The Definitive Guide to Living in the Capital , Cairo , Egypt

اميديوس

أميديوس: ستوديو تسجيل وبروفات في الزمالك

  • 110 أ شارع 26 يوليو
  • ستوديو صوت
  • 01066696936,01093764349,01222312411
  • 2 ظهرًا - 2 صباحًا
تم التقييم بواسطة
Waleed Abuarab
قيم
قيم الآن
أميديوس: ستوديو تسجيل وبروفات في الزمالك

ستوديو صوت جديد، يمكن الوحيد في الحي الراقي، في شارع 26 يوليو بعد محل «ديادورا»
وقهوة «رباعيات الخيام» على نفس الصف، الستوديو في أول عمارة على الصف الشمال في
أول شارع جانبي بعد القهوة، في الدور الأول.

ستوديو «أميديوس – Amadeus» له ريسبشن ظريف مليان رسومات وبوسترات وفيه عدد من
المجلات والموسوعات الخاصة بالمزيكا اللي ممكن تقعد تقرأها وتتفرج على الصور اللي
فيها وتنسى نفسك، وفيه كاونتر ممكن تعمل عليه أي حاجة تشربها أثناء فترة انتظارك.

غرفة البروفات مستطيلة الشكل ومساحتها صغيرة نسبيًا وأحد جدرانها زجاجي
علشان يسمح بالتواصل مع غرفة التحكم المجاورة أثناء البروفة وبالأخص أثناء
التسجيل. المعدات في غرفة البروفة كلها حديثة وفي حالة ممتازة، سماعات ياماها
وأمبليفاير Fender للجيتار مش موجود في
أي حتة، والدرامز ماركة Premier وصوته جيد جدًا، وصوت
الباص جيتار جيد فقط، وتوزيع السماعات والأمبليفيرات معمول بشكل احترافي علشان كده الصوت مجسم ونقي ومش هـ تسمع
أي صفارة أو ذبذبة غير مرغوب فيها. ولولا أن المساحة صغيرة شوية كنا ممكن نقول أنه
أحسن مكان لبروفات الفرق اللي عدد أعضائها كثير وبـ يستخدموا ميكروفونات كثير وبـ
تعمل الصفارة أياها لما تكون قريبة من بعضها أو من السماعات. لكن المكان هنا مثالي
لأي فرقة لا يزيد عدد أعضاءها عن 4 أفراد، أكثر من كده هـ تبقوا قريبين قوي من
بعض.

جودة التسجيل موضوع نسبي لو كنا متفقين على أن تسجيل الصوت في مصر لسه ما ارتقاش للمستوى المطلوب، خاصة في موسيقى الـ Underground وبعيد عن شركات الإنتاج المشهورة، لكن المنافسة اللي
بين الستوديوهات الكثير اللي فتحت مؤخرًا أكيد بـ تعلي جودة التسجيل يوم بعد يوم.
مهندس صوت محترف هو اللي بـ يقوم بعملية التسجيل والصوت هـ يبقى أفضل من المتوقع،
واللي لازم نقوله أن أصحاب المكان والمشرفين على التسجيل أشخاص متعاونين وظرفاء
جدًا، وهـ تشعر أنك واخد راحتك تمامًا في التعامل وكأنك صاحب مكان أو تعرفهم من
زمان.

الستوديو بـ يعمل زي ورش عمل وحصص تعليم آلات مختلفة زي الجيتار والدرامز
والباص جيتار، وممكن تبيع وتشتري آلات موسيقية وإكسسوارتها. إيجار الستوديو لمدة
ساعة للبروفة بـ يكون 40 جنيه، وساعة التسجيل بـ 150 جنيه، والستوديو بـ يشتغل طول
أيام الأسبوع من الساعة 2 ظهرًا لحد 2 بعد منتصف الليل. وفي التسجيل بـ يتم عمل
جميع الخطوات بداية من التراكات الخاصة بكل آلة لحد المكساج والماسترينج.

سعداء بوجود ستوديو زي «أميديوس» في الزمالك، ونتمنى أنه يستمر ويتوسع علشان
يبقى مركز ثقافي موسيقى متكامل زي ما أصحابه بـ يحلموا.

نصيحة 360

اتصل اسأل عن حصص تعليم الموسيقى، المواعيد مرنة جدًا والأسعار كمان.

أحسن حاجة

الصوت نقي والبروفة هناك مسلية.

أسوأ حاجة

المساحة الصغيرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح