The Definitive Guide to Living in the Capital , Cairo , Egypt

بون أبيتيتو

بون أبيتيتو: إيطاليا وأكلها على قناة ست البيت

  • محسن عبد الفتاح
  • طبخ
  • من الآن
  • كريم متياس ومحمود حمدىكريم متياس ومحمود حمدى
تم التقييم بواسطة
Rasha Zeidan
قيم
قيم الآن
بون أبيتيتو: إيطاليا وأكلها على قناة ست البيت

موضة بس مش فى الألوان ولا الأزياء، دي موضة الطبخ..أيوه موضة وهى دلوقت فى عزها ومسيرها هـ تتقدم وتمشى خالص علشان كده نحب نقول لكل واحد مهتم بالمطبخ الحق حوشلك شوية وصفات واتعلم بقى.

زمان كان هو برنامج أسبوعى أو بالكثير برنامجين لكن دلوقت حنفية برامج واتفتحت وكمان خاصة بالطبخ بس، الموضوع بدأ مع قناة فتافيت لكنها مش مصرية.. فالمصريين قالوا إشمعنى إحنا يعنى.. عنهاوفتحت cbc سفرة المصرية وعلى نفس الخط جاءت قناة ست البيت ومع احترامنا الكامل لها إلا أنها مش فى مستوى قناة cbc سفرة.

ده مش معناه أن شيفات ست البيت أقل احترافية من شيفات cbc سفرة لكن ممكن يكونوا أقل شهرة "بس".. لكن اللى بـ نتكلم عنه أن الشيفات فى سفرة لهم شكل إعلامى ومتقدمين بشكل جيد.. والديكور كمان مختلف.

عمومًا لو أنت من عشاق متابعة برامج الطهى هـ تحب تشوف "ست البيت" واللى اسمها باين جدًا ومحدد وعاوز يوصل فكرة بـ تقول: "هـ نخليكى تعملى أكل زى أى ست بيت شاطرة" وده شكل ترويجى جيد واختيار حلو لاسم القناة.. والقناة قريبة جدًا من مطبخنا المصرى والعربى.

وعلى سيرة الاحترافية لازم نتكلم عن برنامج "بون أبيتيتو" للشيف محسن عبد الفتاح اللى بـ يكلمنا على الأكل الإيطالى وكأنه عايش فى إيطاليا ومولود هناك.. ومن خلال البرنامج هـ نعرف أن الأكل الإيطالى مش هو البيتزا والمكرونة السباجتى وخلاص.. ده عالم ثانى ومليان بالوصفات اللى لازم نعترف أننا ما كناش نعرفها قبل كده.

ديكور المطبخ بسيط جدًا لا هو مطبخ برنامج مشهور ومصروف عليه ديكورات مبالغ فيها.. ولا حتى شبه مطبخ المطاعم.. هو أقرب حاجة له مطبخ البيت.. وده مفيد جدًا فى شكل البرنامج لكن لسه فيه مشكلة.

البرنامج بـ يفتقد الروح.. يعنى ناقص حتة التواصل بينه وبين المشاهد،تحسوا أن الموضوع مش ميديا وإنما أقرب لفكرة الأكاديمية.. بمعنى أن الشيف بـ يعمل الوصفة صح وتمام زى ما قال الكتاب بالضبط.. لكنه لا بـ يتكلم مع المشاهد عن حكاية الأكلة.. أو أى حاجة حياتية من اللى بـ نعيشها.. ولا بـ يحاول يشغل تفكيره بأشكال مختلفة للوصفة أو حاجات ممكن تيجى مكان خامات غالية مثلًا فيقول أن فيه خامات أرخص ممكن تلاقوها فى المكان الفلانى، ومافيش تواصل بالتليفون ولا حتى بالشات أو إيميل الشيف.. وده طبعًا بـ يضعف من قيمة البرنامج ومن نسبة مشاهداته.. لازم الشيف مع احترافيته يكون له "كاريزما" ويأخذ المشاهد له ويخليه مركز معاه مع الوصفات الجامدة، يبقى ساعتها هو ده البرنامج.

عجبك ؟ جرب

برنامج The Taste على قناة النهار.

نصيحة 360

برنامج "بون أبيتيتو" تقديم الشيف محسن عبد الفتاح، وإخراج كريم متياس ومحمود حمدى، ويعرض على قناة ست البيت يوميًا الساعة 12:30 ظهرًا ويعاد 6:30 مساءً.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح