The Definitive Guide to Living in the Capital , Cairo , Egypt

تليفزيون
واحة الغروب

واحة الغروب: التلفزيون بروح السينما

  • خالد النبوي- منة شلبي- أحمد كمال- سيد رجب
  • دراما
  • من الآن
  • كاملة أبو ذكري
تم التقييم بواسطة
Mustafa Abd Rabu
قيم
قيم الآن
واحة الغروب: التلفزيون بروح السينما

موضوع تحويل الأعمال الأدبية لأعمال سينمائية أو مسلسلات، أمر مثير للجدل، ولما رواية بتتحول لفيلم أو مسلسل بيحصل حاجتين، أولًا اللي ماقرأش الرواية بيقرأها، وثانيًا اللي قرأها بيتابع العمل علشان يشوف قد إيه الأحداث متوافقة، ولو كان العمل التلفزيوني قريب لخياله هيحبه.

المسلسل بيحكي عن محمود عبد الظاهر ضابط الشرطة المؤيد للثورة العرابية، وبعد فشل الثورة ونفي عرابي، بيتم نفي محمود عبد الظاهر وإبعاده إلى واحة سيوة كعقاب على مشاركته في الثورة.

بيتعرف على الأيرلندية كاترين المهتمة بالأثار المصرية وبيتجوزها، وبيوصلوا الواحة بعد رحلة طويلة وصعبة، وهناك بيتعرف على أهل الواحة وعاداتهم وحياتهم وعلى الصراع بين الشرقيين والغربيين.

من الواضح إن كاملة أبو ذكري بذلت مجهود رهيب علشان تسيطر على أداء خالد النبوي -بطل العالم في الأفورة من وجهة نظرنا- وهنا أداءه كان جيد جدًا، وقدر يجسد انفعالات كتير متناقضة بهدوء، وخاصة إن شخصية محمود عبد الظاهر مركبة إلى حد ما، أو نقدر نقول إنه لسه خارج من أزمة ومحبط.

أداء منة شلبي سلس وجميل، وده بفضل الماكياج ونجاحها في نطق العربي المكسر، ومن الواضح إنها بذلت مجهود كبير في التحضير للشخصية.

سيد رجب أخيرًا خرج من دور الشعبي والمعلم ابن البلد، ويمكن ده أهم دور عمله لحد دلوقتي في مسيرته كلها. وكمان الممثل الأردني منذر رياحنة عامل دور ممتاز، وبرضه ده من أهم أدواره على الإطلاق، رغم إن مساحة الدور صغيرة.

أما الرائع العظيم أحمد كمال في دور الشيخ يحيي فهو أهم شخصيات المسلسل، من حيث التمثيل وتقمص أحمد كمال للشخصية، أو من حيث دوره في الأحداث اللي هيظهر بعدين. وبالمناسبة أحمد كمال كان عامل دور طبيب في مسلسل في رمضان اللي فات اسمه (الخروج) اللي عايز يشبع تمثيل يتفرج على مشاهده.

 

 

الصحراء عبارة عن مساحات واسعة من اللون الأصفر، لكن كاملة أبو ذكري قدرت تحول مشاهد الصحراء لكادرات مبهرة وغنية بصريًا.

موسيقى تامر كروان مافيهاش أي جديد، ونقدر نقول إن تتر البداية محاولة لتقليد بداية فيلم الهروب لأحمد ذكي.

وكالعادة المسلسل بيعاني من العيب المزمن لكل أعمال التلفزيون، المط والتطويل. لأن الـ 30 حلقة مدة كبيرة جدًا، مهما كانت الأحداث متشعبة والشخصيات معقدة، ويكفي إننا نقول إن القافلة اللي فيها محمود عبد الظاهر وكاترين وصلت بعد 4 حلقات!

على كل حال لحد دلوقتي مسلسل واحة الغروب من أفضل المسلسلات السنة دي، ونتمنى إنه يكمل بنفس التميز، ويتخلص من الإيقاع البطيء، علشان المشاهد مايفقدش استمتاعه بعناصر العمل المتميزة جدًا.

عجبك ؟ جرب

بنت اسمها ذات – نيللي كريم

نصيحة 360

المسلسل عن رواية "واحة الغروب" لبهاء طاهر.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح