The Definitive Guide to Living in the Capital , Cairo , Egypt

بعد فترة طويلة جدًا من الغياب، بسبب المرض، رجعت لنا تاني دعاء فاروق على قناة النهار عشان تقول لنا: لأ.. أنا لسه موجودة، برنامج حياتنا عودة قوية لدعاء فاروق، ورغم أن الاسم عادي بس بيلمس مع الناس وبيحسوا كده كأنه حاجة حلوة.

دعاء مذيعة شاطرة وجميلة، ولها شعبية، بتكلم الناس عادي من قلبها، من غير ما تفتعل أي حاجة يعني بتتكلم كأنها واحدة عادية قاعدة جنبك على الدكة في (جنينة الأسماك) قابلتك صدفة بس حبتك وقررت تحكي لك كل مشاكلها وتسمع منك كمان مشاكلك.

برنامج حياتنا بيتكلم عن حياتنا فعلًا وعن اللي بنعمله كل يوم، ودعاء من خلاله قدرت تنجح إنها تقول: أنا موجودة ونحن هنا وكده، كان لازم لما ترجع ترجع بشكل قوى جدًا ومش عادي وكأنها عايزة تقول: أنا انتصرت على التعب، وهبقى أقوى من الأول.. ناس كتير بتحب دعاء وبيجي لها رسائل كتير، وبرنامجها عامل نسبة مشاهدة حلوة عشان هي دعاء الجميلة وعشان فكرته كمان، الفكرة إيه بقى؟

عملت أول حلقة عن التوأم، وجابت توائم كتير ملت بيهم الاستوديو وقعدت تتكلم معاهم عن حياتهم وبيعملوا إيه وبيتعاملوا إزاي مع الناس والناس بتتعامل معاهم إزاي، وكمان قعدت تتكلم معاهم عن مواقف مضحكة ومواقف شريرة حصلت لهم في حياتهم، الحلقة كانت ممتعة وفكرتها جديدة، حتى التقرير الخارجي كان عن قرية في مصر كل أهلها بيجيبوا توائم، حاجة عجيبة جدًا، وفي نهاية البرنامج صوروا موقف كأن واحد بيتحرش بواحدة ويضايقها عشان يشوفوا رد فعل الناس، في مرتين تصوير، الأولى محدش عبر البنت (للأسف) بس التانية بقى بياع غزل البنات الجميل دافع عن البنت، عشان كده عملوا له تكريم في البرنامج ومكافأة 5000 جنيه، وإحنا قاعدين بنتفرج انبسطنا صراحة.

البرنامج بصفة عامة حلو، يمكن مشكلته الوحيدة هي طوله، البرنامج طويل جدًا لدرجة إنه داخل على ساعتين، بس هتنبسطوا.