The Definitive Guide to Living in the Capital , Cairo , Egypt

وبما أن الفقرات غير ثابتة فالديكور غير ثابت بـ يتغير بتغير الفقرات وكمان بتغير اليوم، ولكن فى كل الأحوال بـ يكون بسيط ومناسب، يعنى فقرة الرياضة مثلاً بـ يكون شكل الستوديو صالة رياضة مصغرة وبسيطة جدًا، وفقرة المطبخ بـ يكون الديكور فيها على حسب نوع الأكلة لأن كل أكلة من بلد معينة فممكن يكون المطبخ فى يوم إيطالى أو شعبى لو الأكلة شعبية.
البرنامج بـ يراعى أنه يقدم لكل فئة عمرية من موضوعات وعلشان كده كل حلقة لها فقرات معينة وموجهة لفئة محددة، يعنى مثلاً يوم السبت بـ يكون عادة يوم مهم للزوج والزوجة لأنه بـ يتناول مشكلات الأزواج وبـ يكون ضيف الفقرة دكتورة متخصصة فى العلاقات الزوجية ومن خلالها بـ نتعرف على حاجات صغيرة بـ تفرق كثير جدًا فى الحياة الزوجية بالسلب أو بالإيجاب وممكن نكون ما بـ نأخذش بالنا منها. وبعد كده فيه فقرة دينية وعادة بـ يكون ضيف الحلقة د. سعاد صالح. وعلشان اليوم ما يبقاش جد قوى فيه فقرة عن الأبراج وضيف الفقرة دى ما بـ يكونش ضيف ثابت.
وآخر سبت من كل شهر بـ يستضيف البرنامج نجم من نجوم الفن. وكعادة شريف بـ يحب يستضيف النجوم اللى لهم شعبية كبيرة عند الشباب ومش بس مصريين أحيانًا نجوم عرب وأتراك كمان.
أما يوم الأحد بـ يكون يوم متنوع بـ يناقش فيه موضوعات اجتماعية ومشكلات الأطفال وفقرة خاصة بالمطبخ واللى طبعًا بـ تكون مهمة لكل الزوجات وكل مرة بـ يكون الشيف مختلف وده بصراحة مهم لأن كل شيف بـ يبقى عنده طرق ووصفات خاصة به.
يوم الأربعاء بـ يكون فيه فقرة طبية ممكن تكون عن التخسيس أو التغذية السليمة أو أمراض الشيخوخة وكيفية تلافى هذه الأمراض أو الوقاية من الأمراض العصرية إلخ.. وبعد كده فيه فقرة يوجا وعن الإتيكيت وتنسيق الزهور.
أما يوم الخميس بقى بـ يكون مخصص للأطفال فقط وبـ يتم فيه تقديم نماذج من الأطفال الموهوبين فى مجالات مختلفة والأطفال المخترعين بالإضافة لفقرة حوارية مع مجموعة من الأطفال وبـ يكون أداء شريف بصراحة عالى جدًا لأنه بـ يتفاعل معاهم بشكل رائع وبـ يقدر يطلع منهم أجمل ما فيهم.
ويوم الجمعة بـ يكون يوم التجديد بالنسبة للمرأة لأن بـ يكون فيه فقرة مهمة لأى ست فى الدنيا وهى الموضة والأزياء وطبعًا طالما فيه موضة يبقى لازم يكون فيه مصممين أزياء بـ يعرفوا المرأة على أحدث صيحات الموضة العالمية فى الأزياء والإكسسوار وكيفية تصميمها بشكل يناسب مجتمعنا المصرى.
وعلشان الأناقة تكتمل فيه فقرة للتجميل وكيفية العناية بالبشرة والشعر وطبعًا ضيف الفقرة بـ يكون متخصص تجميل.
وبعد كده فقرة المطبخ وبرضه شريف بـ يرفع فيها شعار التجديد لأنه بـ يستضيف كل مرة شيف مختلف بـ يقدم أكلة من بلد مختلفة وكده تقدر الست تتعرف على أطباق مختلفة وصحية فى نفس الوقت. وآخر جمعة من كل شهر بـ يكون فيه مسابقة فى الطبخ.
يعنى فى ساعة واحدة هـ تستمتع وتستفيد وكمان مذيع خفيف الظل مش هـ تحس معاه بالملل.