The Definitive Guide to Living in the Capital , Cairo , Egypt

قناة »سي بي سي – cbc»
قناة فضائية جديدة بدأت بثها فى رمضان السنة دى وقامت بشراء معظم المسلسلات
والبرامج الجيدة واللافتة لنظر المشاهد، كمان انتجت برامج جديدة ومتنوعة منها
برنامج «الستات ما يعرفوش يكذبوا» اللى بـ يعرض كل يوم الساعة واحدة ونصف ظهرًا وبـ
يُعاد بعدها بساعتين على قناة “سى بى سى 2”.

البرنامج تقديم المذيعة مفيدة شيحة والفنانة منى عبد
الغني والمحامية والكاتبة أميرة بهي الدين واللي عاملين مع بعض توليفة نسائية
كاملة توعد ببرنامج مرأة ناجح ومتميز، الحلقة مقسمة إلى فقرات وبـ يستضيفوا خبراء
فى التغذية واللياقة ودعاة دين وضيوف من كل المجالات مثل الدكتور محمد منيس أستاذ
الجهاز الهضمى والكبد والدكتور دولسن صالح أستاذ التغذية للمعهد القومى للسرطان،
ده غير فقرة الطبخ اللي بـ يقدمها الشيف “محمود” المشهور بوصفاته وأسلوبه
فى شرح الوصفات، كل حلقة بـ يقدموا وصفة للأفطار ووصفة ثانية للسحور وبـ يقفوا
جنبه فى المطبخ وبـ يسألوه عن كل التفاصيل أثناء الطبخ.

منى عبد الغني تعتبر في البرنامج مثال للمرأة الهادئة
المسلمة الرزينة، أما مفيدة شيحة فهي المرأة العملية الشقية، أما أميرة بهي الدين
فهي المدافعة عن حقوق المرأة والمهتمة بالثقافة والأدب، واختلاف شخصياتهم أعطى البرنامج
نكهة لذيذة ومختلفة وخاصة لما بـ يتناقشوا ويختلفوا حول قضية أو مشكلة تخص المجتمع،
وقتها بـ تظهر وجهات نظر جديدة ومن مختلف الزوايا.

من الموضوعات اللى تم طرحها فى البرنامج أثر الصيام على أداء
الإنسان فى العمل وحقوق وواجبات الزوج والزوجة والتوعية السياسية للمرأة.

ألطف حاجة فى البرنامج هى اشتراك الثلاث سيدات فى
التقديم وأنهم مش بـ يتبعوا المدرسة التقليدية فى التقديم بل بالعكس بـ يتعاملوا
مع بعض كأنهم وراء الكاميرا وبـ يتكلموا بمنتهى التلقائية وعدم التكلف.