The Definitive Guide to Living in the Capital , Cairo , Egypt

تليفزيون
رامز قرش البحر

رامز قرش البحر: طلع السادية اللى جواك!

  • رامز جلالرامز جلال
  • رعبكوميدي
  • من الآن
تم التقييم بواسطة
Mohamed Hamdy
قيم
قيم الآن
رامز قرش البحر: طلع السادية اللى جواك!

فى البداية، لازم نتفق أنه لا يصح أننا نلقى على رامز جلال بكل اللوم فى تقديمه برنامج أقل ما يوصف به هو السادية وحب تعذيب الآخرين، لازم كمان نلقى باللوم علينا إحنا! الجمهور اللى بـ ينتظر المقالب بشغف، وبـ يعلى نسبة مشاهدة البرنامج لحدود خيالية، ويدفع أصحاب الكافيهات لتشغيل البرنامج على شاشات عرض عملاقة فى الشوارع على سبيل الجذب! جاء الوقت اللى نعترف فيه أننا أحيانًا بـ نحب نطلع الكائن السادى جوانا!

زى كل سنة بـ يخرج علينا رامز جلال ببرنامج مقالب جديد، البرنامج بـ يبدأ بالعادة بجمل سريعة متقاطعة مع مشاهد خروج النجم اللى هـ يتعمل فيه المقلب، رامز بـ يتفنن فى تقديم الضيف من خلال أسماء الأعمال اللى قام بها، بالإضافة لبعض “التحابيش” الشخصية من رامز، اللى ممكن نقول أنها كانت طريفة إلى حد ما.

البرنامج قائم على إيهام الضيف أنه بـ يقوم بتصوير حلقة من برنامج عن المونديال، على “زودياك” فى عرض المياه الخلابة، ثم بـ يحصل عطل للزودياك وبـ تنزل أحدى المشاركات فى الخدعة علشان تشوف إيه اللى بـ يحصل ثم بـ تتسارع الأحداث لحد إغراق القارب بالضيف وإيهامه بهجوم أسماك القرش عليه!

فى حلقة رانيا محمود يس ومحمد رياض لفت نظرنا أن القارب ما غرقش للنهاية، وأن رانيا فضلت محتفظة بنظارتها الشمسية رغم أن بشاعة الموقف تخلى أى إنسان طبيعي يتخلى عن أى شىء من ممتلكاته فى مقابل الخروج بسلام، ملاحظات كتمناها فى نفسنا لحد ما فوجئنا بعمرو أديب بـ يثير نفس الملاحظات وأكيد مشاهدين كثير قالوا نفس الكلام عن برنامج بـ يحظى تقريبًا بأعلى نسبة مشاهدة فى رمضان.

برنامج رامز بـ ييجي السنة دى مع كمية كبيرة من المشاكل والتعقيدات، منها مثلاً القضية اللى رفعتها الفنانة آثار الحكيم على رامز وطالبت بمنع حلقتها من العرض بحجة إحساسها بالرعب الشديد من المقلب، الأمر اللى أصبح مثار شكوك كبيرة بعد تسريب فيديو لآثار وهى بـ تتفاوض على رفع أجرها عن الحلقة! بالإضافة لمشاكل ثانية قانونية تتعلق بتهديد الحياة البحرية فى المنطقة نتيجة نصب عوارض معدنية لتركيب الكاميرات الخفية… وغيرها.

ولأن الأمور مش كلها سوداء، لازم نعترف أن خفة دم رامز وتعليقاته على الأحداث كانت ممتازة كعادته، ويكفى أن لما فنان بحجم محمد فؤاد حاول يقلد فكرة رامز من خلال برنامجه “فؤش فى المعسكر” كان دمه ثقيل جدًا فى الحقيقة ونعتقد أن فؤاد هـ يلاقى تعليقات سلبية جدًا على برنامجه فى الفترة القادمة.

رجوعًا لرامز، لازم نعترف بانبهارنا بالقارب اللى بـ يركبه لإنقاذ الضيف، واللى بـ يكون على شكل سمكة قرش ضخمة، الحقيقة كانت لفتة إنتاجية جميلة وشىء يحسب للبرنامج، رامز جلال فنان ذكي قدر يفرض نفسه على الساحة الرمضانية ويحول برنامجه لحالة بـ ينتظرها الجميع كل سنة. هو فقط بـ يوقفنا أمام المراية وبـ يطلع الشخصية السادية بداخلنا، أنتم إيه رأيكم؟

 

علشان تعرف مواعيد وقنوات عرض “رامز قرش البحر” زور “دليل كايرو 360 للتليفزيون فى رمضان“.

عجبك ؟ جرب

فؤش فى المعسكر.

نصيحة 360

فى تصريح حديث قال الفنان باسم سمرة أنه عُرض عليه الظهور فى برامج مقالب كثيرة منها رامز قرش البحر، إلا أنه رفض رغم عائدها المادى الكبير، وأن رامز بـ يتفق على تفاصيل المقالب بالكامل!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح