-
طبخ
-
من الآن
-
هشام أبو الدهب
Cairo 360
“نص مشكل”.. برنامج بـ تقدمه رانيا الجزار، على قناة cbc سفرة، والحقيقة هو اسم على مسمى فعلاً، البرنامج قائم على الحوار بين المذيعة وضيفها في الحلقة، الضيف مش بـ يتم اختياره عشوائيًا، رانيا بـ تختار أنها تجيب ناس من ثقافات مختلفة علشان يتكلموا ويطبخوا كمان.
كل واحد بـ يحب الطبخ بـ يكون عنده سر خاص به، لما مجموعة كبيرة ومختلفة من الناس تيجي في مكان واحد علشان يقدموا أسرارهم وأفكارهم الخاصة جدًا يبقى بجد البرنامج ده مميز وخاص جدًا، رانيا بـ تجيب ناس مختلفة من بلاد عربية ومحافظات مصر المختلفة علشان يقدموا خبرتهم وأفكارهم، المشترك بين الضيوف أنهم بـ يتكلموا عربي، وأنهم بـ يحبوا الطبخ جدًا وعندهم حاجة مختلفة يقولوها.
ضيوف “نص مشكل” أحيانًا بـ يكونوا أول مرة يظهروا على التليفزيون، لذلك رانيا الجزار بـ تستوعب عدم إحراج بعضهم، ولو لاقيته سكت بـ تبدأ ترجعه للكلام مرة ثانية، وتشجعه يتكلم ويقول أكثر عن خبراته، لاحظنا كمان أنها بـ تحترم خصوصية ضيفها يعني لو مش بـ يأكل أرانب وبط.. إلخ بـ تسكت ومش بـ تحاول تتكلم أكثر في الموضوع.
أكثر حاجة لفتت نظرنا في البرنامج أن رانيا وضيوفها مش بـ يخافوا من تجربة الحاجات الجديدة، يعني ممكن سهل جدًا تلاقي فراخ بالبلح والسبانخ، اقتراح لعمل كاب كيك بملح خشن على الوش.
رانيا إنسانة أمينة بـ تقول لك أن الأكلة اللي هـ تعملها ثقيلة أو لأ، بـ تتكلم وتقدم البرنامج من غير تصنع، صحيح هي صوتها أحيانًا بـ يكون مش رايق قوي لكن حبها للي بـ تعمله واضح جدًا. الحلقة بـ تكون مقسمة بين رانيا والضيف معظمها كلام عن العائلة، وعن الأفكار، والخبرات، ووصفات بـ تقدمها رانيا ووصفات ثانية بـ يقدمها الضيف.
ناس بـ تحب تذوق الأكل أثناء الطبخ، وتخرج من المطبخ شبعانة، وناس بـ تكتفي بالرائحة تعرف منها الأكل عامل إزاي، أستوى ولا لأ، ناقصه توابل ولا مش ناقصه، البداية في البرنامج بـ تكون مبهجة جدًا مع ألوان التتر المشرقة.
في “نص مشكل” تلاقي ناس من لبنان وسوريا ومصر وغيرها من الدول، تحس أنك بـ تتفرج على 60 برنامج، مش بـ تأخذ خبرات متعلقة بالأكل وبس، لأ وكمان خبرات عن الحياة، ناس اتجوزت ما كانتش بـ تعرف تطبخ وبقوا طباخين مهرة، وهكذا.
طبعًا كل المميزات دي ما تنفيش بعض العيوب، زي مثلاً أن رانيا ساعات بـ تنسى أ ن بعض المشاهدين ممكن يكونوا مش متعلمين، أو مش بـ يعرفوا يتكلموا إنجليزي، لذلك هـ يقع منهم بعض المكونات اللي أسماءها غريبة وبـ تُقال بالإنجليزي زي مثلا لما قالت في واحدة من الحلقات “الشاي الإيرلي جراي”، كمان ساعات بسبب ضيق الوقت وتعدد الوصفات رانيا والضيف بـ يعملوا أكلتين ثلاثة في نفس الوقت، ويعملوا حاجة على النار في نفس اللحظة، فتقع بعض التفاصيل من المشاهد، كمان ساعات الكلام بـ يأخذهم، وبرضه تلاقي الضيف أو رانيا بـ يحطوا مكونات وما يقولوش دي قد إيه.. كمان فيه عيب ضايقنا أن المكونات بـ تُكتب أحيانًا من غير كميات، يعني قد إيه بطاطس، أو جزر، وده ممكن يعمل مشكلة فى النتيجة النهائية.