The Definitive Guide to Living in the Capital , Cairo , Egypt

قرب قرب قرب.. تعالى اتفرج على السحر والعجايب.. تعالى وشوف الساحر بـ يعمل إيه.. اتفرج على كل حاجة هـ تبهرك.. وتعالى شوف الساحر.. فاكرين السيرك بتاع زمان وفاكرين الموالد واللى بـ يحصل فيها؟ وفقرة الساحر اللى بـ تخلى الكل واقف منبهر؟ طب فاكرين أوائل التسعينيات لما كان برنامج "بانوراما فرنسية" وبرنامج "اختارنا لك" بـ يجيب فقرة الساحر فى عروضه وكلنا بـ نقعد ومنتظرين نشوف هـ يعمل إيه.. شوفوا بقى الدنيا تطورت قد إيه وبقى فيه برنامج كامل عن السحر.. لا ما بقاش اسمه السحر.. بقى اسمه "خفة يد".

المقدمة:

لازم يكون فيه تنويه فى أول البرنامج على أن الحركات واللى بـ يحصل فى البرنامج هو صناعة محترفين وما ينفعش تقلدوه.. ركزوا هو محترف ومعاه فريق محترف والخدع ممكن تعرض حياتكم للخطر.

أحمد البايض:

لازم الأول نتعرف على البايض هو مين.. هو فنان خدع بصرية ولد فى السعودية، بدأت رحلته فى الفن ده من سن الخامسة لما جده علمه خدعة صغيرة وانبهر الطفل بها.. وبعدها بدأ والده يعلمه مجموعة من الخدع دى.. وانطلق الطفل فى رحلة العلام دى علشان يبقى واحد من أشهر الفنانين فى العالم فى فن الخدع البصرية.. وهو عنده مقدرة عالية على خداع العين.. وجاءت شهرته لما عرض خدعه فى برنامج Arab’s Got Talent واشتهر بعدها جدًا وقدم عروضه فى بلاد كثير زى فرنسا ودبى ولبنان والمغرب ومصر والولايات المتحدة.

الفكرة:

الحلم ممكن يصبح حقيقة والحقيقة ممكن تكون خفة.. أحمد البايض فنان عربى عنده مقدرة على خداع العين بقدرة عالية جدًا.. عن طريق مجموعة من الخدع البصرية والخفة اللى بـ تيجى بتدريب عالى جدًا.

مش كده وبس:

صراحة الموضوع مش كده وبس، الموضوع كمان فيه حاجة غريبة فى أحمد البايض، هو عنده مقدرة عالية على (……..)، حط بين القوسين اللى أنت عاوزه.. وتعالى نحكى مثلًا.. نزل فى بيروت وقابل ناس فى الشارع، وبدأ يقول لهم فكر فى لون من ألوان الكوتشينة، فـ يفكر الرجل والبايض بـ يعمل حركات بأيده أمام عينه.. ويقول له أنت فكرت فى الأحمر.. هنا يصرخ الضيف هو فعلًا فكر فى اللون ده، وبعدين يقول له فكر فى شكل ورقة الكوتشينة اللى أنت عاوزها فـ يفكر فى القلب، فيرد عليه أنه الـ Heart يصرخ ثانى صح.. وأخيرًا يقول له فكر فى رقم الورقة فـ يفكر الرجل فـ يقول له (8) يموت الضيف من الضحك ويقول له (صح).

هنا لازم نقول أن البايض عنده قدرة عقلية عالية أو فيه إيحاء معين بـ يستخدمه علشان يوصل للى هو عاوزه.. والبرنامج فى مجمله جديد جدًا ومبتكر وكمان فيه فقرات كثير مميزة، يعنى فقرة مع الناس فى الشارع وده بـ يعمله فى بلاد مختلفة، وفقرات مع فنانين زى أحمد زاهر من مصر ودانييلا من لبنان، والبرنامج بـ يتصور فى البلاد العربية يعنى فى لبنان ودبى والقاهرة، والفقرات متنوعة مع الكبار والأطفال، وكمان الخدع متنوعة ومختلفة.

وأخيرًا لازم نعرف أن الخدع البصرية أو الذهنية بـ تيجى من التدريب الكثير والتعرف على الخدعة وإتقانها.. وبس يعنى هو مش ساحر هو فنان.