The Definitive Guide to Living in the Capital , Cairo , Egypt

أنك تحاول تعمل مسلسل بـ يتكلم عن الفانتازيا حاجة، وأنك تعمل حاجة فانتازيا فعلًا حاجة تانية خالص… أنك تعمل حاجة خيالية أو مثيرة للخيال حاجة، وأنك تعمل حاجة موازية للخيال حاجة تانية خالص… العهد تلات كفور (جمع كفر) بـ يتصارعوا على الحكم والسلطة بثلاث مقامات.

المقام الأول كفر القلعة:

باين من اسمه أنه كفر مختلف وأنه كفر بـ يحاول يسيطر على اللى حوله، والقلعة في رمزيتها دايمًا بـ تدل على السلطة والحكم وعلى القوة والمحافظة على المال اللى بـ يشتري أي شيء.. المهم الكفر ده لو حبينا ننزله على واقعنا نقدر بسهولة نقول أنه بـ يمثل كل حاجة بـ تخص النظام اللى بـ يمتلك السلطة.

المقام الثاني كفر نطاط الحيط:

ومن اسمه برضه ممكن نفهم أنه الكفر اللى بـ يمثل المتسلقين في المجتمع والناس اللى عايشة على الهامش لكنها عاوزة توصل للسلطة بأي طريقة، الناس اللى عاوزة السلطة والمال بالرشاوي أو الطرق الملتوية، الناس اللى شبه نطاط الحيط.

المقام الثالث كفر النسوان:

سيبك من الاسم، فكفر النسوان قصته أكبر من اسمه وهو برضه عاوز السلطة وعاوز يوصل بأى شكل لكنه بـ يمثل الإغراء الثالث في الحياة، بـ يمثل فكرة "الإغراء نفسها" والناس اللى بـ يحاولوا من خلالها الوصول للسلطة والحكم.

عن المسلسل:

بعد ما تكلمنا عن فكرة المسلسل وتأويلات الكفور فيه، لازم نتكلم عن السيناريو المحترف واختيار الألفاظ واللغة كمان اللى مش مرتبطة بزمن في المسلسل، ولازم نتكلم عن التصوير اللى معيشك في زمن مختلف عن طريق كادرات ما بين الألوان الأبيض والأسود، وكمان اختيار الملابس والأسماء سواء أسماء الكفور أو الأشخاص.. واسماء الأبطال في المسلسل بـ تلعب دور مهم في تفصيل الأحداث ومتابعتها.. زي "استمنوها، الديب، سجاج، أبادير"..

هنا لازم نقول أن الموضوع متعوب فيه علشان كده ظهر بشكل لائق جدًا من ناحية الكتابة والتصوير والتمثيل كمان.. والمهم بقى أننا نتكلم عن الفانتازيا والسحر والأشباح والناس اللى بـ تختفي وبـ تظهر والعهد والوصية والعيال اللى اتربت في جحر الثعابين واتمرنوا هناك.. سحر وتشويق وأكشن وكآبة، من المهم أنك تتفرج على حاجة مختلفة في رمضان.

ناخد عليه:

ناخد بقى على المسلسل أن المونتاج كان لازم يبقى أحسن من كده، والخدع القائمة على الفانتازيا كان لازم تبقى محبوكة أكثر علشان الناس تصدق، وكان لازم يفك من الكآبة شوية لأنه كئيب بزيادة.