The Definitive Guide to Living in the Capital , Cairo , Egypt

تليفزيون
لقمة هنية

لقمة هنية : برنامج طبخ لذيذ مع شيف دمه خفيف على قناة النهار

  • طبخ
  • من الآن
  • أحمد شفيقأحمد شفيق
تم التقييم بواسطة
Muhammad Nasr
قيم
قيم الآن
لقمة هنية : برنامج طبخ لذيذ مع شيف دمه خفيف على قناة النهار

“لقمة هنية تكفي 100” مثل مصري شهير بـ نقوله لما بـ نعزم على حد والأكل يكون شكله قليل، الحقيقة المثل تم استخدامه بشكل ثاني خالص في اسم برنامج طبخ على قناة النهار من تقديم الشيف علاء الشربيني، مين الشيف علاء الشربيني؟

ده كان أول سؤال لما بدأ الإعلان عن البرنامج وبدأنا نحزر بالطبيعة المصرية تشابه الأسماء وكان في محله.. الشيف علاء هو ابن الشيف الشربيني اللي بـ يقدم برنامج عن المطبخ برضه على قناة ثانية واللي يعتبر واحد من أهم الشيفات في مصر، بس ياترى ابن الوز عوام؟

يُعتبر لقمة هنية من البرامج التقليدية للمطبخ في وجود شيف بـ يقوم بالطبخ في ستوديو وبـ يستقبل مداخلات تليفونية، البرنامج مُقسم على عدد أيام الأسبوع كل يوم بنوع معين من الأكلات ويوم مخصوص لوجبات الأطفال ويوم الجمعة بـ يبقي يوم مميز بـ يتعمل فيه مسابقة للطبخ بين اثنين من الجمهور والشيف بـ يكون الحكم ما بينهم، أما نوعية الأكل مختلفة شاملة لكل الأذواق.

في تمام الساعة 1.30 ظهرًا على قناة النهار الأولى بـ يكون موعد برنامج “لقمة هنية” اللي عبارة عن موسيقى احتفالية مليانة مرح مع رسوم جرافيك لخضروات بألوان زاهية بـ تدخل في بعض وتعمل عرض جميل، بـ يبدأ البرنامج بعرض للمطبخ (الستوديو) اللي عبارة عن ترابيزة كبيرة أمام الشيف وفي الخلف الفرن وشاشات بلازما بـ ينزل عليها إعلانات طوال وقت الحلقة، وبـ يرحب الشيف بالجمهور ويعرض الأكلات اللي هـ تطبخ في الحلقة، بعد فاصل إعلاني صغير يبدأ عرض مقادير أول أكلة بتفاصيلها مع عرض قريب من الكاميرا على المقادير.

لاحظنا أن فيه ثلاثة كادرات ثابتين مش بـ يتغيروا أول كادر من فوق علشان تشوف الشيف بـ يحط مقادير إيه وشكل الأكل وهو بـ يستوي، الكادر الثاني صورة بعيدة شاملة المطبخ والشيف علاء للتأكيد على مساحة الستوديو ثاني مرة، أما الكادر الثالث وده اللي بـ يعتبر أكثر كادر ثابت في الحلقة صورة أقرب شوية للشيف علاء، كمان فيه كادر متحرك بـ يتابع تحركاته من الفرن للبوتاجاز يمين شمال وهكذا، لكن أحيانًا لما بـ يحط حاجة في الفرن الصورة بـ تبقى بعيدة ومتأخرة شوية وما تقدرش تشوف الأكل بشكل كويس إلا لما يقدمه كمان ممكن الكاميرا تكون بـ تصور في طبق تم تقديمه وسايبين الشيف بـ يضيف حاجة مهمة على أكلة جديدة.

برنامج “لقمة هنية” من برامج الطبخ اللي لازم هـ تجذبكم وتخليكم تتفرجوا حتى لو ما كنتوش من مشجعي الطبخ وبرامجه وده بسبب تنوع الأكلات وسهولة عملها غير العرض الجميل من الكاميرا اللي يخليكم عاوزين تمدوا أيديكم داخل الشاشة وده أكيد وراءه شيف محترف وفريق عمل متعاون ومتفاهم، من أول فريق الإعداد اللي بـ يبقى جاهز بمقادير أهم الأكلات اللي الناس بـ تسـأل عنها ووقت ما متصل يطلبها هـ تلاقوها على الشاشة (لتوفير الوقت) لغاية فريق التصوير والإخراج اللي يستاهلوا تقدير جيد (من وجهة نظرنا) بسبب الملحوظات اللي قولنا عليها، نتمنى للشيف علاء الشربيني وفريق عمل البرنامج مزيد من النجاح ويقدروا يقدموا لنا نوع جديد من برامج المطبخ مختلف عن المدرسة القديمة.

عجبك ؟ جرب

برنامج "المطبخ" على قناة الحياة من تقديم الشيف حسن والشيف يسري.

نصيحة 360

زمن الحلقة ساعة باستثناء حلقة الجمعة بتبقى ساعة ونصف، لو فاتتكم الحلقة تقدروا تتابعوها على قناة النهار2+ بعدها بساعتين أو ثاني يوم الساعة 5.30 صباحًا والإعادة بعدها بساعتين على النهار 2+ أو تتابعوا صفحة الشيف علاء على الفيسبوك هـ ترفع لكم الحلقة كاملة، البرنامج من إخراج أحمد شفيق وإنتاج قناة النهار.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح