The Definitive Guide to Living in the Capital , Cairo , Egypt

برنامج The voice «أحلى صوت» من البرامج اللى أطلقتها قناة mbc مؤخرًا وبـ يقدمه الفنان المصرى محمد كريم، من المدهش أن البرنامج حقق نجاح كبير بعد عرض 3 حلقات فقط وده بـ يرجع إلى أن فكرة البرنامج جديدة على الوطن العربى وبـ يتم فيه اختيار المتسابق على أساس الصوت فقط بغض النظر عن السن أو الشكل أو حتى الحضور على المسرح وبـ يشارك فى البرنامج مجموعة من نجوم الغناء العربى فى مقدمتهم الفنان العراقى كاظم الساهر والنجم التونسى صابر الرباعى والنجم اللبنانى عاصى الحلانى والفنانة المصرية شيرين.
الأربعة نجوم بـ يكونوا قاعدين على الكراسى وظهرهم للمتسابق وده طبعًا تحقيقًا لفكرة الاختيار على أساس الصوت بدون تأثير الشكل أو الأداء، وكل كرسى فيه زر أحمر بـ يضغط  عليه النجم (الحكم) لما يسمع صوت ويعجبه ويبقى عاوز يضمه لفريقه، ولما بـ يضغط الكرسى بـ يلف ويشوف المتسابق وممكن يلف أكثر من نجم لمتسابق واحد والجميل فى الموضوع أن الأخير هو اللى بـ يختار يكون فى فريق مين من النجوم اللى لفوا علشانه، وكل نجم على الأساس ده بـ يكوّن فريق من 12 متسابق بـ يدربهم علشان ينافسوا فى المنافسة الكبيرة.
وبالرغم أن الفنان كاظم الساهر نقطة جاذبة جدًا للبرنامج إلا أنه الأكثر تواضعًا ومراعاة للمتسابقين من حيث التعامل والاهتمام والتركيز والتعاطف بالكلام وما بـ يبخلش على أى متسابق بالنصيحة سواء هو اختاره أو لأ.
أما صابر الرباعى فبـ يختار بدقة شديدة جدًا لأنه -زى ما بـ يقول- عاوز الصوت اللى ما حصلش وعلشان كده مش بـ يضغط على الزر بسهولة وغالبًا بـ يسمع الصوت للآخر.
عاصى الحلانى بقى حساس جدًا ناحية الأصوات الحلوة وممكن يضغط على الزر من ثانى ثانية بـ يغنى فيها المتسابق وفى أحيان ثانية بـ يضغط فى آخر لحظة وينقذ أمل متسابق فى الفوز بس برضه بـ يكون له شروط معينة فى الصوت اللى بـ يختاره والصوت ده لازم يكون عريض لأنه عاوز الفريق بتاعه بشكل معين.
شيرين بقى ما بـ تلفش لصوت غير لما الصوت ده يخليها تقشعر (زى ما هى بـ تقول) وعلشان كده بـ تتردد كثير قبل ما تلف. وبالرغم أن النجوم جد جدًا فى الاختيار إلا أن عندهم خفة ظل بـ تخلى للبرنامج جاذبية خاصة، ده إلى جانب الأصوات الجامدة جدًا اللى بـ تتسابق فى البرنامج لدرجة أن بعضها ممكن تخلى الأربعة نجوم يلفوا وده طبعًا الصوت الجبار اللى لا يقاوم وممكن النجوم الأربعة يتنافسوا مع بعض علشان كل واحد يضم الصوت ده لفريقه زى ما حصل مثلاً مع المتسابقة السورية نور عرقسوسى اللى انتقلت بغنائها من اللغة الإنجليزية للغة العربية بسلاسة ومرونة وهى بـ تغنى أغنية أنت عمرى لأم كلثوم. وخلت عاصى الحلانى يرتجل لها شعر علشان تكون فى فريقه وخلت كاظم يغني لها ويقنعها أنه هـ يكتشف مناطق جديدة فى صوتها وشيرين وقفت على الكرسى علشان تشجعها.
ودلوقتى خلصت المرحلة العمياء وهـ تبدأ مرحلة المباريات من 19 أكتوبر حتى 2 نوفمبر. لو حابين تتابعوا المنافسات القادمة استنوا كل يوم جمعة الساعة 30:10 مساءً على قناة mbc.