The Definitive Guide to Living in the Capital , Cairo , Egypt

لو أنت من محبى الحيوانات الأليفة وخاصة الكلاب وعندك
مشكلة فى التواصل معاهم أو فى أنك تعودهم أيًا كان نوعهم على سماع وطاعة أوامرك،
وتنفيذ كل تعليماتك، وأنك تدربه على حماية بيتك وحمايتك أنت شخصيًا، أو أنك تكسر
الحاجز اللى بينك وبينه ويبقى بينكم ألفة، ما تقلقش لأن ده شيء ما بقاش مستحيل، علشان
أكاديمية «ميدل إيست ويندز» بـ تقدم دورات تدريبية للكلب بـ تحسن من سلوكه.

«ميدل إيست ويندز» أكاديمية موجودة فى 6 أكتوبر، اللى بـ
يستخدموا المحور هـ يلاقوا لوحة الأكاديمية مُعلقة على يمين اللى قادم من ناحية 6
أكتوبر، بـ تدرب الكلاب على حاجتين: تدريب الطاعة وده بـ يبقى له أكثر من برنامج
حسب نوع الكلب وشخصيته وسلوكه، وفى الكورس ده بـ يستقبلوا الكلب وهو عمره 3 شهور.

أما فى تدريب الحراسة لازم يكون الكلب عنده 9 شهور علشان
يكون على أتم استعداد من الناحية الذهنية والجسمانية لتلقى التدريبات، واستيعاب
التعليمات، وطبعًا قبل ما أى حد يقرر اشتراك الكلب فى أى كورس من كورسات
الأكاديمية لازم صاحب الكلب يعمل زيارة ميدانية لمكان الأكاديمية نفسه علشان يتعرف
على المكان ويتعمل تقييم مبدئى للكلب، والتقييم عبارة عن اختبار لسلوكيات الكلب هل
هو عدوانى ولا لأ، طريقة حياته، ومكانه، وطريقة أكله وشربه، نوعية الأكل اللى بـ يحبه،
وتفاصيل حياته اليومية، ومستوى ذكائه، ومشاكله، وطريقة احتكاكه مع الكلاب الثانية.

مدة الكورسات بصفة عامة بـ تبقى 40 يوم، أول أسبوع من
الأربعين يوم بـ يقعد الكلب فى الأكاديمية، وبعدين بـ يرجع لبيته ثانى، وأحيانًا بـ
يروح مدرب الكلب المحترف للبيت بواقع حصتين فى الأسبوع.

الأكاديمية بـ تفتح أبوابها كل أيام الأسبوع ماعدا
الجمعة من الساعة 10 لحد الساعة 3 العصر، وبـ تحدد تكاليف الكورس بناء على نوعية
الكورس لأن كل كلب وله سعره الخاص، كمان الأكاديمية مش بـ تعطى أسعار الكورسات فى
التليفون، ونوع الكلب، ومدة تدريبه. طبعًا خلال تدريب الكلب ووجوده بمقر الأكاديمية
بـ تبقى له رعاية خاصة، من حيث الوجبات اللى بـ تتقدم له، والرعاية الطبية له،
يعنى مافيش قلق من الناحية دي خالص.