The Definitive Guide to Living in the Capital , Cairo , Egypt

“حلمنتيشي”
من البرامج الجديدة على قناة النهار الفضائية، بـ يقدمه عمرو قطامش ويخرجه سيد
عيسوي وتقوم فكرته على انتقاد بعض الأوضاع في مجتمعنا سواء أثناء الثورة أو بعدها
وتقديمها في إطار كوميدى ممزوج ببعض من أشعاره.

من الحاجات الحلوة في البرنامج أنه مقسم إلى عدة فقرات:
الأولى مقدمة بـ يعرف بها عمرو قطامش موضوع الحلقة مع جزء من شعره الخاص، وبعد كده
بـ يقدم نقده للموضوع بفقرة تمثيلية ثم غنائية (من تأليفه) ويختمها بجزء من شعره
الخاص حول موضوع الحلقة.

بعض الحلقات مقسمة على مرحلتين حسب طبيعة الموضوع المقدم، زي
مثلاً تقديم فقرة عن المطربين وانتقاده لموقفهم أثناء الثورة وإزاي كانوا منحازين
للنظام السابق، وبعد كده اختلف رأيهم وأصبحوا مع الثورة إلى جانب انتقاده للأغاني
والألحان، وكمان تعرض نقده لماتشات الكورة واللي بـ يحصل فيها من خلال شخصية من
خياله، ودائمًا بـ يربط أى حدث بالثورة وعلاقتها بالموضوع وهل أثرت بالإيجاب ولا السلب.

البرنامج بـ يتخلله فواصل إعلانية كثيرة وده دليل على نجاحه،
كمان أنه بـ يهتم في كل حلقة بالتنويه عن جزء من الثورة وأحداثها، إلى جانب أن الديكور
وتتر البداية والنهاية ملائم جدًا لطبيعة البرنامج وشيقة في نفس الوقت.

ورغم جمال البرنامج إلا أنه مش بنفس القوة اللي ظهر بها
عمرو قطامش وكانت سبب في نجاحه وأحيانًا ما يتعرض لبعض الموضوعات بشكل سطحي، إلى
جانب أن الجمهور في الستوديو مش بـ يبطلوا تصفيق وضحك على كل حاجة، ده غير أن تركيزه
على الثورة بشكل مستمر بـ يعطي نوع من الملل.

التنويهات اللي كانت بـ تقدم عن البرنامج قبل إذاعته كانت توحي
بقوته ولكنها مش على نفس القوة اللي صورت بها، كما أن أدائه في التمثيل غير جيد
بعكس أدائه للشعر، واللي بـ يشاركوه الأداء التمثيلى مميزين عنه إلا أنه بـ يخطف
الأضواء منهم، وللأسف مافيش صفحة له على الفيس بوك أو على النت بشكل عام للمشاركات
وإبداء الرأي.