اقرأ

نصيحة 360

برنامج أرض الصالحين، تقديم عبد الغني المالكي، وإخراج هشام عيد، يعرض على قناة اقرأ، من الثلاثاء إلى السبت في الساعة 4:15 عصرًا

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح