The Definitive Guide to Living in the Capital , Cairo , Egypt

كل يوم جمعة الساعة 7 مساء بالظبط، افتح تليفزيونك على قناة القاهرة والناس، واتفرج على برنامج الجدعان، اسمه باين مش محتاج تفاصيل، بيحكي عن الجدعان في الصناعات المختلفة، زي الزراعة والأسماك والدواجن واللحوم، والصناعات الغذائية، وبيتكلم عن قصص حقيقية، عن ناس عمروا ونجحوا، عن ناس عملت مشروعات حقيقية وطوروا من نفسهم.

ويمكن من أكتر قصص النجاح المختلفة اللي جابها برنامج الجدعان، هي قصة ناس عملوا أكبر مكان لتدوير مخلفات القمامة، في 15 مايو، وبيدوروا مخلفات كتيرة جدًا بتوصل تقريبًا لتلت اللي بتنتجه القاهرة من مخلفات، وبيحولوه لوقود صلب.

ومن المواقف الإنسانية المهمة في البرنامج لما المذيع محمد غانم قابل خلال استعراضه لمشروع 15 مايو لتدوير المخلفات فتاة اسمها “نجاة” بتشتغل في جمع القمامة في 9 شوارع في محافظة القاهرة، علشان توفر حياة كريمة لأطفالها المتفوقين علميًا.

البرنامج بيحاول يوصل رسالة أن النجاح ممكن جدًا رغم كل المشاكل والصعوبات اللي بتقابلنا في مصر، وبيحاول يكون نقطة نور لكل الناس المكتئبة في بلدنا.

لازم نقول إنه لأول مرة من فترة طويلة بنشوف برنامج بيديك طاقة إيجابية قوية، ونظرة أمل على الحياة، برنامج صعب تزهق وأنت بتتفرج عليه، مع إنه بعيد تمامًا عن سيل برامج الغناء والمواهب واستضافة الفنانين، إلا إنه قدر في وقت بسيط يحقق نسب مشاهدة معقولة، وينتشر وسط الناس.

برنامج الجدعان بيستضيف فنانيين من منطقة تانية، هو برنامج بيدور على الجدعان اللي موجودين في الزراعة أو التجارة وبيشوف الإيجابية فين، ويركز عليه، لكن الجميل برضه، إنه لو لقى في موضوع الحلقة أي حاجة سلبية بيعرضها ويركز على المشكلة، ويحاول يلاقي حل.

التصوير جيد، بيركز على الكادرات الواسعة، وفي المقابلات بيركز على وش الضيف أكتر من أي حاجة تانية، يمكن علشان ينقل انفعالاته، خاصة وإن البرنامج بيركز على فكرة قصص النجاح واللحظات الصعبة اللي مرت على صاحب القصة والعقبات وإزاي قدر يعديها.

المخرج بقى ما بيكتفيش بس بعرض البرنامج على الشاشة، هو شاطر وشطارته إنه بيحسسك وأنت بتتفرج على البرنامج إنك بتتفرج على فيلم قصير، الكادرات السريعة، وطريقة كلام الضيوف الحماسية في أوقات والدرامية في أوقات تانية، وطبعًا مننساش الرواي الجميل والمعد ومقدم البرنامج محمد غانم، وكمان الموسيقى الحماسية اللي عاملة جو مختلف للحلقة كلها.