The Definitive Guide to Living in the Capital , Cairo , Egypt

تليفزيون
كرسي في الكلوب

كرسي في الكلوب: برنامج فني اسمه مثير ومضمونه مكرر

  • توك شو
  • من الآن
تم التقييم بواسطة
Cairo 360
قيم
قيم الآن
كرسي في الكلوب: برنامج فني اسمه مثير ومضمونه مكرر

ناس كثير تشهد للمذيعة
لميس الحديدي بقوة شخصيتها، وقدرتها الكبيرة على الاستحواذ على تركيز المشاهد
واهتمامه، صوتها ولغتها الجسدية، وكل تفاصيلها، فعلاً بـ تقدر تمسك الضيف تخرج منه
كل اللي هي عاوزاه، وده كان واضح جدًا في لقاءات سابقة لها مع الفريق أحمد شفيق
وغيره كثير من الشخصيات اللي تم استضافتهم في حلقات سابقة من برنامجها اليومي
“هنا العاصمة”، شطارتها شيء مفروغ منه، سواء اتفقنا أو اختلفنا على حب
واحترام الجماهير لها.

حسينا أن لميس
الحديدي محبوسة في برنامجها الجديد “كرسي في الكلوب” البرنامج اللي بـ يُذاع
كل يوم الساعة 8 بالليل، وبـ يتعاد في اليوم الثاني الساعة 12 م وبعدها بساعتين
على cbc
2، محطوط له إطار وفكرة
محددة ما تقدرش لميس تخرج منها، الفكرة هي عبارة عن قرار قوي أخذه الضيف كان بالنسبة
له كرسي في الكلوب، بـ يبدأ يحكي عنه وعن تأثيراته في حياته، أو في بعض الأحيان
أحداث خارجة عن إرادة الضيف مثلت كرسي في كلوب حياته، مدة الحلقة حوالي 23 دقيقة،
لكن لاحظنا أن الأسئلة محددة جدًا، وده مخلي المساحة اللي بــ تتحرك فيها لميس
ضيقة، وبالتالي مش واخدة راحتها.

توقف برامج التوك شو
في رمضان خلى فيه بعض المذيعين يأجزوا خلال الشهر الكريم، لكن يبدو أن فيه مذيعين
عندهم من النشاط والحيوية اللي يخليهم مش بس يكملوا في برامجهم، لأ وكمان يعملوا
برامج ثانية جنب شغلهم الأساسي زي  لميس
اللي بقت خلال الشهر الكريم بـ تقدم برنامجين، الأول “هنا العاصمة” على
الـ cbc2، والثاني برنامج  مسجل هو “كرسي
في الكلوب”.

البرنامج مافيهوش
فقرات، هو مجرد سؤالين ثلاثة رئيسيين مع تساؤلات جانبية في الموضوع اللي بـ يبدأ
الضيف يتكلم فيه، الحلقة الأولى كانت مع شيرين عبد الوهاب، تكلمت في الحلقة عن
قراراها أنها تسيب روتانا، وأنها تنتج ميني ألبوم خاص بها من إنتاجها الشخصي، نقدر
نقول أن الأسئلة تقليدية، محاولة لإظهار نجم في برنامج وخلاص، وكلام كثير بـ يُقال
خلال الحلقة ثلاث أرباعه قيل قبل كده في الصحافة.

التتر ظريف معبر جدًا
عن الفكرة ألوانه مبهجة وجميلة، لكن الستوديو شكله مش جديد، شكله “ستوديو”،
شيرين عبد الوهاب ما قالتش جديد في الحلقة الأولى، نفس الكلام قالته قبل كده في
برامج ثانية بعد كده ولقاءات صحفية قبل البرنامج، كمان النائب السلفي البلكيمي
اللي كان ضيف الحلقة الخامسة من البرنامج ما قالش جديد، مجرد كلام مُعاد بـ تحاول
لميس بشطارتها أنها تبينه أنه مختلف لكن هو مش كده.

لاحظنا أن ضيوف
الحلقات مكررين بين البرنامج ده وكل البرامج الحوارية تقريبًا كأن الضيوف كانوا بـ
يخرجوا من ستوديو يدخلوا لثاني.

عجبك ؟ جرب

"أنا والعسل" مع نيشان.

نصيحة 360

لو بـ تحب البرامج اللي من النوعية دي اختار "كرسي في الكلوب" أو برنامج شبهه وما تشتتش نفسك بين البرامج اللي زيه ولا تضيع وقتك، المحتوى واحد والأسماء بس هي اللي بـ تتغير وبـ تتكرر.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح