The Definitive Guide to Living in the Capital , Cairo , Egypt

برنامج «توك شوز» بـ تقدمه دعاء
سلطان، فكرته أنه بـ يقدم نقد جيد لبرامج التوك شو المختلفة على كافة القنوات
الفضائية، خاصة في فترة أحداث ثورة 25 يناير، وبـ يقدم ردود الفعل المختلفة لمقدمي
البرامج قبل وبعد الثورة وقد إيه اختلف أداء بعض منهم.

ومن الحاجات الظريفة في البرنامج أنه
بـ يخلّى الجمهور هو الحكم على أداء المذيعين في برامجهم، لأن طريقة المذيعة نفسها
جذابة وكأنها بـ تقول كل اللي عايز يقوله أى حد عن أداء مقدم البرنامج، زي مثلاً
قناة الحياة لما كانت بـ تقدم برنامج مشترك فيه رولا خرسا وعمرو أديب ورأيهم في
الأحداث أثناء الثورة، وردود فعل الجمهور على أدائهم في برنامجهم.

وكمان بـ تستقبل في كل حلقة اتصالات تليفونية
لعرض آراء بعض المثقفين، وكمان أداء دعاء سلطان في كل حلقة مختلف عن اللي قبله،
وبـ تحاول تناقش موضوعات معينة من خلال مقتطفات من برامج التوك شوز، وبـ تعرض ملخص
لكافة التوك شوز المعروضة على القنوات الفضائية، وبـ تعلق على كل كليب بـ تقدمه
بطريقة سهلة وبسيطة، وبـ تنتقد طريقة كلام الضيوف الموجودين في برامج التوك شو
المختلفة بشكل إيجابي.

وبـ يهتم البرنامج بـ تقديم ما يعرف
بطرائف التوك شو، وده بـ يعرض فيه المواقف المضحكة اللي ممكن يمر بها أى مذيع
أثناء الحلقة، وقدرت تستضيف شخصيات إعلامية من مقدمي التوك شوز زي هالة سرحان
ويسري فودة وغيرهم.

وفي حلقة توفيق عكاشة تمكنت المذيعة
من عرض كل ما يدور في دماغ المشاهدين من أسئلة، خاصة اللي بـ يتابعوا برنامج «مصر
اليوم» تقديم توفيق عكاشة، سواء في أدائه اللغوي ولهجته أو تعليقاته على أى حد بـ
يشتغل معاه في البرنامج، وقدمت كل الكليبات كأدلة إثبات للي بـ تعرضه من مواقف.

ديكور البرنامج مميز ومعبر جدًا عن
طبيعته من خلال الثلاث شاشات الموجودة في أماكن مختلفة، وبالرغم من جمال البرنامج
وطريقته الجذابة في العرض، إلا أنه تنقصه المشاركة الفعلية للجمهور سواء من خلال
الاتصالات التليفونية أو حتى التعليقات على الفيس بوك، وكمان أوقات كثير بـ يلجأ
البرنامج لعرض الكليبات من برامج التوك شو أثناء الثورة بدون التركيز على ما يخص
الأحداث الجارية، وغير كده مافيش أي فواصل إعلانية، وكمان المذيعة بـ تقاطع الضيوف
بشكل كبير خاصةً لما تكون معجبة بشخصية معينة منهم.