The Definitive Guide to Living in the Capital , Cairo , Egypt

شغل فنادق

شغل فنادق: سر الصنعة على يد شيفات متنوعين على cbc سفرة

  • طبخ
  • من الآن
تم التقييم بواسطة
Cairo 360
قيم
قيم الآن
شغل فنادق: سر الصنعة على يد شيفات متنوعين على cbc سفرة

الشيفات مش بـ يحبوا يعطوا سر صنعتهم لحد أبدًا، لذلك لما بدأنا نتفرج على برنامج “شغل فنادق” كنا متوجسين حبتين، لأننا عارفين أن الشيفات ممكن يقدموا الحاجة ناقصة أو مش مضبوطة أوي، أو نص نص، علشان صنعتهم ما تتكشفش، لكن بدأنا نتفرج على البرنامج اللي بـ يبدأ بصورة للفندق أو المطعم اللي بـ يتم إذاعة الحلقة منه، وبـ يبدأ مجموعة متنوعة من الشيفات على مدار الحلقات تطلع وتعمل الأكل على الهواء، طبعًا اللي ضمن لنا حسن الظن أن مافيش شيف هـ يسوأ سمعته بطبخة ناقصة، كمان حلقة واحدة مش هـ تخليه يكشف موهبته كلها لذلك لا ضرر ولا ضرار، الحلقة مجرد وصفة أو اثنين ولا حتى خمسة، مش حكاية يعني.

دور خالد عفيفي -المذيع- بـ يتلخص في أنه يسأل، أسئلته كثيرة ومتنوعة، وده كويس مش وحش، صحيح بـ يضايق بعض المشاهدين اللي بـ يكونوا عاوزين يركزوا من غير كلام، لكن خالد مش بـ يكتفي بالوصفة أو المكونات وطريقة الطهي، لكن كمان بـ يبدأ يسأل الشيف عن معلوماته السابقة، الخاصة بطريقة اختيار اللحوم مثلاً، وطريقة شراء المكونات، ومعلومات خاصة بأسرار المطبخ الخاصة بإيه قبل إيه، والطرق السهلة للطهي، يعني إيه مطبخ شرقي.. يعني إيه مطبخ لبناني.. إلخ.

كمان بـ يتكلم مع الشيف عن حياته وعن تاريخه وأبرز المواقف اللي تعرض لها، والتعليق لحظة بلحظة على أبرز الحاجات اللي بـ يعملها الشيف، كمان بـ يكون التركيز كبير جدًا جدًا على الشكل والتزيين، والأسلوب اللي بـ يتم به ده كله.

عجبنا جدًا حرص الشيف أن المعلومة توصل للمشاهد بكل الطرق وبكل الأسئلة الممكنة، وتنوع الفنادق اللي بـ يدخلها زي شيراتون وفور سيزون، وكمان فنادق في مناطق ساحلية كثير، مطابخ تايلاندية، شرقية، غربية، لبنانية، معلومات أكثر من رائعة، أهمية البرنامج ده في أنه بـ يخلي الناس العادية اللي ما كانش عندهم فرصة دخول الفنادق الكبيرة أنهم يدخلوها ويتعلموا من شيفاتها، بصراحة شيء عجبنا جدًا.

كمان تنوع الشيفات وتنوع المعلومات خلى البرنامج غني فعلاً وقوي، ومميز عن باقي البرامج اللي بـ تُقدم على نفس القناة، وباقي القنوات الثانية، والأهم أن لما الشيف يتكلم عن عنصر من عناصر الطبخة مش معروف أو مش مفهوم، يبدأ خالد في السؤال عن البديل، والنتيجة اللي ممكن تطلع هو تغيير المحتوى، وهكذا، بصراحة من البرامج القليلة اللي الواحد مش بـ يكون عاوز يسأل عن أي حاجة لأن خالد بـ يقوم بدور المشاهد وبـ يسأل عن كل وأي حاجة غامضة ويوضح أي حاجة تفوته.

عجبك ؟ جرب

"حلو وحادق" لسالي فؤاد، "على قد الإيد" لنجلاء الشرشابي على نفس القناة.

نصيحة 360

"شغل فنادق" البرنامج الأمثل اللي المفروض تتفرجوا عليه لأنه بـ يقدم خلاصة معلومات شيفات كثير من مختلف فنادق ومطاعم مصر، بـ يعرض الجمعة والسبت الساعة 12 ظهرًا، والإعادة الساعة 8 مساءً.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح