The Definitive Guide to Living in the Capital , Cairo , Egypt

وراء برجين مركز التجارة
وفندق «كونراد» على كورنيش النيل وفي تفريعة من تفريعات الشوارع الضيقة بتاعة شبرا
هـ تلاقي «حمام الأربع» في نفس المكان اللي كان فيه من 500 سنة، الحمام بـ يعمل
مساج وحمامات بخار وغسيل كامل للجسم كل ده بـ 25 جنيه! وأيًا كان رأيك في الموضوع،
لو رُحت وجربت مش هـ تخسر حاجة غير شوية القشر اللي هـ يطلع من جسمك بعد الحمام.

واحد اسمه «عوكل» من زبائن
الحمام المخلصين اشترى المكان من حوالي 11 سنة من الملاك الأصليين وعمل تجديد
للمكان المتهالك وحاول على قد ما قدر أنه يحافظ على الطابع الجمالي للمبنى. هـ تحس
أنك رجعت بالزمن وأنت داخل المكان وبـ تتأمل تفاصيله رغم أن الذوق الشعبي الحديث
ساب رتوش على معماره الأثري، ومع ذلك القاعة الكبيرة اللي سقفها على شكل قبة هـ
تزود عندك إحساس النوستالچيا (الحنين إلى الماضى).

الحمام على بُعد 5 دقائق
مشي من قسم شرطة بولاق فيستحسن أنك تركن عند القسم وتتمشى إلى الحمام. لو سألت أي
حد هـ يدلك على طول بس اتأكد أنك سألت على حمام الأربع علشان حمام التلات لاصق
فيه. 

الحمام ماشي على نظام
الحمام التركي اللي أتوجد في مصر أيام الدولة العثمانية والحمام المغربي كمان.
الأول بـ تدخل أوضة مليانة بخار بـ تفضل قاعد فيها شوية قبل ما تأخذ أول دش بارد!
طريقة العلاج بالمياه دي اللي بـ تختبر قدرتك على تحمل التغير المفاجئ لدرجات
الحرارة بس في نفس الوقت بـ تنشط الدورة الدموية في جسمك. فاعلية طريقة العلاج مش
أكيدة قوي بس الأكيد أنها بـ تجدد الحيوية، وهي بـ تخضك وبـ تفور دمك! احتمال تدوخ
شوية بس قالوا لنا أن ده عادي وصحي ومعناه أن الجسم بـ يجدد طاقته وهو بـ يحاول
يحافظ على درجة حرارته الداخلية.

الحاجة المُميزة بقى
للمكان فعلاً هي التدليك والغسيل الكامل للجسم. الرجل اللي بـ يعمل مساچ عنده حاجة
وأربعين سنة كده وعنده كِرش مدوَّر منور القعدة لأنه مش لابس حاجة غير البشكير
الأبيض ورابطه جامد على وسطه، وطول ما هو شغال هـ تلاقي كرشه بـ يخبط فيك غصب عنه
بس ما تاخدش في بالك. بـ يستخدم صابون للتدليك بدل الزيت وبـ يبتدي بالرقبة وبـ
ينزل على الصدر والظهر وكله بـ يتم بسرعة وتركيز. ومن كتر السرعة والقوة اللي بيتم
بيها المساچ الموضوع بـ يبقى خالي تمامًا من الاسترخاء والراحة المتوقعين من جلسة
مساچ! لكن بعد ما الجلسة تخلص هـ تحس أن عضلاتك استرخت.
بعد كده غسيل الجسم وده بـ يعمله رجل أصغر من الأولاني شوية في السن وبـ يكون لابس
جوانتي كده مِحبِب عشان يفرك به القشر والجلد الميت من على الجسم كله وبعدها تغسل
نفسك بمياة بس عشان تِنزِّل الصابون وتروح تاني تقعد في البخار وتأخذ غطس في المياة
الباردة زي ما عملت في الأول.