The Definitive Guide to Living in the Capital , Cairo , Egypt

فى ظل الأحداث اللى بـ تمر بها بلدنا بـ تظهر مشاكل
كثيرة وأحيانًا ما بـ نعرفش إيه الحل الأمثل لها، وكمان بـ يكون فيه وجهات نظر
متضاربة منها المؤيد والمعارض ومش بـ نعرف فين الصح، لكن برنامج “بهدوء”
اللى بـ يعرض على قناة cbc الفضائية يقدر يفسر كل اللى يخطر
فى بالنا من أفكار، خاصة أنه بـ يحاول يطرح وجهة نظر من طرف واحد، لكن بـ يهتم
بطرح جميع وجهات النظر المختلفة لأن الأسئلة بـ تكون واحدة من خلال مجموعات بـ تمثل
كل أطياف المجتمع فى مصر وكل أصحاب الآراء المتضاربة، وبـ يترك للمشاهد حرية الرأي
وكمان بـ يكون فيه تفاعل معاه علشان يكون مشارك فى الحلقة بشكل قوى، وده بـ يظهر
من خلال الانتقادات والآراء المطروحة على الجميع، وبـ يهتم البرنامج ببعض وجهات
النظر بحرية، وشجاعة، بصراحة، وبهدوء.

دائمًا يبدأ البرنامج بكلمة هادفة من مقدمه عماد الدين أديب،
ويتبعه فيلم تسجيلى يدعم مضمون الحلقة وبعدها بـ يتم طرح سؤال يكون محور النقاش زي
مثلاً: كيف تتم نقل السلطة من المجلس الأعلى للقوات المسلحة لسلطة مدنية منتخبة؟،
وكمان بـ يطرح أديب جميع الأفكار اللى بـ تخطر على بال المشاهد، وغير كل ده طريقته
فى طرح الأسئلة مختلفة فبـ يسأل سؤال واحد لأعداد كبيرة من الضيوف وكل طرف يعبر عن
وجهة نظره الخاصة به.

وكمان نلاحظ أن البرنامج محايد لأقصى درجة ويمتاز بالدقة
المتناهية  في أسئلته وده بـ يرجع لطريقة أديب
الجذابة فى تناول البرنامج وكمان أسلوبه جميل وفريد وبـ يختلف عن الكثير من المذيعين،
بجانب أن طريقته فى عرض الموضوع بسيطة، وإن كان طبيعة مضمون الحلقة معقد وده بـ يعكس
قدرته على توصيل الفكرة لرجل الشارع البسيط، عنده إمكانية فهم العديد من المعانى
السياسية المطروحة وبعد كده فيه لقاءات حوارية مع شخصيات متعددة حول السؤال
المطروح فى بداية الحلقة وأثناء اللقاءات الحوارية بـ يكون فيه شاشة لعرض الأسئلة
وبعض من تعليقات الضيوف.

ورغم كل ده إلا أن ديكور البرنامج يغلب عليه اللون الأسود
فبـ يعطي إحساس للمشاهد بالاكتئاب ويزود عنده الشعور بالإحباط خاصة مع الأحداث
اللى بـ نمر بها، ورغم فتح باب المشاركة للمشاهدين عن طريق الفيسبوك فمافيش أي مشاركات
عن طريق التليفون وكمان الفقرات الإعلانية كثيرة جدًا لدرجة ممكن تشتت انتباه
المشاهد.