The Definitive Guide to Living in the Capital , Cairo , Egypt

قوى قلبك

قوى قلبك: برنامج مسابقات ممتع على قناة mbc مصر

  • داليا البحيرى
  • مسابقات
  • من الآن
  • دانى ك. صليبادانى ك. صليبا
تم التقييم بواسطة
Rasha Zeidan
قيم
قيم الآن
قوى قلبك: برنامج مسابقات ممتع على قناة mbc مصر

فاكرين الهدف بتاع مجدى عبد الغنى اللى قعدت مصر تتكلم عنه فترة طويلة علشان ساعتها مصر كانت فى كأس العالم؟.. ياه ذكريات والله فين أيام ما كنا فى كأس العالم والناس كلها بـ تتابع مصر.. أى نعم إحنا ما دخلناش الكأس بقى لنا سنين وسنين لكن لسه عندنا أمل.

والأمل بقى فى برنامج “قوى قلبك” اللى بـ يقدم لنا الموسم العاشر ومصر بـ تشارك فيه لأول مرة وبـ تتنافس فيه مع خمس دول وهما أمريكا وفرنسا وإندونسيا وروسيا والمجر.

بـ تدور فكرة البرنامج حول مجموعة من الفرق من الدول اللى قولنا عليهم بـ يتنافسوا في مجموعة من الألعاب الخطيرة جدًا لكنها فى نفس الوقت مضحكة وممتعة جدًا.

والبرنامج مأخوذ من فكرة برنامج فرنسى عُرض على مدار السنين اللى فاتت وحصل على نسبة مشاهدة عالية، في برنامج “قوي قلبك” بـ يشارك فريق من مصر ويمثل القارة الإفريقية ضد الفرق الثانية علشان يكون مجموع الفرق ستة، وعلى كل فريق بذل الجهود الممكنة علشان يجيب أعلى نقط في كل جولة، والنقط دى هى اللى هـ تقول مين الفائز فى النهاية.. الجميل فى البرنامج أنه فكرته حلوة وألعابه صعبة ومسابقاته فى الوقت نفسه لها روح الفكاهة اللى هـ تخليك مش هـ تبطل ضحك طوال الحلقة.. على عكس برامج مسابقات ثانية اللى كل تحدياتها عقارب وفئران وديدان وحاجات من اللى تقشعر الجسم دى.

كمان اختيار داليا البحيرى لتقديم البرنامج كان موفق جدًا وبصراحة هى واجهة مشرفة لمصر لأنها بـ تشجع بحماس وتجرب كمان بعض التحديات بنفسها، وأعضاء الفريق المصرى هما أبطال فى مجالات رياضية مختلفة هـ نلاقى سباحة وجمباز ورياضات عنيفة يعنى فريق مرعب.

جميل أن إحنا بـ ننافس فى مسابقة عالمية لكن اللى مش جميل أننا على طول فى مستوى متأخر يعنى تقريبًا بـ ننافس على المركز الخامس والسادس وده مؤشر مش لطيف على طبيعة الرياضة فى مصر وأهمية أننا نخلى بالنا من ده ومن أولادنا ويبقى فيه برامج صناعة الأبطال فى مجالات مختلفة.

ومن الألعاب اللى شدتنا فى البرنامج “حائط الأبطال” وهو عبارة عن تسلق لحائط عن طريق عصا وهو صعب جدًا ومحتاج مجهود بدنى عالى.. وروسيا هى بطل العالم فى اللعبة دى علشان كده على طول كل حلقة هما اللى بـ يفوزوا على باقى الدول.

لازم نقول أن البرنامج مصروف عليه بشكل جيد وإنتاجه ضخم جدًا، الناس دى لما بـ تعمل مسابقات بـ تبقى عاوزة الموضوع يطلع بشكل حلو وكبير.. وكمان تقنية التصوير اللى بـ تركز على اللاعب والمدرب وتعبيرات الوجه، والكاميرات اللى موجودة فى الملعب فى كل مكان موضوع لازم نأخذه فى الاعتبار ونقول أن مش أى مسابقة يشترك فيها دول العالم لازم تبقى سهلة وهادئة.. أبدًا دي حرب بين الدول على مين يأخذ لقب “قوى قلبك”..ربنا معاكى يا مصر.

عجبك ؟ جرب

برنامج "Killer Karaoke" على قناة الحياة.

نصيحة 360

برنامج "قوى قلبك" يعرض على قناة mbc مصر كل جمعة الساعة 11 مساءً، من تقديم داليا البحيرى، وإخراج  دانى ك. صليبا.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح