The Definitive Guide to Living in the Capital , Cairo , Egypt

قبل ما نتكلم معاكم عن مسلسل ريح المدام ورأينا فيه، عاوزين نحكي لكم حكاية الوسط الفني عارفها كويس جدًا. فريق هشام ماجد وشيكو وأحمد فهمي لما انفصل، حاول كل فرد من الفريق إنه يعيد اكتشاف وتقديم نفسه من جديد.

ومع إعلان هشام ماجد وشيكو الانضمام لأحمد مكي في مسلسل خلصانه بشياكة، قرر أحمد فهمي التعاون مع أكرم حسني صاحب شخصية المذيع الكوميدي سيد أبو حفيظة، واللي كانت مشاركاته بعيدًا عن الشخصية دي ضعيفة وغير كوميدية بشكل كبير.

ناس كتير توقعت نتيجة السباق الرمضاني الكوميدي انها هتحسم للثنائي هشام وشيكو، بتعاونهم مع أحمد مكي اللي قرر يرجع بقوة بعد استمراره لوقت طويل في تقديم شخصية الكبير في المسلسل اللي بيحمل نفس الاسم.

لكن بمتابعتنا للمسلسلين وجدنا أن ريح المدام قدر يتفوق على خلصانة بشياكة، وقدر يهزم باقي المسلسلات الكوميدية زي هربانة منها بطولة ياسمين عبد العزيز.

لكن مش معنى أن ريح المدام هو المسلسل الأفضل في رمضان من وجهة نظرنا، ده معناه إنه المسلسل الأقوى. وده يمكن بسبب إنه بيتنافس مع أعمال ضعيفة مش أكتر!

قصة المسلسل

المسلسل ماشي بنمط الحلقات المتصلة المنفصلة. والمسلسل بيحكي عن الزوج الخائن (أحمد فهمي) واللي بيتسبب في دخول زوجته (مي عمر) في حالة نفسية بتجعلها تتقمص كل يوم شخصية جديدة، الأمر اللي بيدفع فهمي لمحاولة استرضائها والزواج منها في كل حلقة، بمساعدة صديقه أكرم حسني.

فريق العمل

المسلسل من بطولة أحمد فهمي ومي عمر وأكرم حسني، بمشاركة رجاء الجداوي وإسلام إبراهيم وأيمن منصور وغيرهم من الفنانين. والإخراج لكريم العدل ومن تأليف تامر إبراهيم.

الأداء التمثيلي

كان من الواضح أن العبء الكوميدي للمسلسل ملقي بالكامل على أحمد فهمي وأكرم حسني، بينما تحملت مي عمر عبء الدراما وربط الحلقات ببعضها مع قليل من الكوميديا، وبشكل عام مي من الوجوه البريئة اللي بنحب نشوفها على الشاشة.

أكرم حسني تفوق على نفسه وقدر يقدم أداء أكتر من رائع، وكان من الواضح تركيزه الكبير مع أبعاد شخصيته اللي من الواضح أنها اتكتبت بتركيز كبير. كمان شخصية أحمد فهمي على الرغم من أنها شخصية كلاسيكية ومعروف دوافعها وأغراضها، لكن فهمي قدر يقدمها بشكل مميز وعظيم.

الإخراج – السيناريو – الحوار

إخراج المسلسل تميز بقدرته على الموازنة بين الكوميديا وبين عدم تقديم أحداث مسطحة، لكن السيناريو والحوار وقعوا في أكتر من غلطه منها على سبيل المثال جملة أحمد فهمي في وصف فريق بلاك تيما على إنه (بلاك طينة)، الأمر اللي أكسب الواقعة بعد عنصري أجبر صناع المسلسل على الاعتذار.

بنعيب كمان على المسلسل وجود بعض الإيفيهات الجنسية والتلميحات اللي ممكن تكون مش مناسبه لكل المشاهدين. لكن مع نظام التصنيف الجديد اللي من أوائل المرات نشوفه في الدراما العربية بالشكل ده ممكن يكون لصناع المسلسل بعض العذر، لكن في نفس الوقت بعض حلقات المسلسل ممكن تكون مش مناسبة للمشاهدين المحافظين.

الموسيقى والديكور والأزياء

موسيقى المسلسل كانت غير مميزة وغير واضحة بالمرة، على عكس الديكورات اللي كانت متكلفة وواضح فيها الاهتمام والإبداع، كمان أزياء الشخصيات كانت ممتازة ومعبرة عن روح كل شخصية ومتغيرة من دور للتاني حسب الأحداث.

الخلاصة

في رأينا إن ريح المدام يكسب أفضل كوميديا في رمضان. لكن ده مش معناه إنه أقوى كوميديا شوفناها. لكن ده بسبب ضعف باقي المسلسلات الرمضانية الكوميدية.