The Definitive Guide to Living in the Capital , Cairo , Egypt

مسلسل أزمة نسب

أزمة نسب: مسلسل بيعاني من أزمة دراما!

  • دراما
  • من الآن
تم التقييم بواسطة
Mohamed Hamdy
قيم
قيم الآن
أزمة نسب: مسلسل بيعاني من أزمة دراما!

مسلسل "أزمة نسب" من المسلسلات اللي أثارت ضجة كبيرة في رمضان 2016، بداية من اسم المسلسل اللي اتغير بعد الحكم في قضية النسب الشهيرة بين أحمد عز وبطلة المسلسل زينة، الأمر اللي خلى ناس كتير تقول إن تغيير الاسم تم لاستغلال الحكم في القضية بتاعة زينة لإيهام المشاهدين أن المسلسل بيحكي عن قضية أزمة النسب الشهيرة.. لكن مش دايمًا المسلسل اللي بيثير جدل كبير بيكون هو المسلسل الأفضل.. مسلسل "أزمة نسب" خير مثال على كلامنا ده.

من إخراج سعيد حامد، وبطولة زينة، ومحمود عبد المغني، وراندا البحيري، وفريال يوسف، ومن تأليف محمد صلاح العزب، بنشوف قصة بنت فقيرة عايشة في حي شعبي وأمها بتشتغل في مجال الدجل والشعوذة، وبتحاول توهم رجال الأعمال إنها تقدر تعرف إيه الأفضل بالنسبة لمشاريعهم وحياتهم الشخصية والمالية.. بعد كده بنعرف أن زينة متجوزة ابن واحد من أشهر رجال الأعمال، واللي محمود عبد المغني بيشتغل سائق في الفيلا بتاعتهم، وفي نفس الوقت والدة زينة بتعمل شغل دجل وشعوذة على المليونير اللي مش عارف حقيقة اللي بيحصل من ورا  ضهره، ثم بتتعقد الأمور لما بينكشف أمر الجواز وبيدخل كل أبطال المسلسل في دوامات متتالية من الصراع، خاصة مع محاولات "إبليس" أو محمود عبد المغني أنه يحقق  أي نفع بأي طريقة ممكنة من ورا التعقيدات دي.

حاجات كتير في المسلسل كانت غير منطقية بالمرة، بداية من اسم "إبليس" اللي لزق في محمود عبدالمغني وسبب التسمية اللي حاول المسلسل تبريرها بأسلوب غير منطقي أو مفهوم للمشاهد، ولو كان أهل الحارة سهل عليهم يستعملوا اسم إبليس مع محمود عبد المغني، إيه يدفع أهل الفيلات والقصور اللي بيشتغل معاهم أنهم ينادوه بنفس الإسم؟ الموضوع ده ممكن ناخده مقياس لأحداث كتير بتحصل في المسلسل بدون تبرير أحيانًا أو بمبرر يصعب فهمه والتعامل معاه أحيانًا أخرى، وبشكل عام حسينا أنه تمت كتابة المسلسل باستسهال واستعجال علشان يلحق العرض في سباق رمضان.

الموسيقي التصويرية كانت غير مؤثرة في المسلسل.. لا لون ولا طعم ولا رائحة.. وللأسف حسينا أن وجودها كان زي عدمه وده -في رأينا- من أكبر العوامل اللي بتعرفنا أن اللي عمل الموسيقى التصويرية للمسلسل ماعملهاش "بمزاج" وإنها كانت معمولة بس علشان يكون للمسلسل موسيقى والسلام.

الأداء التمثيلي لمعظم الأبطال كان نمطي، أداء زينة كان مبالغ فيه جدًا، وأداء محمود عبد المغني كان مايفرقش كتير عن أداؤه في باقي الأفلام اللي قدمها قبل كده.. كل العوامل دي بتشير لفشل إخراجي ذريع في تقديم أي جديد أو إخراج أي شخصية من الأبطال من شخصيته الأصلية وإعادة تقديمه من جديد فى دور مختلف للمشاهدين.

عجبك ؟ جرب

مسلسل: الخروج

نصيحة 360

المسلسل بيتعرض على أون تي فى 8 ص، إيه آر تي حكايات 9 ص 

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح