The Definitive Guide to Living in the Capital , Cairo , Egypt

جراند أوتيل

جراند أوتيل: الزمن الجميل فى دراما رمضانية حديثة

  • دراما
  • من الآن
  • محمد شاكر خضيرمحمد شاكر خضير...
written by
Mohamed Hamdy
قيم
قيم الآن
جراند أوتيل: الزمن الجميل فى دراما رمضانية حديثة

دايمًا بنقول على أيام زمان أنها أيام الزمن الجميل، لما كانت كل حاجة جميلة ومش معقدة، الناس كانت كويسة وطيبة وماحدش بيأذي حد و… الحقيقة أن مسلسل جراند أوتيل واللي بيتعرض في السباق الرمضاني 2016 بينسف الكلام الجميل اللي اتعودنا عليه لما بنيجي نتكلم عن الماضي، لأن المسلسل اللي بتدور أحداثه في خمسينات القرن الماضي بيعرض لنا نمط مختلف تمامًا من الشخصيات.

المسلسل بيحكي عن فندق (جراند أوتيل) واحد من أشهر وأجمل فنادق مصر فى الخمسينات، وبنشوف قصة شاب فقير ومغامر (عمرو يوسف) واللي بيبحث عن أخته اللي اختفت بشكل مفاجئ بعد عملها فى الفندق بفترة طويلة.

مسلحًا بشوية جوابات ومراسلات بينه وبين شقيقته، بينطلق (علي) علشان يحاول يكشف غموض اختفاء أخته، فقط علشان يبدأ في اكتشاف سلسلة من العلاقات المتشابكة بين رواد الفندق وبين بعضهم، كمان بيقتحم عالم الخدم علشان يبدأ يكتشف مصايب وبلاوي كتير بتحصل بين كواليس الحياة في الفندق.

أول حاجة لازم نعرفها عن المسلسل أنه بيقسم أبطاله لطبقتين، طبقة البهوات والبكوات النزلاء في الفندق، وبيدور بينهم صراعات على مناصب الإدارة في الفندق وعلى أمور كتير بتخص طبقتهم اللى بتدور دايمًا حوالين المال والسلطة.

الطبقة التانية هي طبقة الخدم، وفي رأينا هي الطبقة الأكثر زخمًا من ناحية الأحداث والصراعات، لان طبيعة وجودهم في خلفية الأحداث في الفندق بنعرف من خلالهم تفاصيل كل شيء، بل على العكس أحيانًا بنحس أن طبقة الخدم هم المحركين الأساسيين للأحداث.

أحمد داوود اللي بيلعب دور مدير الجراند أوتيل المُعين حديثًا واللي بيلعب على أكتر من بنت، أما بغرض إقامة علاقات جنسية عابرة مع الشغالات في الفندق، أو محاولة الإرتباط بواحدة من أهم النزيلات (أمينة خليل) طمعًا في أموالها، ومن الواضح أن (داوود) بيكرر من جديد دور الرجل (الوغد) اللي قدمه قبل كده في (سجن النسا) على الرغم من نوعية الأدوار المختلفة اللي قدمها في أعمال زي (قبل زحمة الصيف) أو (هيبتا) أو (أولاد رزق) وغيرها من الأعمال.

أفضل دور في المسلسل في رأينا بيذهب لدور محمد ممدوح أو أمين، واللي بيشتغل خادم في الفندق ويبدو من الأحداث إن هيكون له دور مهم ورئيسي في أحداث المسلسل.

ممدوح قادر على جذب إنتباه واهتمام المشاهد من اللحظة الأولي، وكل كلمة وتصرف بيعمله قدام الشاشة بنحس فيه أنه ممثل قادر على الخروج من ثوبه  تمامًا وتقديم أداء تمثيلي أكثر من مدهش.. بداية من طريقة كلامه وحتي نظراته وانفعالاته.

من الأدوار اللى لفتت نظرنا أيضًا دور أمينة خليل أو نازلي، والحقيقة أن أمينة من الممثلات المتميزات واللي بنتوقع لهم مشاركات قوية في المستقبل، خاصة مع جمالها البسيط والطبيعي، وقدرتها على تقمص أي دور بيطلب منها.

ديكورات المسلسل كانت قطعة من الجنة، اهتمام غير عادي بالتفاصيل ونقلة زمنية متميزة للماضي بكل تفاصيله، والحقيقة أن أحمد شاكر مدير الديكور في المسلسل قام بمجهود غير عادي علشان يظهر المسلسل بالشكل اللي ظهر عليه، لكن على الرغم من الاهتمام بديكورات المشاهد الداخلية، المشاهد الخارجية كانت قليلة ومحدودة إلي أقصي درجة، على الرغم من أنه كان من المفروض نشوف مشاهد أكتر في أسوان وطبيعتها الخلابة ومشاهدها الخارجية المتميزة.

جراند أوتيل لاعب أساسي ومنافس رئيسي على أفضل مسلسل في رمضان 2016، ونعتقد أن الأحداث القادمة في المسلسل هى اللي هتحدد حاجات كتير جدًا هتخلينا نقول عليه فعلًا أفضل مسلسل أم لا… أنتم إيه رأيكم؟

عجبك ؟ جرب

ليالى الحلمية الجزء السادس.

نصيحة 360

المسلسل مقتبس من مسلسل أسباني بيحمل نفس الاسم.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح