The Definitive Guide to Living in the Capital , Cairo , Egypt

تليفزيون

مسلسل أوركيديا: لما تيجي تقلد.. حاول تكون محترف

مسلسل أوركيديا: لما تيجي تقلد.. حاول تكون محترف
    بواسطة
    Rasha Zeidan

    تعالوا نبدأ من الأول، من الحكاية الأولى،  اللي بتكلمنا عن تلات ممالك بيحاربوا بعض، وكل مملكة لها حاكم، وفيها أمراء ووزراء ومؤامرات، وحاجات كتير تانية.

    الصراع بيدور بين الممالك التلاتة، اللي بيمثلوا كل النظم السياسية، أو أشكال الحكم المختلفة من وجهة نظر الكاتب، ففيه مملكة بيحكمها الحاكم الطيب الحكيم، وفيه مملكة بيحكمها شاب قوي بيعرف يجيب حقه ويدخل في صراعات ويكسبها، وفيه مملكة اللي حاكمها نفسه يجيب ولي العهد، ودايمًا محتار.

    التلات ممالك هما مملكة أوركيديا، ومملكة سمارا، ومملكة أشوريا، المملكة الأولى هيكون حاكمها الأمير عتبة، واللي عمل دوره باحتراف وخصوصية هو باسل خياط، وساعده على ده ابن عمه ظافر، واللي أدى الدور معتصم النهار، وهيتزوج من رملة أخت عتبة، واللي قامت بدورها إيميه الصياح، صاحبة الصوت المميز والجميل.

    المملكة الثانية هي مملكة سمارا، الحاكم بتاعها هو الملك أنمار الطيب الهادي الحكيم، اللي بيصحى يبص على مملكته بسعادة ورضا، وقام بدوره باقتدار الرائع جمال سليمان، واللي على الرغم من حبه لزوجته الملكة الفارعة اللي قامت بدورها يارا صبري، لكنه بيقع في حب شقيقة عتبة “رملة”.

    المملكة الثالثة بيحكمها الملك الجنابي، وقام بدوره سامر المصري، وأداؤه ماكانش على نفس مستوى باسل أو جمال في أدوار الملوك، وهو متزوج من الخاتون اللي قامت بدورها سلافة معمار كما يجب أن يكون دور الملكة، علشان كده بنلاقي فوارق في المشاهد اللي بتجمعهم مع بعض، ما بين أداء سلافة القوي وأداء سامر المتوسط.

    الشخصيات كتير جدًا، لدرجة إنك ممكن تتوه ما بينهم، بالذات إن الحلقات الأولى مكانتش قادرة تعرف الموضوع بشكل احترافي، وكانت الحلقات داخلة على بعض، بالظبط كأن حد عنده معلومات كتير بس مش عارف يوصلهالك.

    الموسيقى هايلة، وإياد الرماوي رائع في اختياره لموسيقى قريبة من حالة الأوركسترا، والنغمات الحماسية، مع لمسة صبا حزينة كده في كام صولو بالمسلسل.

    الإخراج مقارنة بالفكرة متوسط، خاصة وإن تصميمات الأماكن المرتبطة بالديكور، والحروب كلها، كانت محتاجة تبقى أكبر من كده، طالما إن فيه إنتاج ضخم لعمل ضخم، لكن الإنتاج يبان من بره ضخم، ومن جوه لما تتفرج هما كذا لوكيشن وبيتم فيهم التصوير من زوايا مختلفة.

    لو اتكلمنا عن الإنتاج، هانعتبره إنتاج متوسط بالنسبة للفكرة، والإخراج كمان ياخد 6 من عشرة، علشان فيه سقطات كتير أهمها (التقليد)، وهنا السؤال يطرح نفسه، أي تقليد بتتكلموا عنه، نقولكم إنه تقليد مسلسل صراع العروش (Game Of Throne) اللي بيحكي عن تلات ممالك وبتدور ما بينهم حروب وصراعات ومؤامرات كتيرة، وعلشان تشوفوا مدى التشابه في الفكرة تقدروا تشوفوا كلامنا عن رواية صراع العروش وفكرتها على كايرو من هنا.

    وتقدروا تتفرجوا على تريلر مسلسل صراع العروش الجزء السابع من هنا.

     

    شباب السوشيال ميديا اهتموا بالفكرة واتكلموا كتير عنها، وعن التشابه بين صراع العروش وأوركيديا، وإن الاتنين بيدوروا في زمن مجهول، لأ وكمان شخصيات أوركيديا مرسومة في المسلسل زي بالظبط شخصيات لعبة العروش، بدرجة مستفزة صراحة، لإن الإنتاج بالمقارنة بين الاتنين واضح جدًا، وفيه واحدة من الصفحات اللي مهتمة بالميديا جابت الصور والفرق ما بينها.. هنا.

     

    مسلسل: أوركيديا

    بطولة: جمال سليمان،  سلوم حداد، عابد فهد، سلافة معمار، سامر المصري، قيس شيخ نجيب.

    ﺇﺧﺮاﺝ: حاتم علي.

    ﺗﺄﻟﻴﻒ: عدنان العودة.

    تصنيف العمل: درامي – تاريخي.

    القناة: أبو ظبي.

    مواعيد العرض : يوميًا 5 ، 11 مساءً.

     

     

    مقترح