The Definitive Guide to Living in the Capital , Cairo , Egypt

زعفران وفانيلا

زعفران وفانيلا: طعم قوي وأكل دسم ووصفات مبهرة على cbc سفرة

  • طبخ
  • من الآن
  • محمد الحلواني
تم التقييم بواسطة
Cairo 360
قيم
قيم الآن
زعفران وفانيلا: طعم قوي وأكل دسم ووصفات مبهرة على cbc سفرة

“زعفران وفانيلا” اسم مشهور لأكثر من محتوى أشكاله مختلفة، أنتجته وقدمته غادة التلي، وكانت حريصة باستمرار أنه يطلع في شكل معين، شكل شهي ورقيق، قدمته مرة في كتاب بعنوان “زعفران وفانيلا”، ومرة في مجلة بنفس العنوان، وحاليًا بـ تقدمه في البرنامج بتاعها على cbc سفرة، والاسم مبدع فعلاً لأنه بـ يدل على نوعيات الطعام المبدعة اللي بـ تقدمها التلي، واللي بـ تتضمن أحيانًا الزعفران اللي هو أغلى التوابل، والفانيلا اللي هي رمز الحلويات في إشارة أنها بـ تقدم مختلف أنواع الوصفات المختلفة.

غادة التلي بـ تحب الطبخ، تعلمته من طفولتها من جدتها اللي حببتها في الأكل، هي عاشت بين الأردن ومصر، تعلمت الأكل الشامي والمصري، وفي برنامجها مش بـ تخصص نفسها في نوع أكل معين، لكن بـ تقدم أكلات مصرية وشامية وعالمية بطريقة جديدة وسهلة، وشعارها في كل ده أن كل الأكلات الصعبة بـ تتعمل بسهولة، بما فيها تزيين الكيك بطريقة مبتكرة، علشان ما حدش يشتري من بره، بطريقة حلوة من اللي بـ نشوفها ونأكلها بره.

غادة كانت بـ تقدم برنامج على قناة “رؤيا” لكن البرنامج ما كانش بمستوى برنامجها الحالي، حتى شكلها كان مختلف، وكان معاها مذيعة في الحلقة وكان أسلوبهم مع بعض  واضح أنهم مش متفقين ومش متناغمين، وواضح برضه أن غادة شخصية ناجحة وزي الفريك ما تحبش شريك، لذلك كانت خطوة ذكية أنها تطلع لوحدها علشان تركيزها يكون أكبر، ومعلوماتها تكون أوضح.

الملاحظة الأبرز في غادة أنها مش بـ تكون مبتسمة أوي زي باقي المذيعين وهي بـ تقدم البرنامج، لذلك ساعات بـ نحس أنها مش مبسوطة، البرنامج كان بدأ مع بداية القناة وفضل شوية وبعدين اختفى ورجع ثاني اليومين دول، البرنامج بـ يبدأ بمقدمة بسيطة، شهية، وموسيقى رقيقة زي غادة التلي، خلينا نقول أنها مش مرحة أوي لكنها ست رقيقة ورشيقة، ومتمكنة، وهي من أكثر الناس اللي ردود الأفعال على صفحات قناة cbc على الإنترنت إيجابية جدًا، سواء على صفحاتهم بتويتر والفيسبوك، أو على اليوتيوب، في كل مكان ردود الأفعال قوية ومميزة، وسعيدة باللي بـ تقدمه غادة.

غادة وعلى عكس مجموعة من مقدمي القناة اللي واخدين قضية الأكل الصحي مسألة رئيسية بالنسبة لهم، وبـ يحرصوا في كل اللي بـ يقدموه أن الأكل يكون دهونه أقل، وطعمه أحلى، وكمان بـ يقدموا معلومات إما عن بعض التفاصيل الصغيرة اللي تخلي الأكل أحلى، أو عن الصحة وعن الفيتامينات زي سالي فؤاد، لكن للأسف غادة على تمكنها وشطارتها بـ تعمل أكل دسم جدًا، وخطر جدًا جدًا على الصحة، ومن غير توضيحات أو إرشادات للناس اللي هـ تأكل الأنواع دي من الأكل أن نسبة الدهون عالية أو أن ده خطر على قلبهم لو كان عندهم سكر أو ضغط أو ناس كبيرة، للأسف معظم الأكل اللي بـ تعمله محمر، أو داخل فيه دهون بلا حصر، صحيح الأكل بـ يطلع طعمه حلو وشكله حلو لكنه شايل جواه حاجات كثير سيئة لكل الطامحين في أجساد رشيقة وصحة كويسة والحاجة اللي غاظتنا أكتر أنها رشيقة، يعني بالتأكيد مش بـ تأكل من الأكل اللي هي بـ تعمله بكل الدسامة دي، أو بـ تأكل بكميات قليلة، كميات كان المفروض تنصح المشاهد أنه يأكل زيها وما يكترش منه، أو تروج لنوعيات مختلف ومتنوعة من السلاطات تفتح نفس الناس وتشجعهم أنهم يأكلوها، لكن الحلو ما يكملش، اجتهاد وشطارة وأكل حلو لكن الضريبة غالية جدًا، كمان واجهنا مشكلة ثانية صعبة حبتين، متعلقة ببعض المكونات اللي بـ تتكلم عنها غادة وبـ يكون صعب الحصول عليها.

عجبك ؟ جرب

برنامج "حلو وحادق" لسالي فؤاد و"شغل فنادق" لخالد عفيفي على نفس القناة.

نصيحة 360

البرنامج بـ يعرض كل يوم الساعة 11:30 صباحًا وبـ يُعاد الساعة 7:30 مساءً من إخراج محمد الحلواني.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح