The Definitive Guide to Living in the Capital , Cairo , Egypt

نيللي كريم في البطولة ومريم نعوم في التأليف، الثنائي ده لما بيشتغل مع بعضهم بيقدم لنا في النهاية أعمال في غاية الروعة والتميز، بداية من "سجن النسا"، مرورًا بـ"تحت السيطرة" وطبعًا ما نقدرش ننسى "حكاية بنت اسمها ذات" واللي كتبت السيناريو والحوار له نعوم وقامت ببطولته نيللي كريم.

وبما أننا بنتكلم عن (تيمة) معينة من المسلسلات نقدر نقول أن نعوم وكريم بيقدموا من جديد توليفة وعرض جديد لفكرة: قصة مجموعة من السيدات في مكان مغلق ومختلف، مرة تم تقديم القصة في السجن في مسلسل "سجن النسا" ومرة في مصحة نفسية في "سقوط حر".. وهو ده اللي بنتكلم عنه.

المسلسل بيبدأ بمشاهد افتتاحية لجريمة قتل.. كده بدون إحم ولا دستور! البوليس بينتقل لشقة في التجمع الخامس علشان نكتشف قيام سيدة في منتصف العمر "نيللي كريم" بقتل زوجها وأختها! وبيبدو من المشاهد الأولى للأحداث إن الزوج المقتول كان على علاقة عاطفية بالأخت المقتولة!

بيصحبنا المسلسل بعد كده في رحلة لما وراء حادث القتل، بنشوف تأثير الحادث على عائلة نيللي كريم، سواء كانت الأم صعبة المراس واللي قدمت أداء تمثيلي متميز (صفاء الطوخي) أو الابن (أحمد داش) واللي قدم أداء متميز قبل كده في فيلم (لامؤاخذة) وغيرهم من باقي أبطال المسلسل.

بعد كده بياخدنا المسلسل في رحلة في عالم المرض النفسي، وإزاي ممكن يتحول المريض لشخص خطر على غيره، وده بنعرفه من قصص باقي المحتجزين في مستشفى الصحة النفسية بالعباسية، انتظارًا لعرضهم على الهيئة اللي بتحدد مدي مسئوليتهم عن جرائم القتل اللي ارتكبوها.

الأجمل من القصة المكتوبة بانسجام شديد وبتدقيق في التفاصيل، كان الأداء التمثيلي للمتميزة نيللي كريم، واللي قدرت تقدم أداء تمثيلي متميز قالت عنه في حوار مع (المصري اليوم) أنه كاد يصيبها بالجنون فعليًا، ويكفي إننا نعرف أن نيللي قضت أول حلقات فى المسلسل بدون ما تقول كلمة واحده حتي!

لكن بما إننا بنتكلم عن الأداء التمثيلي لازم نتكلم عن صفاء الطوخي اللي قدرت تقدم أداء متميز للغاية، وأحمد داش اللي على الرغم من صغر سنه قدم تمثيل متميز، وبنتوقع أن (داش) لو استمر في عالم التمثيل هيكون اسم متميز جدًا في المستقبل، أما آخر تعليقاتنا عن الأداء التمثيلي هتكون عن أحمد وفيق واللي حسينا أن الدور كان كبير عليه، وأن أداؤه التمثيلي كان محتاج يكون أقوي خاصة في مواقف الانفعال اللي حسينا فيه أن انفعالاته كانت مش بالقوة الكافية اللي تنقل لنا احساس الشخصية اللي بيأديها.

الاهتمام بإخراج مشاهد المسلسل بإتقان واحترافية كان متميز، بنشوف مشهد غرق نيللي كريم في غرفتها في مستشفى الأمراض العقلية، واللي نشرت قناة CBC مؤخرًا فيديو للـ(ميكنج) الخاص بالمشهد واللي ممكن تشوفوه من هنا واللي بنشوف منه إزاي ممكن مشهد مش بيستمر على الشاشة أكثر من ثواني معدودة أنه يتم الإعداد له بالدقة والإحترافية دي.

بنتوقع سقوط حر يكون واحد من أفضل مسلسلات رمضان 2016 إن لم يكن أفضلهم.. والحلقات الجاية هتبين!