The Definitive Guide to Living in the Capital , Cairo , Egypt

رمضان موسم المسلسلات، وفيه دائمًا بـ يكون فيه مسلسل تاريخى أو أكثر من مسلسل، والسنة دى من قبل رمضان بفترة كبيرة والإعلان عن مسلسل “سرايا عابدين” أوحى للناس أنهم هـ يشوفوا مسلسل تاريخى ضخم وهو فعلاً كده لكن ضخم فى الإنتاج وعدد الممثلين المشاركين فيه من الوطن العربى.

المسلسل من إخراج عمرو عرفة وتأليف الكاتبة هبة مشارى وبطولة الفنان قصى خولى ويسرا ونيللى كريم ومى كساب ونور وغادة عادل والعديد من الفنانين من أنحاء الوطن العربى. ومن إنتاج قناة mbc.

تقوم فكرة المسلسل على حكاية حقبة تاريخية فى تاريخ مصر وهى فترة تولى حكم الخديوى إسماعيل واللى كانت من الفترات المهمة واللى شهدت إنجازات وازدهار فى كل أنحاء المحروسة. وبـ يبدأ المسلسل بمشهد عيد ميلاد الخديوى الثلاثين، ومن أول حلقة بـ يبان فى سرايا عابدين ملامح حريم السلطان وده من خلال التركيز على حرملك الخديوى والصراعات بين زوجاته وبين جواريه. واللى بـ يتابع المسلسل هـ يلاحظ تركيز أكثر المشاهد فى الحلقات الأولى على زوجات الخديوى الأربعة واللى بـ يجسد أدوارهم (مى كساب ونيللى كريم ونور وسوسن أرشيد) والصراع والحقد الدائر بينهم بالإضافة إلى الصراعات بين جوارى الخديوى واللى بـ تقوده الفنانة غادة عادل اللى بـ تحاول توصل للخديوى وتكون المفضلة عنده بين جواريه، وبـ تتطرق الأحداث للصراعات حول الخديوى من جهات كثيرة للسطو على الحكم وأولهم أخوه من والده.

من أول وهلة بـ يشدنا الديكورات وملابس الفنانين فى المسلسل واللى بـ تدل على ضخامة الإنتاج. واللى بـ تشكل متعة خاصة للمشاهد وكأنه داخل متحف كبير خصوصًا أن الممثلين بارعين فى أداء أدوارهم لدرجة تقنع المشاهد بأنهم الأشخاص الحقيقيين ويمكن كثرة الممثلين فى المسلسل خلى فيه بينهم روح تنافس عالية جدًا بـ تخلى كل فنان أو فنانة عاوز يطلع كل طاقته فى الدور اللى بـ يؤديه.

لكن ده لا يغفر الأخطاء التاريخية اللى وقع فيها المسلسل واللى أقل ما يقال عليها أنها كوارث، من الواضح أن أسرة المسلسل ما اعتمدتش على مراجع جادة قبل الشروع فى قبول السيناريو أو حتى اللجوء لمراجعة على قدر أهمية العمل وضخامته وده بالإضافة لبعض الجمل السهلة أو الأكليشيهات، ومن الأحداث المغلوطة فى المسلسل أول مشهد وهو عيد ميلاد الخديوى الـ 30 من المفترض أنه يكون عام 1860 يعنى قبل إنشاء قصر عابدين اللى تم بناؤه أصلاً عام 1872 وأصبح مركز لحكم المحروسة، ومن الأخطاء التاريخية كمان أن فى الوقت ده حاكم مصر كان بـ يُقال عليه الوالى وحصل على لقب الخديوى عام 1877، وكمان إطلاق لفظ “جلالة” الخديوى والأصح عظمة الخديوى.

ويستمر المسلسل والحكم عليه بعد انتهاء الحلقات.

علشان تعرف مواعيد وقنوات عرض “سرايا عابدين” زور “دليل كايرو 360 للتليفزيون فى رمضان“.