The Definitive Guide to Living in the Capital , Cairo , Egypt

مش كل
الناس بـ يبقى عندها لا الوقت ولا الفلوس أنها تروح المنتجعات الصحية واللي زمان
كانت بـ تتمثل في الحمام المغربي والنهارده بقيت تتمثل في الـ«سبا – spa». لكن من وقت للثاني
لو الواحد عنده الوقت وعاوز يدلع نفسه لازم يخوض التجربة دي. ده غير أن كثير من العرايس
بـ يروحوا المنتجعات الصحية قبل جوازهم علشان يهتموا ببشرتهم وجسمهم. احنا كان لنا
الحظ أننا نروح مع واحدة من العرايس دول لسبا اسمه «ديفاين –Divine ».

العمارة
كانت مش بعيدة عن «سيتي ستارز – City Stars»، ومدخلها والأسانسير
ماكانش فيه ما يبشر خير عن السپا لكن أول ما الباب اتفتح، فورًا ابتدأت كل حاجة
تتغير. روائح وعطور عميقة، موسيقى هادئة، إضاءة في منتهى الشياكة، الديكور كله
فواتح وبنيات، التيمة  العامة إفريقية وكل
عناصرها من الطبيعة سواء كان خشب أو جلد. المكان من الداخل واسع وأول مابـ تدخل بـ
تملأ استمارة عن صحتك وبياناتك. وبـ ترشدك لغرفة المساﭺ المسئولة عنه.

احنا
عملنا مساﭺ و«نيتوياﭺ – nettoyage» (تنظيف بشرة). غرفة المساﭺ إضاءتها خافتة وألوانها هادئة ومريحة،
وخبيرة المساﭺ والعناية بالبشرة، كانت بشوشة وابتسامتها فيها سلام، كملت مع
الموسيقى الهادئة الممزوجة بأصوات الموج والرياح والعصافير جو من الاسترخاء مافيش
زيه. الغرفة مُدفأة (احنا رحنا في الشتا)، لكن للأسف صوت التكييف عالي ومزعج.

الـ «نيتوياﭺ
– nettoyage» (275 جنيه) أخذ
حوالي 45 دقيقة وبـ يستخدموا فيه مستحضرات «كلارينز -Clarins» وبـ يشمل بخار
وترطيب وتنظيف، وبـ يغطي الرقبة كمان. وبما أنك بـ تكون مسترخي على ترابيزة
المساﭺ، الموضوع بـ يكون اختبار لذيذ ومريح نفسيًا. الرائع أن التنظيف فعال جدًا
ومفعوله فوري وبـ يقعد مدة طويلة، كل الرؤوس السوداء بـ تُزال والبشرة بـ تفضل
نضرة وجميلة.

المساﭺ
الشامل استغرق برضه 45 دقيقة (مساﭺ للأقدام واليدين لوحده).  في أوله خبيرة المساﭺ اللي في حالتنا كانت «نيڤين» (إيديها
حلوة أوي وواضح أن كل العاملين في المكان مدربين كويس)، سألتنا عن عطر الزيت اللي تستخدمه
معانا، ماكنش الاختيارات كثير ولكن اختارنا زيت الأناناس. المساﭺ كان مستفيض
ومُركز. كان مؤلم شوية عند منطقة الرقبة (عشان بـ تكون عضلاتها مشدودة من قعدة
الكومبيوتر)، لكن الظهر والأقدام والأرجل والرأس كان في منتهى الروعة. بعد المساﭺ
حسينا بالاسترخاء والراحة، وكمان الزيت على الجسم أعطاه ريحة وملمس استثنائيين.

«ديفاين»
فيه كمان دعك للجسم «سكرب – scrub» وده بـ يعملوه عرايس
كثير، وعندهم مانيكير، باديكير، ماسكات ومعالجات لبشرة الوش مختلفة، وإزالة الشعر
بالشمع.