The Definitive Guide to Living in the Capital , Cairo , Egypt

تليفزيون
رقص النجوم

رقص النجوم: وياما فى الجراب يا حاوي

  • إستعراضي
  • من الآن
تم التقييم بواسطة
Rasha Zeidan
قيم
قيم الآن
رقص النجوم: وياما فى الجراب يا حاوي

فى الفترة الأخيرة انتشرت هوجة برامج مسابقات الغناء واكتشاف المواهب فى المجالات المختلفة.. وبقى فيه أكثر من برنامج فى نفس التوقيت، لغاية لما جاء برنامجنا “رقص النجوم”.. أيوه يا جماعة دى مش مسابقة فى الغناء ولا المواهب، دى مسابقة فى الرقص و”ياما فى الجراب يا حاوي”.

البرنامج لسه بادئ على قناة النهار وفكرته هى منافسة بين عدد من المتسابقين وتشكيل ثنائيات من مشاهير فى مجالات فنية كثير بـ يجمعهم مشترك واحد هو الرقص.. اللى بـ يكسب هو اللى حصل على أكبر عدد من الأصوات وده اللى بـ يوصل للنهائيات.. علشان يكسب “كأس البرنامج”.

طبعًا كل ده بـ يحصل تحت إشراف لجنة تحكيم محترفة فى الرقص وهما: “البريطانى دارين بينيت، واللبنانية ميرا سماحة، واللبنانى ربيع نحاس، واللبنانى مازن كيون”، البرنامج من تقديم الإعلامية كارلا حداد.. والإعلامى وسام دريدى.. والبرنامج مأخوذ من نسخة بريطانية بـ تحمل نفس الاسم وبـ يتعرض على قناة “BBC”.

لو جئنا نتكلم على المشتركين فى المسابقة هـ نلاقى أغلبهم من مشاهير الغناء زى “إيوان، إلين خلف، ميكايلا” وإزاى أنهم بـ يدخلوا فى معسكر علشان يتعلموا الرقص وبـ يختاروا نوع محدد “صلصا.. تانجو.. تشاتشا” علشان يطلعوا بشكل حلو فى الحلقة.

أما المعايير اللى على أساسها بـ ينجح المتسابق وبـ يصعد للنهائيات فهى السرعة بين التفكير فى أداء الحركة وتنفيذها.. المرونة.. السيطرة على المسرح.. جذب الانتباه، لكن فيه معايير ثانية ممكن نضيفها من عندنا: “يا ترى هو مناسب للمجتمع الشرقى ولا لأ”.. “عادى يعنى أننا نعمل مسابقة فى الرقص”.

من أكثر الحاجات اللى شدتنا وإحنا بـ نتفرج على البرنامج اللهجة اللبنانية ومصطلحاتها اللى ممكن ما تعرفش بعضها زى: “زحطة، مشعوطة” لكن من السياق هـ تفهم طبعًا وكلنا ولاد تسعة برضه، مش كده ولا إيه؟

لازم نقول أن إنتاج البرنامج عالى جدًا علشان يجمع المجموعة دى ويقدر يبهر الجمهور بها، فـ استخدم إمكانيات عالية جدًا سواء فى المسرح اللى بـ يفكرنا بمسارح “ديترويت” الأمريكية واللى ياما خرجت عباقرة وممثلين أوسكار.. وشغل الإضاءة مع الديكور العالى والمختلف فى كل رقصة عن الثانية.. وكمان شغل “الجرافيك” واللى بـ يظهر لك ترتيب كل “ثنائي” ووصل إلى أى مرحلة فى المسابقة.

واللى متأكدين منه أن البرنامج هـ يحقق نسبة مشاهدة كبيرة.. لكن يا ترى هـ يكون الأساس أن فكرة البرنامج جديدة.. ولا علشان نتفرج على الـ ……..، ولا نقول لكم لو خيروك هـ تتفرج على البرنامج علشان “اختار من متعدد”: “فكرة البرنامج حلوة وعجبانى”، أو “عاوز أعرف أنواع الرقص المختلفة”، أو “اتفرج على البنات الحلوة”، أو “أسباب أخرى”.

ابعثوا لنا على كايرو 360 أو على صفحتنا واللى هـ يعلل إجابته بتعليق على الموضوع هـ يكسب “حزام” رقص شرقى صميم.

عجبك ؟ جرب

برنامج "ستار أكاديمي" على قناة cbc.

نصيحة 360

يعرض على قناة النهار يوم الخميس والجمعة الساعة 11 مساءً، ويعاد بعدها بساعتين على النهار 2، تقديم كارلا حداد ووسام دريدى، ومن إخراج باسم كريستيو.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح