The Definitive Guide to Living in the Capital , Cairo , Egypt

بعد نجاحها في فيلم “سامي أوكسيد الكربون” في
دور ساندي -وهي لسه ما عداش عمرها سبع سنوات- بدأت تظهر على قناة الحياة في برنامج
جديد بـ تقدمه ولكن باسمها الحقيقى “جنا”.

برنامج “الليلة مع جنا” بـ يهتم بـ استضافة كل
الفنانين الكوميديين وإجراء حوار معهم بشكل مختلف من خلال أداء جنا في الحوار، وبـ
يهدف لتقديم سهرة جميلة للمشاهد بعيد عن ضغوط الحياة.

ومن الحاجات الحلوة في البرنامج أنه بـ يعرض مضمونه في شكل
ترفيهي كوميدي، وده طبعًا نتيجة اختيار الفنانين الكوميديين، بـ ينقسم لعدة فقرات:
الأولى هو إجراء حوار مبسط مع الضيف ينحصر في أسئلة مرتبطة بالطفولة زي مثلاً: “كنت
بـ تأخد ساندويتشات معاك إيه في المدرسة؟” و”نفسك ترجع طفل ولا لأ”،
وهكذا.

وبعد كده فقرة لـ اللعب مع جنا في إطار كوميدي ترفيهي، وينتهي
بمشهد تمثيلي بين جنا والضيف من تأليف البرنامج، أداء جنا في التمثيل مع الضيف
يمتاز بالجرأة والثقة إلى جانب قدرتها على جذب الانتباه، زي ما قدرت تجذب الأنظار لها
في الفيلم.

ومن ضمن الضيوف في البرنامج صلاح عبد الله اللي بـ يمثل الاختلاف
بين الجيلين، إلى جانب حديثه عن ذكريات الطفولة، وكمان وجود رامز جلال في حلقة ثانية
أعطى طابع مختلف تمامًا للحلقة وخلاها مميزة خاصة أن رامز جلال دائم الافتعال لحاجات
كوميدية ومواقف مختلفة تخلي المشاهد سعيد بالحلقة.

تتر البرنامج ملائم جدًا لطبيعته خاصة أن اللى بـ تغنيه جنا
بشكل يمتاز بالحركة السريعة والشقاوة، وكمان ديكور البرنامج ملائم جدًا.

على الرغم من جمال البرنامج إلا أن أداء جنا في تقديمه غير
ممتع وجذاب، وده بـ يخلى المشاهد يمل من الحلقة لأن مافيش موضوع محدد بـ يناقشه أو
قضية معينة غير الترفيه واللامضمون، البرنامج سطحي سواء في عنصر الضيوف أو الموضوع.
إلى جانب أن طريقة استخدام نجاح الطفلة في فيلم معين لتقديم برنامج غير جيدة، لأن مش
شرط أن نجاحها فى التمثيل يجعلها ناجحة في تقديم البرامج، خاصة أنها لسه طفلة ما
عندهاش خبرة، كمان ينقصه المشاركة الفعلية من الجمهور سواء من الموجودين في الستوديو
أو عن طريق الاتصالات التليفونية.