The Definitive Guide to Living in the Capital , Cairo , Egypt

برنامج “النهار… ده” برنامج على قناة النهار
الفضائية الجديدة بـ تقدمه دعاء عامر وبيخرجه محمد جلال، والبرنامج ده يمتاز أنه بـ
يقدم كل حاجة بـ تحصل النهارده من أخبار وأحداث، وبـ يستضيف شخصيات لهم علاقة
بالأحداث اللى حصلت النهارده.

ومن الحاجات الحلوة في البرنامج أنه بـ يقدم مجموعة من
الأخبار عن الأحداث اللي حصلت وبعدها بـ يعرف رأي الناس في الشارع عن الخبر ده، ونقدر
نقول أنه بـ يعمل زي استطلاع رأي للجمهور عن خبر معين بـ يطرحه البرنامج.

وبعد كده بـ يعقب عليه من خلال الاتصال بالشخصيات محور
الحدث نفسه علشان نعرف رأيها في الموضوع، ومن الجميل كمان أنه بـ يقدم قضايا حيوية
تهم المجتمع بكافة أنواعه وبـ يقدم فقرة عن “حدث في مثل هذا اليوم” فنلاقي
دعاء بـ تقول الخبر اللي حصل سواء على مستوى العالم أو مصر، وبعد كده بـ تعلق عليه
من خلال تقرير مصغر وده شيء كويس في البرنامج علشان بـ تخلي الجمهور منجذب أكثر
للخبر اللى بـ تقدمه.

زي مثلاً قالت خبر عن أن بريطانيا عملت قانون من 200 سنة
لتجريم عمالة الأطفال، وبعد كده عرضت تقرير عن عمالة الأطفال في مصر وعملت لقاء مع
واحد من الأطفال العاملة علشان توصل لنا رسالة أن في البلاد الغربية حرموا ده من
200 سنة وإحنا في مصر لسه الأطفال بـ يتبهدلوا.

يهتم البرنامج كمان بعرض فقرة طبية خاصة بالمرأة أو الطفل،
وفي كل مرة بـ يعقبها تقرير إخباري علشان تعرف رأي الناس في الموضوع اللي بـ تناقشه
إلى جانب الاتصالات التليفونية، وبعدها فقرة حوارية برضه عن واحدة من القضايا
الهامة في المجتمع، يعني نقدر نقول أن البرنامج ده بـ ينقسم إلى 3 فقرات: الأولى
أخبار ومعها حدث في مثل هذا اليوم، والفقرة الثانية حوار والثالثة كمان، وغير كده
فيه فواصل إعلانية كثير وده دليل على قوة البرنامج.

ورغم جمال البرنامج إلا أن ينقصه تطوير أكثر في طبيعة ديكور
الستوديو لأنه بسيط جدًا وغير معبر عن طبيعة البرنامج، وكمان دائمًا بـ يحصل مشاكل
في الصوت خاصة مع التليفونات الخارجية، ونلاحظ أن أغلب الناس اللى بـ تتصل تعرف
المذيعة وبـ تقدم لها تهنئة عن البرنامج وقليل قوى اللى بـ يتكلم علشان موضوع
الحوار، كمان الشخصيات اللى بـ تستضيفهم فيه بعض منهم بـ يخلى المشاهد عنده ملل من
كلامه، والمذيعة بـ تخليه يتكلم كثير وممكن يدخل في موضوعات ثانية من غير ما
تقاطعه.