The Definitive Guide to Living in the Capital , Cairo , Egypt

تليفزيون
رحلة اليقين

رحلة اليقين: برنامج ديني بـ يخاطب العقلاء أصحاب الفكر والمنطق

  • توك شو
  • من الآن
تم التقييم بواسطة
Cairo 360
قيم
قيم الآن
رحلة اليقين: برنامج ديني بـ يخاطب العقلاء أصحاب الفكر والمنطق

ناس كثير بدأت تلاحظ
النبرة اللي بـ تأمر بعنف في كثير من البرامج الدينية، والصوت العالي، والآراء
الحادة، والجفاف في الحديث عن أمور الدين، ويمكن أكبر مشكلة كانت أن موضوعات البرامج
الدينية مش مناسبة ناس كثير، لأنها بـ تدور حول أمور فرعية قد يراها البعض تافهة
زي اللبس والشكل والصوت، والأكل والشرب والزواج وأحيانًا كانت بـ تتجاوز لمسائل زي
الجن والعفاريت والأعمال السفلية والسحر!

“معز مسعود”
خرج بفكرة البرنامج الديني من الإطار الضيق اللي بقت بـ تدور فيه أغلب البرامج،
ورجع فكرة النقاش الديني اللي بـ يدور حول أفكار ومبادئ أساسية كبرى ومحترمة مش
ممكن حد يختلف عليها، في برنامج “رحلة اليقين” نجح معز أنه ما يقعش أسير
لمناقشة أمور شكلية مالهاش علاقة بجوهر الدين، زي القوالب الجاهزة للتصرفات
والكلام، واللي بقى كثير من الشيوخ يحطوها على أساس أنها هي الدين، بدون أدنى
اعتبار أن البشر مختلفة والمواقف مختلفة وكل حاجة في المجتمع والعالم كله نسبية
ومن هنا بـ يبدأ دائمًا الاختلاف والتعصب.

أكثر حاجة لفتت نظرنا
في برنامج معز هي حالة الصفاء والتجرد اللي حسينا بها من أول ثانية في البرنامج، التتر
موسيقى وصور مش طبيعية، مبدع ومعبر، رغم أنه مافيش مطرب بـ يغني معاه، إلا أن
النغمات الأولى في البرنامج بمليون كلمة ممكن تتقال، حلو لدرجة مخيفة، زي ما بـ يقولوا
سهل وممتنع، وده خلانا تلقائيًا نقارن بينه وبين برنامج ثاني لداعية شاب برضه
اختار تتر البرنامج يكون أغنية بـ يغنيها مطرب شاب فيها اسم البرنامج وهدفه، وطبعًا
الطريقة المباشرة قوي دي مش بـ تعجب بعض الناس اللي مش بـ يحبوا النبرة التوجيهية في
الكلام.

“استخدم عقلك ما
تحاولش تستنى مني إجابة محددة لكل حاجة.. ربنا خلق لك عقل.. استعمله” هي دي
بالضبط الرسالة اللي بـ يحاول معز توصيلها لجمهوره، بعد مقدمة مبدعة، ما بـ يقولش
جملته صراحة، لكن أي إنسان بـ يفهم يقدر يستقبلها من خلال الحلقات وموضوعاتها، بـ
تبدأ الحلقة من مكان ما تقدرش تقول عنه ستوديو بالمعنى المفهوم، معز بـ يقدم
البرنامج من مكان ما تعرفش إذا كان صالة أو غرفة داخلية أو إيه، لكنه مناسب للحالة
العامة في البرنامج، كتب وأماكن للجلوس وديكور عام مبدع فعلاً، يدخلك في حالة عامة
من النقاء، وبـ يتكلم في أفكار عامة كبرى مش ممكن تختلف من شخص لآخر، وبـ يحاول من
خلال الموضوعات أنه يخلي المشاهد يختار طريقة التفكير، وأسلوب الحياة اللي يناسبه
المهم يكون متوافق مع الأفكار الكبرى اللي كلنا متفقين عليها.

البرنامج فيه مجهود
كبير، معز سافر لأكثر من بلد أوربي، وقابل ناس كثير جدًا، مش معتادين أننا نشوفهم
في برامج دينية، وده له أثر مميز، أنه بـ يخرج فكرة البرامج الدينية من دائرة أن
الضيوف لازم يكونوا لابسين عمامات أزهرية، أو جلاليب بيضاء، وكأن الدين مقصور على
رجال الدين هم بس اللي يتكلموا فيه ويناقشوه، معز بـ ينزل الدين من نخبويته، وبـ يخليه
موضوع ممكن نتناقش فيه وندور عليه كناس عادية، ولأنه مش بـ يصدر أحكامه على الناس
ويصنفهم كان من الطبيعي نلاقي سيدات غير محجبات وشباب غير ملتحي طالع بـ يتكلم عن
رؤاه وأفكاره حول دينه.

سكريبتات الحلقات
متكاملة بشكل كبير، المقاطع المتصورة في بلاد أجنبية بـ يدعمها تسجيلات داخل مصر،
كل حاجة خادمة الثانية، وبـ يدعمها معز بشتى الطرق بمعاونة المخرج محمد شاكر، رغم أن
الحلقة بـ تكون مقسمة بين أكثر من مكان، مدة الحلقة قصيرة جدًا، لكن تحس أنها دسمة،
الأفكار اللي فيها مش محتاجة وقت طويل في الشرح، بسيطة، وواضحة ومميزة.

البرنامج ده كسر
تابوهات كثير لأنه بـ يتكلم زي ما قولنا في أفكار، في ضيوف أساسيين في أغلب
الحلقات: ثلاثي برنامج “الستات ما يعرفوش يكذبوا” وشباب ثورة وعالم
إنجليزي في إنجلترا، والبرنامج ناقش أفكار كثير من بداية الحلقات زي فكرة هو إحنا
ليه محتاجين نكون مؤمنين بدين معين؟ ويعني إيه إيمان؟ وربنا وإزاي نتصل به ونتواصل
معاه؟ وليه الإلحاد مش هو الحل.

عجبك ؟ جرب

برنامج "آمنت بالله" على قناة cbc مع خيري شلبي والحبيب الجفري.  

نصيحة 360

لو بـ تدور على برنامج ديني كويس يحترم عقلك ويخاطب روحك اتفرج على البرنامج ده.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح