The Definitive Guide to Living in the Capital , Cairo , Egypt

تخيل إن الدنيا حلبة وأنت فيها البطل، دي أول جملة بتسمعها في أغنية مقدمة البرنامج اللي أقل حاجة نقولها عليها إنها مقدمة معمولة في (بلاد بره).

هنغير طريقتنا في تناول البرنامج ده تحديدًا، مش هنتكلم عن فكرته قد ما هنتكلم عن إن تصويره معمول بشكل مش عادي (مبهر يعني).

الإخراج مش فكرة إن حد بيخرج برنامج، بالعكس ده حد عايز يعمل فيلم وثائقي مثلًا، أو حد مركز في كل التفاصيل وزوايا التصوير، وإن يجيب اللقطات المعبرة على وجوه المتسابقين، في أوقات الحزن والفرح.

ونقول لكم بلاش نتكلم عن الإنتاج والديكورات، علشان واضح إن إنتاجه ضخم، وفيه إبهار، شايفين إنه زيادة شوية عن اللزوم، يعني البرنامج كان ممكن بإمكانيات أقل من كده شوية، يبقى حلو برضه بزيادة، طيب هي إيه فكرته؟

الفكرة بقى إن دي النسخة العربي من برنامج رياضي عالمي أصله من اليابان، اشتهرت الفكرة، وانتشرت في كل حتة في العالم، ودي النسخة العربي منها، واللي قايم على تقديمها النجم أحمد فهمي، وده طبعًا بعد النجاح الكبير اللي حققه في مجال تقديم البرامج، ومعاه في التقديم، المذيعة اللبنانية جينيفر عازر.

البرنامج قايم على مجموعة اختبارات ومسابقات صعبة شوية، لكن مجمل التحديات هي اللي هتقول مين في النهاية اللي يستاهل لقب (محارب النينجا).

والننيجا زي ما إحنا عارفين هي رياضة قتالية يابانية، قايمة على الخفة واللياقة العالية، وفنون الخداع الكتيرة، ويمكن دي هي مقومات أي لاعب عايز يكسب في التحدي ده.

أحمد فهمي مش دوره إنه يعلق وبس، لا هو بيقدر يصنع حالة خاصة لأي برنامج بيقدمه، وفي برنامج Ninja Warrior، بيقدم أحمد بعض الإرشادات والنصائح للمتسابقين، ويشجعهم، وبيستضيف كل حلقة نجم من نجوم الميديا، ومهمته إنه يشجع المتسابقين، والشركة المنظمة للبرنامج أعلنت عن جايزة مبالغ فيها يا جماعة صراحة قدرها (500 ألف) دولار.

البرنامج من إخراج المصري المبدع والمجتهد مجدي الهواري، اللي أثبت إنه قادر يخرج برنامج عالمي بمعنى الكلمة، أما عن منطقة سهل حشيش في الغردقة واللي معمول فيها المسابقة، فالاختيار جيد جدًا، ولو عايزين تعرفوا ليه، ابقوا تابعوا البرنامج علشان تعرفوا.