The Definitive Guide to Living in the Capital , Cairo , Egypt

تليفزيون
خواطر 7

خواطر7: برنامج لحل مشكلات الدول العربية بشكل شبابي

  • عائلي
  • من الآن
تم التقييم بواسطة
Shaimaa El Gammal
قيم
قيم الآن
خواطر7: برنامج لحل مشكلات الدول العربية بشكل شبابي

رغم أن مذيع برنامج «خواطر7»
سعودي الجنسية، إلا أن البرنامج استطاع تحقيق قدر كبير من النجاح في مصر وخصوصًا
الموسم اللي بـ يُعرض السنة دي، يمكن لأن الناس أصبح عندها رغبة أكبر بعد الثورة أنها
تشوف برامج هادفة لها علاقة بتنمية المجتمع وده شيء ملحوظ بدليل مثلاً أن الممثل
أحمد آدم قرر تقديم برنامجه السنة دي “بني آدم شو” من تركيا بشكل جديد
وهادف أكبر من الأول.

نرجع لبرنامج «خواطر7» اللي بـ يقدمه
الشاب السعودي ورجل الأعمال أحمد الشقيري واللي كان ظهوره الأول سنة 2005 في
برنامج يلا شباب على قناة M.B.C
مع أحمد الفيشاوي. طبيعة البرنامج الدينية ومقالات أحمد الشقيري اللي كانت بـ تتميز
باستشهاد كبير بالقرآن والأحاديث النبوية كانت السبب أن الجمهور الخليجي صنف شقيري
كداعية ديني وعلشان كده كان شقيري دائمًا بـ يقول: “أنا مش عالم.. أنا طالب
علم”، وفعلاً شقيري ما كانش بـ يبالغ لما قال كده، بدأ شقيري يقرأ ويبحث كثير
في تطور الحضارات ونهضة المجتمعات وبدأ ينقل الأفكار دي في برنامج خواطر 1 سنة
2005 ومع عرض البرنامج كل سنة كان البرنامج بـ يحقق نجاح كبير في دول الخليج.

الفيس بوك واليوتيوب ساعدوا بشكل
كبير على نشر حلقات الموسم الخامس والسادس في مصر وبدأ أحمد الشقيري يكون قاعدة
جماهيرية كبيرة من الشباب في مصر ساعدت في نجاح خواطر7.

الجميل في البرنامج أنك بـ تحس أنك
بـ تتفرج على كذا برنامج في وقت واحد، برنامج ديني وبرنامج ثقافي وبرنامج سياحي
وبرنامج تنموي، شقيري بـ يناقش أفكار تتعلق بنهضة المجتمع ومشاكل بـ تواجهها
المجتمعات العربية، بـ يسافر بلاد العالم المختلفة علشان ينقل للمشاهد الناس في
البلاد دي بـ يحلوا مشاكلهم إزاي وبـ يطوروا من أنفسهم إزاي وبـ يعمل حوارات قصيرة
ولقاءات مع ناس من البلد فـ ينقلك كمشاهد بكل حواسك للمكان اللي هو فيه.

شعار البرنامج السنة دي هو “الشعب
يريد” واللي تم اختياره بعد قيام الثورات العربية المختلفة اللي شقيري شايف أنها
قامت لأن العرب محتاجين يعيشوا حياة كريمة، وعلشان كده طرح مجموعة من المشكلات أو
الظواهر السلبية اللي موجودة في الدول العربية زي الزحمة، والسكن، والماء، والزبالة..
إلخ، وسافر دول مختلفة يشوف فيها إزاي حكوماتها تغلبت على المشاكل دي، زي الحلقة
اللي زار فيها مدرسة للمكفوفين في الصين وعرض لنا إزاي هما بـ يستفيدوا من طاقتهم
المهدرة عندنا في الدول العربية، وزي الحلقة اللي عرض فيها مشروع أردوجان في تركيا
 للتخلص من القمامة والاستفادة منها.

من الحلقات المميزة: الحلقة اللي
فريق “خواطر” هد فيها بيت قديم في عزبة الهجانة وبنى مكانه بيت جديد شفنا
فيه إزاي إحنا محتاجين تخطيط أكبر في بناء البيوت البسيطة في المناطق العشوائية،
وعلى طريقة البرامج الأجنبية وضح فريق العمل خطوة بخطوة مراحل بناء البيت والحلول
اللي قدمها لمشكلة عدد الأفراد الكثير اللي عايشين فيه.

هـ نلاحظ أن شقيري دائمًا بـ يلبس
ملابس عليها لوجو كلمة “إحسان” ودائمًا بـ يشاور على اللوجو ده خلال
الحلقة وفيه مشاهدين كثير بـ يسألوا عليه، لما زار شقيري اليابان في الجزء الخامس تَعرف
على مصطلح “كايزن” الياباني ومعناه عمل الشيء في أنسب وقت وبأقل تكاليف،
ولما قرأ أحمد أكثر عن السياسة دي حس أن عندنا مصطلح بـ يوصل نفس المعنى وهو
“الإحسان”: “أن تعبد الله كأنك تراه، فإن لم تكن تراه فإنه يراك”،
وده بـ يعزز فكرة إتقان العمل اللي بـ يحاول شقيري يوصلها للمشاهد.

أغنية التتر عجبت ناس كثير، وهي
من غناء “ماهر زين” وألحان “حمزة نمرة”، الأغنية مناسبة جدًا
لفكرة البرنامج وبـ تشرح الهدف منه وساعدت المصريين أنهم يقربوا أكثر من البرنامج
بسبب شعبيته.

البرنامج مدته مش كبيرة وكل
حلقاته متوفرة على يوتيوب وتقدروا تحملوها بسهولة.

عجبك ؟ جرب

برنامج "مذكرات سائح" تقديم دكتور على العمري على قناة الحياة، "بني آدم شو في تركيا"  تقديم أحمد آدم على قناة الحياة.

نصيحة 360

البرنامج مدته تقريبًا ربع ساعة في ثلاثين حلقة، يُعرض الساعة 5:15م على قناةM.B.C  والساعة 6:30 م على قناة الرسالة، والساعة 7:00 م على قناة فور شباب.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح