The Definitive Guide to Living in the Capital , Cairo , Egypt

تليفزيون
خطوات الشيطان (الموسم 2)

خطوات الشيطان: لما الداعية يتحول لممثل فى رمضان

  • معز مسعودمعز مسعود
  • دراما
  • من الآن
  • محمد شاكر خضيرمحمد شاكر خضير...
تم التقييم بواسطة
Cairo 360
قيم
قيم الآن
خطوات الشيطان: لما الداعية يتحول لممثل فى رمضان

ناس بـ تقول عليه برنامج، وناس بـ تقول عليه مسلسل، وناس ثالثة شايفة أنه لا كده ولا كده، على كل حال هو عمل فني مميز، لأنه من المحتويات الدينية القليلة جدًا اللي بـ تتعرض على التليفزيون خلال شهر رمضان الكريم، مقدم البرنامج الداعية معز مسعود بـ يظهر للعام الثاني على التوالي في برنامجه ” خطوات الشيطان 2″.

خطوات الشيطان 2 عبارة عن حدوتة تصوير برنامج لمعز مسعود بعنوان “لتعارفوا” والأحداث الدرامية بـ تدور حول حياة فريق التصوير والناس اللي شغالة معاه، كل واحد له حكايته ومشكلته، ونظرته للحياة.

حاجات كثير جدًا اختلفت في “خطوات الشيطان” رغم أنه بنفس الاسم ونفس الفكرة، لكن الأبطال، والأحداث بـ تختلف عن الموسم الاول، كمان معز نفسه ما بقاش بـ يطلع بصورة منفصلة في آخر الحلقة يعلق على اللي بـ يحصل، إنما بقى جزء من الحدوتة والأحداث، نسبة الدراما بقيت أعلى، والأحداث ما عادتش بـ تدور في مكان واحد، الحلقة بقى فيها أكثر من حدوتة ومكان تصوير، عدد الأبطال بقى أكثر، والأحداث بقيت معقدة بصورة أكبر.

“خطوات الشيطان” عبارة عن دراما عن تفاصيل صغيرة أوي في حياة ناس كثير، اللي عايش في قصر واللي عايش في عشة، اللي بـ يسرق وشايف أنه ما بـ يعملش مشكلة، واللي عنده طموح لكن الظروف ضده، واللي مش بـ يشتغل والتزامات البيت بقيت زي القيد في رقبته، “خطوات الشيطان” حاول ما يسيبش أي نقطة لها علاقة بالحياة دلوقت إلا ولمسها.

 معز مسعود مواقفه واضحة جدًا من أول يوم في الثورة، بعكس كثير من الدعاة الدينيين اللي تصرفوا على طريقة نجوم الفن وفضلوا عدم ذكر موقفهم بوضوح علشان ما يخسروش جمهورهم، معز نزل من أول يوم في الثورة، وطول الثلاث سنين اللي فاتوا كان واضح في مواقفه، وده خسره جمهور كبير من جماعة الأخوان ومحبيهم، لأنه بـ يدينهم باستمرار، ومش بـ يتجنب الحديث عنهم زي بقية الدعاة.

السنة اللي فاتت معز ما اتكسفش يتكلم عن السلفيين اللي واخدين اللحية مظهر وبس، ومش بـ يطبقوها في حياتهم اليومية، وبسبب التعليقات اللي قالها والمشاهد اللي طلعت في البرنامج تم اتهامه أنه بـ يشوه الإسلام!، السنة دي بقى دخل عش الدبابير، وبدأ يتناول فكرة التغرير بكثير من شباب الأخوان، فكرة المسيرات اللي بـ يمشي فيها أخوان وغير أخوان ومش بـ يروح ضحيتها غير الأبرياء وبس، وده برضه خلى مشاهدين كثير يفتحوا عليه النار ويهاجموه، لكنه مكمل في اللي هو شايفه صح.

خلال الحلقات بـ نشوف حياة المصريين خلال الثلاث سنين، ضابط الجيش اللي بـ يعزل علشان خايف على عائلته، ومسيرات الأخوان اللي بـ يدخلها السلاح بصورة خفية، والشباب اللي مش عارف يتجوز بسبب ظروف البلد الصعبة، والناس اللي بـ تتحرج من شغلانتها، والبنات اللي بـ تتعرض للمضايقة بسبب الأحداث السياسية الصعبة.

 

علشان تعرف مواعيد وقنوات عرض “خطوات الشيطان” زور “دليل كايرو 360 للتليفزيون فى رمضان“.

عجبك ؟ جرب

خواطر 10 على قناة mbc.

نصيحة 360

من إخراج محمد شاكر خضير، وبطولة معز مسعود ومجموعة من الشباب.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح